118
È yɛ vulua, è ɗa naa wo,
nii Ɠɔoɠɔ GALAGI kɛa
1 À Ɠɔoɠɔ GALAGI maamusɛ, mazɔlɔɔ pagɛ,
mazɔlɔɔ ná-wooɠɛɠiladai ɠa yɛsu ná ɠɔ!
2 Izilayɛle nuiti ti bo, ti ɠɛ ma:
«Ná-wooɠɛɠiladai ɠa yɛsu ná ɠɔ!»
3 Aalɔn mavofodaiti ti bo, ti ɠɛ ma:
«Ná-wooɠɛɠiladai ɠa yɛsu ná ɠɔ!»
4 Niiti ti luazu Ɠɔoɠɔ GALAGI ʋa, naati ti bo, ti ɠɛ ma:
«Ná-wooɠɛɠiladai ɠa yɛsu ná ɠɔ!»
5 Nà-kidaaʋiligi zu, gè wooɠulani Ɠɔoɠɔ GALAGI ma,
é gòoɠaaʋoteni, é fìeni.
6 Ɠɔoɠɔ GALAGI ɠa bà, gè la lua ani nɔpɛ ba,
leeni ɠa nui a zoo é kɛ ga ze?
7 Ɠɔoɠɔ GALAGI ɠa bɛ̀ ga nà-kpɔba nui,
nà wɔ̀inzeɠe nuiti koloɠolosuʋɛ ɠa ga gàazuʋɛ.
8 Fizɔgɛ nu Ɠɔoɠɔ GALAGI ɠɛ ga lɔɔɠuzuʋɛ,
aisa nu ʋa li ɠalivaazu nui ma.
9 Fizɔgɛ nu Ɠɔoɠɔ GALAGI ɠɛ ga lɔɔɠuzuʋɛ,
aisa nu ʋa li ɠalivaazu seizumaanɛgiti ma.
10 Zii ɠiligiti pɛ ti màalatini,
Ɠɔoɠɔ GALAGI laaseigi zu, gè ti ɓulukpuluni.
11 Ti màalatini, ti màavelevele,
Ɠɔoɠɔ GALAGI laaseigi zu, gè ti ɓulukpuluni.
12 Ti màalatini eɠɛ sɛlɛ kɔingiti,
kɛlɛ ti zaani eɠɛ abui é zosu dɔɔ laa fɔɔi ʋa.
Ɠɔoɠɔ GALAGI laaseigi zu, gè ti ɓulukpuluni.
13 Ti dàaʋili gola, gè ʋa loo,
kɛlɛ Ɠɔoɠɔ GALAGI ɓɔni bà.
14 Ɠɔoɠɔ GALAGI ɠa é ga nà-zobogi, ta nà-maamusɛ wuyeiti ma ungi,
tɔ ɠa é ga nà-kizogi.
15 Koozunɛɛi ta unmɔɔgi ma ɓee wooiti ta telebo nuiti ta-zeɠe ɠotaiti buulaave.
Ɠɔoɠɔ GALAGI yeezai ɠa botii ɠɛɛzu ga zɛbɛi!
16 Ɠɔoɠɔ GALAGI yeezai wuzeɠeʋɛ!
Ɠɔoɠɔ GALAGI yeezai ɠa botii ɠɛɛzu ga zɛbɛi!
17 Gè la zaazu, nà yɛsu vulua,
gè ɗa naa zuɠula, nii Ɠɔoɠɔ GALAGI kɛa ga kɛɛwotiiti.
18 Ɠɔoɠɔ GALAGI màaɠoloni,
kɛlɛ é la dɔ̀ɔni saai zu.
19 À pɛlɛi laalao bɛ̀, nii makɛgai sɔle nuiti ta-vaa ma,
miná ɠa gè lɛɛzu ná, gè Ɠɔoɠɔ GALAGI maamusɛ.
20 Wɛlɛ siɠidaʋɛ ʋa, nii é liizu Ɠɔoɠɔ GALAGI ʋɔ bɛ,
miná ʋele ɠa sɔle nuiti ti leʋesu da.
21 Nà è maamusɛzu, tɔɔzei è gòoɠaaʋoteni,
è ʋaani è ɠɛ ga nà-kizo nui.
22 Kɔtui nii pɛlɛ lo nuiti ti ɠɛlɛni ba,
naa ɠa kɛai ga sɔɓelama ɠɔtu wolai.
23 Naama vai ʋaaʋɛ é zeɠe Ɠɔoɠɔ GALAGI ʋɔ,
toɠa ga laavɔɔ vaa ade ɠaazu.
24 Za ɠa ga foloi nii Ɠɔoɠɔ GALAGI kulaai,
ade siɛ ga koozunɛɛi, de ɲaɠai ɠula, de ɠoozunɛɛ!
25 Ɠɔoɠɔ GALAGI, kizo fai ve!
Ɠɔoɠɔ GALAGI, undaanɛɛi ve!
26 Ɠɔoɠɔ GALAGI tuya loo naama nui ʋɛ, nii é ʋaazu daaseigi zu!
Gá tuya loozu wo ʋɛ, é ɠula Ɠɔoɠɔ GALAGI zei ʋɛlɛi wu!
27 Ɠɔoɠɔ GALAGI ɠila kpe ka é ga GALAGI,
tɔ ɠa é wozakalagi veezu de ya.
À dɔɔ laaiti so ya, wo lɔ polu ʋɛbɛi zaama,
eyɛsu wo zeeli zalaɠa ɠulazuʋɛ.
28 Ɗa ga nà-GALAGI, nà è musɛzu,
ee, nà-GALAGI, nà è maamusɛzu!
29 À Ɠɔoɠɔ GALAGI maamusɛ, mazɔlɔɔ pagɛ,
mazɔlɔɔ ná-wooɠɛɠiladai ɠa yɛsu ná ɠɔ!