8
Ɠimalai ɠa wooɠulazu
1 À woilo, ɠimalai ɠa toligi wosu,
keleɠelegi ɠa wooɠulazu.
2 Toɠa loni ada ɠaaɠoozagiti maazuʋɛ pele ɠobaʋɛ,
pele zaɠalaʋɛti.
3 Taa loaʋɛ, siɠi daaʋɛti,
nu lɛɛzuʋɛ taazuʋɛ, toɠa wooɠulazu:
4 «Nuiti, wa ɠa gè wooɠulazu wo ma,
nuɓusɛiti, wa ɠa gè ɓɔɛzu wo ʋɔ.
5 Wɔiti wo la dɛ faa mɔinmɔin kwɛɛni, à kidafaawui maaɠɔli,
faaɠaaɠaalala nuiti, à ɠɛ ga keleɠele nuiti.
6 À woilo dɛɛ, mazɔlɔɔ faa ɓiin ka gè bosu wo ma,
telebo kpɔɛiti ka ti ɠulazu dàaʋɛ.
7 Mazɔlɔɔ gaama ɓɔɛiti ka gè ti wosu,
màaɲɛɛi ɠa ga zɛɛ ɓɔɛiti.
8 Dàawooiti kpein sɔlegɛ,
tanɔpɛ su la zeini, ɓaa é ʋa ɠɛ ga zɛɛ ɓɔɛ, ɓaa yaava ɓɔɛ.
9 Ti pɛ gaaɠalagɛ naama nui ʋɛ, nii keleɠelegai,
ti ɠole naama nui ʋɛ, nii kalagai.
10 Nà-kalagi gè bosu ga woye, à naa wɔin ɠɛ, é leʋe walii ʋa,
faaɠwɛgi vizɔgɛ zanugi ʋa, anɛɛ zanu kitei.
11 Mazɔlɔɔ ɠimalai vizɔgɛ kɔbu yɔlɔɠɔ ʋagɔiti ba,
ani ʋagɔ nɔpɛ ge la zooga ʋokɔɠɔsu tɔun ma.
12 Nɔ̀un nà, nà ga ɠimalai, sèizuʋɛ ɠa ga kidafaawui,
sòogɛ faaɠwɛgi ta kidafaawui zɔlɔɔsu.
13 Ɠɔoɠɔ GALAGI ɠaazuluabai ɠa é ga, è zili ga faa ɲɔi.
Niiti gè ti wɔinzeɠezu, ta ga,
gaazulɛɛi, wasogi, faa ɲɔu ʋelei, ta zɛɛ wo daaʋɛ.
14 Tɛnɛ goo ʋagɔiti, ta kidafaawui ta ga nɔ̀nɔ,
nà ɠa gè ga keleɠelegi, zobogi ɠa ga nɔ̀nɔ.
15 Masagiti ta masadai ɠɛɛzu nɔ̀un saɓui zu,
kundiɠiiti ti tɔgiti sei, niiti ti zɔlegai.
16 Saɓui zu ɠa kundiɠiiti ti kundiɠilai ɠɛɛzu la,
ta seizumaanɛɛgiti ti pɛ ta ga tukpɔɠaaleʋe nuiti ti zɔlegai.
17 Nɔ̀un nà, naati kpein nɛɛʋɛ bɛ̀, niiti ti nɛ̀ɛzu ʋɛ,
niiti ti gàiziɛzu, naati ta pɛ̀tɛ.
18 Naavoloi ta lɛbiyai ta ga nɔ̀un nɔnɔ,
ta undaanɛɛi ta ani ʋagɔiti ti yɛsu ná ɠɔ.
19 Nà-tɔnɔgi vizɔgɛ, é leʋe zanugi ʋa, anɛɛ zanu kitei,
kulanumai gè feezu naa ɓaaɠoʋɛ walii ʋa.
20 Nà ziɛzu telebo pelei zu,
pìlɛgɛ sɔle peleiti ba,
21 gè ʋa ani ʋagɔi ve naati bɛ, niiti ti nɛ̀ai ʋɛ,
gè ta-ʋɛlɛiti buulaave ga naavoloi.
22 Gè ɠɛni Ɠɔoɠɔ GALAGI ya, kaite ná-botiiti tɔɔzeizuʋɛ,
aisa ná-boti mɔungiti tanɔpɛ ge ʋa ɠɛ.
23 Gè zeini kaite wɔlɔwɔlɔ,
aisa eteai ʋa ɓɛtɛ.
24 Siɛgi zu gè zɔlɔɔni da, kpoloɗɛi la ɠɛni dɛ ná,
ɓaa ziɛungiti, ziɛiti ti ʋa ɗa ɠula ti zu.
25 Gè zɔlɔɔni pɛ, aisa gizeiti ti ʋa ɓɛtɛ,
aisa gize ɓufɛgiti ti ʋa ɠula,
26 GALA ge la ɠɛni dɛ zooi ɓɛtɛni, ta zou yɔɠɔzuʋɛti,
anɛɛ eteai ma vufili mɔungi.
27 Gè ɠɛni ná niina, siɛgi zu é geeɠɔlɔgi zeini su la,
é kwɛgi la, é tati ziɛ wolai ma.
28 Siɛgi zu é tonaɓiingiti seini su la geezuʋɛ,
é zɛbɛi ve ziɛungiti bɛ, ti ɗa ɠula ga keeɠaaɓaai.
29 Siɛgi zu é kpoloɗɛi ɠwɛgi laani la, ziɛiti ti mina ɓudɛ maazu,
siɛgi zu é eteai ma wuulaagi ɠazaʋini da,
30 gè ɠɛni koba, eɠɛ ná-botiɠɛ ɠundiɠi,
gè ɠɛni ziilaazu folo-o-folo,
gè ɠɛni kuai wosu gaazu yeenɔpɛ,
31 gè ɗa kuai wo ná-etea ɓɛtɛai zu,
gè ɗa nà-ziilaai zɔlɔɔ nuɓusɛiti saama.
32 Niizu dòun zunuiti, à woilo gòoi ma,
wa ɠɛ ga undaanɛɛ nuiti, ni wa ziɛna ga nà-peleiti!
33 À woilo nà-kala gooiti ma,
wa ɠɛ ga ɠima nuiti.
À mina da ɠoba pɛ!
34 Undaanɛɛ nu ɠa ga naati, niiti ti woilosu gòo ma,
niiti ti losu nà-pɛlɛlaʋɛ folo-o-folo,
ti ɠaaɓaazu nà-pɛlɛlaʋɛ ma!
35 Mazɔlɔɔ zɔi a kà, naa zɛnvui zɔlɔɔga,
é Ɠɔoɠɔ GALAGI ná-kpɔbai zɔlɔɔga.
36 Kɛlɛ zɔi nɔpɛ é la ɠoloni bɛ̀, naa ɠa ɓɔɠɔ ɓɔlɔzu,
niiti kpein ti wɔ̀inzeɠezu, saai nɛɛʋɛ naati bɛ.»