Sɛʋɛi Lɔɔlusiɛi
107
(Guyeiti 107—150)
Unmɔɔ GALAGI, è mama
1 À Ɠɔoɠɔ GALAGI maamusɛ, mazɔlɔɔ pagɛ,
mazɔlɔɔ ná-wooɠɛɠiladai ɠa yɛsu ná ɠɔ.
2 Ɠɔoɠɔ GALAGI ná-nu unmɔɔgaiti ti naa wo,
niiti é ti unmɔɔgai, é ti ɠula ti wɔinzeɠe nuiti zeezu,
3 é ti ɠaalɛ ba, é ti ɠula zooiti kpein su,
folo ɠulazu, folo liizu, lɛkpɛmaʋɛ nu yeezazuʋɛ, lɛkpɛmaʋɛ nu ɠɔʋɛzuʋɛ.
4 Tanigaani ti ɠɛni leʋeteʋesu teʋebai zu,
ti la pele ɠaani, é ʋa lo ada ʋa, ná ga nu zeizu.
5 Pului ta kpɔɔle wɔin ɠɛni ti ma,
ti ʋalani ti-zuvikɛi ma.
6 Ta-ɠidaaʋiligi zu, ti ɓainni Ɠɔoɠɔ GALAGI woizu,
é ti ɠulani ta-yiiɓɔlɔ vaiti su.
7 É loni ti luɠɔ, é li ga tiye ga pele zɔlegi,
eyɛsu ti zeeli taa ma, nuiti seizuʋɛ.
8 Ti Ɠɔoɠɔ GALAGI maamusɛ ná-wooɠɛɠiladai vaa zu,
ta ná-laavɔɔ vaiti é ti ɠɛɛzu nuɓusɛiti bɛ.
9 Mazɔlɔɔ é kpɔɔle ɗɛi veeni naati zea, niiti kpɔɔle wɔin ɠɛni ti ma,
é ani ʋagɔiti feeni naati zea, niiti pului ɠɛni ti ma.
10 Tanigaa ti ɠɛni zeini kpidi ɓɔii zu,
maanɔɠɔi ti ʋa ga yɔlɔɠɔi ta kɔlui, ti ga kasoɠa nuiti.
11 Tɔɔzei ti wuzeɠeni GALA ná-deveiti daalɔɠɔma,
nii é Anii-Pɛ-Unda, ti naa ná-tɛnɛ gooiti bɛlɛʋilini.
12 É ti lɔɔni kpɔlɔi zu,
ti ɓunɛni, nu nɔpɛ ge la ʋaani, é ʋa ɓɔ ti ʋa.
13 Ta-ɠidaaʋiligi zu, ti kpeei looni Ɠɔoɠɔ GALAGI woizu,
é ti ɠizoni ta-yiiɓɔlɔ vaiti su.
14 É ti ɠulani kpidi ɓɔii zu,
é ta-yɔlɔɠɔiti teʋeleʋeni ti ʋa.
15 Ti Ɠɔoɠɔ GALAGI maamusɛ ná-wooɠɛɠiladai vaa zu,
ta ná-laavɔɔ vaiti é ti ɠɛɛzu nuɓusɛiti bɛ.
16 Mazɔlɔɔ é kɔlu ɓɔi kpogiti galeɠaleni,
é kɔlu zɔɠɔgiti kpezeɠele.
17 Ɠimalala nuiti, ti ta-eteai ziɛzu kotoi zu,
ti ɓɔɠɔ ɠɛɛni ga maawɔin nuiti, ta-vaaɠaaza golaiti faa zu.
18 Daamianigiti kpein ti ɲɔuni ti-laaʋɛ,
ti maaɓuɠani saai ʋa.
19 Ta-ɠidaaʋiligi zu, ti kpeei looni Ɠɔoɠɔ GALAGI woizu,
é ti ɠizoni ta-yiiɓɔlɔ vaiti su.
20 É daawooi leʋeni, é ti ɠɛdɛ,
é ti ɠulani saai ya.
21 Ti Ɠɔoɠɔ GALAGI maamusɛ ná-wooɠɛɠiladai vaa zu,
ta ná-laavɔɔ vaiti é ti ɠɛɛzu nuɓusɛiti bɛ.
22 Ti faanɛɛ wuuɠwɛɛ zalaɠaiti kula bɛ,
ta ná-kɛɛwotiiti dɛɛzu ga koozunɛ wuyeiti.
23 Tanigaa ti ɠɛni siɛi wosu ɓatoiti su kpoloɗɛi ɠa,
ti ɗa yaaɠolai ɠɛ ziɛ wolaiti ga,
24 naati ti Ɠɔoɠɔ GALAGI ná-kɛɛwotiiti kaani
ta ná-laavɔɔ vaiti, kpoloɗɛ wolai ɠa.
25 É ɓɔɛni nɔ, fiilɛ wolai lokoleʋe,
é kpoloɗɛi ma lakpatakpagiti buzeɠe.
26 Ta-ɓatoi ɠɛni ti lɛɛzu geezuʋɛ,
ná tago a kɛɛna, é ti yei zeɠei zu,
dualuagi ɠɛni ti ma, ti yiiɓɔlɔ.
27 Gaazulatigi ti zoni, ti ɗa ziɛ eɠɛ dɔɔzo nu,
ta-ɠimalai kpein gaaʋalani ba.
28 Ta-ɠidaaʋiligi zu, ti ɓainni Ɠɔoɠɔ GALAGI woizu,
é ti ɠulani ta-yiiɓɔlɔ vaiti su.
29 É zelii loni fiilɛi ma, naa lɛi tɔɔn,
ziɛ lakpatakpagiti ti laani kpɛ.
30 Naa ɠɛni ga koozunɛ vaa ti ʋɛ,
Ɠɔoɠɔ GALAGI loni ti luɠɔ, ti zeeli kein tosuʋɛ, ʋɛ ti ɓɛdɛi ɠɛni ná ʋa.
31 Ti Ɠɔoɠɔ GALAGI maamusɛ ná-wooɠɛɠiladai vaa zu,
ta ná-laavɔɔ vaiti é ti ɠɛɛzu nuɓusɛiti bɛ.
32 Ti maamusɛ nuɓusɛiti ta-maaɓɔgi zu,
ti dɛbi kɛwolaiti ta-ɠaalɛbai zu.
33 Toɠa ɗa ziɛ wolaiti fɔ su, ná ɠɛ ga teʋebai,
é ziɛungiti fɔ su, naati ti ɠɛ ga zou vɔɔi,
34 é zou ʋagɔi valibo, é ɠɛ ga zooi kpoloi wanaai ba,
nuiti ti zeini ga naati ta-ɠotoi maaʋele ma.
35 Kɛlɛ toɠa ɗa teʋebai valibo, é ɠɛ ga ziɛ wolai,
é zou vɔɔi ɓalaa valibo, é ɠɛ ga ziɛungiti.
36 É ná ɠɛ ga naati seizu, niiti pului ti ma,
naati ti taai lo ná, ti zei ná,
37 ti molo zuwui vaza kpalagiti su, ti ɗa leezɛn ɓeleiti da,
niiti ta ɠɛ gwaai wosu ga bɔɔlɔa.
38 GALA ka tuya loo ti ʋɛ, é ti ɠaawɔɔlɔ gola,
é la ta-loganiiti maaʋɛlɛa.
39 Siɛgi zu ti maaʋɛlɛzu la,
ti zuɓili nimiza ɠasɔi wu, maanɔɠɔi ta kidaaʋiligi zu,
40 GALA ka zobobɛ nuiti pɛlɛʋɛlɛ,
é ti ɠɛ ga teʋeteʋe nuiti teʋebai zu, ʋɛ pele la ná.
41 Kɛlɛ toɠa ɗa bala nuiti kula maanɔɠɔi zu,
é ta-ʋɛlɛyeɠeiti gaawɔɔlɔ, eɠɛ togani goiti.
42 Sɔle nuiti ta miná ɠa, ti ɠoozunɛ,
kɛlɛ telebotala laaʋɛ kpein daa ɠa ɠulu.
43 Zɔi nɔpɛ é ga ɠima nu, é dama ga niima vaiti,
é ɠida Ɠɔoɠɔ GALAGI ná-wooɠɛɠila kɛɛwotiiti bu.