109
Nui nii ti zɛɛi ʋɛɛzu ma,
é ɗa ɓɔɠɔ maalobosu ɠaiziɛ GALA pɔ bɛ
1 Guye loo ɠundiɠii nɔnɔi ʋɛ. Davide ná-guyei.
GALA, ɗɛi gè è maamusɛzu, mina maaɠɛ kpɔ.
2 Mazɔlɔɔ nu ɲɔiti ti laalaoga dàalɔɠɔma, ti ɗa tɔ̀ɠɔi ɠoloɠolo,
ti ɗa sùɠula ga zɛɛ nɛgiti.
3 Ti màaɠoolia ga wɔinzeɠema ɓɔɛiti.
Ti ɗa laalɛ bù wafuun.
4 Ta nà-nɛɛbɛi zuloozu ga ti ɗa màalɔ,
tama nɔ̀un nà GALA falizu nɔ,
5 ti ɗa nà-faa ʋagɔi zuloo ga faa ɲɔi,
ti ɗa nà-bɔɔlalai zuloo ga wɔinzeɠemai.
6 Wɛlɛ, nii ɠa ti bosu:
«Ade yeelo nu ɲɔu ɠila ba daalɔɠɔma,
maalɔɔ nu ɠila ge lo zeezazuʋɛ!
7 Siɛgi zu ta ɠɛ tukpɔɠaaleʋezu la, ti peelala,
ná-GALA falii ɠɛ ga kotoi!
8 Sii ma voloi zu mina mɔ ɠooza,
taɠili ge zei potogi zu!
9 Ná-dointi ti ɠɛ ga podointi,
anzai ɠɛ ga poanzai!
10 Ná-dointi ti ɠɛ ga teʋeteʋe nuiti, ti ɗa falii wo,
ta-vali wosuʋɛ maaɠooza ta-ʋɛlɛi ʋa koloɠologai!
11 Kuye nuiti ti yeeʋɛɛ kɔligiti kpein ma mɛɛ,
ná-botii zulɔnɔgi pɛ ge ɠɛ ga toosu nuiti tɔnɔ!
12 Nu nɔpɛ ge mina nuɓɔɠɔla ɠɛ bɛ,
ta nu mina ná-podointi maawɔinɠa!
13 Mavofodai zuwuɠaaleʋe,
ti-laaseigi ɠaaʋa yeeɠɛɠalai zu, nii é ʋaazu!
14 Ɠɔoɠɔ GALAGI mina ɠi kula mɛmɛwolani ta-vaaɠaaza golaiti su,
dee ná-kotoi mina gba é ʋa ɓe!
15 Ɠɔoɠɔ GALAGI ɠaazuyɛ nɔ ɠɔ ta-ɠotoiti ba,
é ti-laaseigi ɓale eteai zu.
16 Tɔɔzei, zunui nii la nuɓɔɠɔla nɔpɛ kɛɛni,
é maawɔin nui wɔinzeɠeni, nii é ga bala nui,
eyɛsu é nui naa ʋaa, nii ziiɠoloɠologai.
17 Nu voovoo vai ɠa é nɛɛni bɛ, foovooi tɔ ɓalaa so!
É la ɠɛni kɛɛzu, é ʋa tuya loo nu ʋɛ, tuyai ʋela, é maaɠooza tɔ ɓalaa ba!
18 É foovooi loo ɠɔba, eɠɛʋelei ná-seɠei la,
naa lɔ koozuʋɛ ga ziɛi ɠɛʋele,
é lɔ ma ɠaeiti su ga gulɔi ɠɛʋele.
19 É ɠɛ eɠɛ seɠei, nii é felevelesu ɓɔɠɔ ma,
ta saamaɠiligi é saamaʋɛ yeenɔpɛ!»
20 Tɔun, Ɠɔoɠɔ GALAGI mu ge màalɔɔ nuiti sala ɠana,
niiti ti tɔ̀ɠɔi ɠoloɠolosu.
21 Ee, Màliɠii, Ɠɔoɠɔ GALAGI, màalobo, è-laaseigi wɔɔlɔ vai ma,
mazɔlɔɔ ɗa-wooɠɛɠiladai ʋagɛ, ùnmɔɔ.
22 Maawɔin nu ɠa ga ze, gè ɠɛ ga bala nu,
zìi ɠoloɠologɛ kòozu.
23 Nà ɲɛɛlɛzu vaa, eɠɛ niinigi é zeɠezu,
ta nɔ̀un foɓesu eɠɛ kotogi.
24 Zu so faa wolai ɠa ɲìibiiti suɓalizu,
gè ɗa vɔ.
25 Gè ɠɛa ti ya ga ɓaaɠulama anii,
ta kàana nɔ, ti ɗa ungi ɲiikpi.
26 Ɓɔ bà, Ɠɔoɠɔ GALAGI, nà-GALAGI!
Kìzo ɗa-wooɠɛɠiladai maaʋele ma.
27 Sìli nuiti ti ɠɛ kwɛɛ ga ɗa ɠa, è naa ɠɛai ga è-yeei,
ga ɗa ɠila kpe, Ɠɔoɠɔ GALAGI, ɗa ɠa è naa ɠɛai.
28 Ta zoo ti foovooi wo, kɛlɛ ɗɔun ɗa, ɗa tuyai loozu.
Ta wuzeɠena dàalɔɠɔma, ta unfe,
kɛlɛ nɔ̀un nà, ɗa-wotiɠɛ nui, dàa ɠa ve ga koozunɛɛi.
29 Niiti ti nɔ̀un maalɔɔzu, zɔngɔi zɛlɛ ti pɛ ba,
unfegi loo ti ɠɔba eɠɛ seɠei.
30 Nà Ɠɔoɠɔ GALAGI maamusɛ ga woo wola,
nà dɛbi bɛbɛ wolai zaama.
31 Mazɔlɔɔ toɠa ɗa maawɔin nui maalobo,
é unmɔɔ, é kula naati zea, niiti ti peelalazu.