132
Siyɔn, Masagi zeizuʋɛ,
ta Davide ná-taa wolai
1 Tɛɛ wo guyei.
Ɠɔoɠɔ GALAGI, ɠigaiziɛ Davide zu,
ta ná-kpɔlɔiti pɛ é ti woni.
2 É niima minazeɠegi woni Ɠɔoɠɔ GALAGI ʋɛ,
é niima minazeɠegi woni Zakɔɓe ná-Zɛbɛ-Su-ƓALAGI ʋɛ ga:
3 «Gè la lɛa nà-pɛlɛi wu, nii gè bu,
gè la lɛa nà-betei zu, ʋɛ gè laazu ná,
4 gè la vaa bu, ɲiimɛnii ʋa lɔ gàazu,
gàazu ɠɔlɔgi la pɛa ma mɛɛ,
5 eyɛsu gè ada zɔlɔɔ Ɠɔoɠɔ GALAGI ʋɛ ga seizu,
Zakɔɓe ná-Zɛbɛ-Su-ƓALAGI ʋɛ.»
6 Wɛlɛ, gi yɛni Efelata, gi minazeɠe kesui maawoo mɛni,
gi kaani Yaal lugi zu.
7 Ade li Ɠɔoɠɔ GALAGI zeizuʋɛ,
ade nɔkɔ ná-kɔɠɔloma anii ɠakalaʋɛ!
8 Ee, Ɠɔoɠɔ GALAGI, ʋa ɗa-looɠo bosuʋɛ,
wa ɗa-minazeɠe kesui, nii è-zɛbɛi ɠulazu kɛlɛma.
9 Telebodai ɠa ɠɛ ɗa-zalaɠa ɠula nuiti kɔba,
eɠɛʋelei ta ɗa seɠei loo la ɠɔba,
ɗa-wooɠɛɠila nuiti ti wooɠula ga koozunɛɛi.
10 Ɗa-nɛɛbɛi maaʋele ma, é lo ɗa-wotiɠɛ nui Davide ʋa,
mina ʋoluave masagi ʋa, nii è gulɔi ziaai ma.
11 Ɠɔoɠɔ GALAGI minazeɠeni Davide ʋɛ,
é la zeɠea minazeɠegi naa ʋolu, é ɠɛni ma:
«È-mavofodai ta ɠa gè seizu ɗa-masa kpɔkpɔgi ɠa, è-ʋotogi zu.
12 Ni è-loun zunuiti ta ziɛna ga nà-minazeɠegi,
ta nà-deveiti gè ti ɠalasu da,
ti-loun zunuiti ɓalaa ta zei ɗa-masa kpɔkpɔgi ɠa yeenɔpɛ, eyɛsu ɠɔ.»
13 Ungo, Ɠɔoɠɔ GALAGI yeeloni Siyɔn ʋa,
é yiimazeɠe ga ná seizu vai zu.
14 É ɠɛni ma:
«Nà-dooɠo bosuʋɛ ɠa eyɛsu ɠɔ.
Nà zei ná, mazɔlɔɔ wɔ̀inʋɛ ga ná.
15 Ungo, nà tuya loo bɛ, gè ani ʋagɔiti pɛ fe zea.
Nà daamianigi kpein fe bala nuiti zea, ti pɔ bɛ.
16 Nà kizo fai loo ná-zalaɠa ɠula nuiti kɔba,
ná-wooɠɛɠila nuiti ta wooɠula ga koozunɛɛi.
17 Nà Davide ná-zobogi wɔɔlɔ Siyɔn,
masagi gè gulɔi ziaai ma, nà naa ʋotogi ɠɛʋele ɓɛtɛ, eɠɛ lanboi é sosu.
18 Nà sili nuiti maaɠili ga unfegi,
kɛlɛ tɔun, ná-masa bɔɔlɔgi ɠa volo unmaʋɛ.»