148
GALA maamusɛ vai geeɠɔlɔgi zu ta eteai zu
1 À Ɠɔoɠɔ GALAGI maamusɛ!
À Ɠɔoɠɔ GALAGI maamusɛ geeɠɔlɔgi ungaʋɛ!
À maamusɛ, wɔiti wo geezuʋɛ!
2 À maamusɛ, wo pɛ ná-geezuɠeelaiti!
À maamusɛ, wo pɛ geezu ɠɔɔɓɔgiti!
3 À maamusɛ, foloi ta alugi!
À maamusɛ, wo pɛ somideɠaiti, wɔiti wo volozu!
4 À maamusɛ, ee, geeɠɔlɔgiti ti maaɠoozaai!
Wa ɓalaagi, ziɛiti wo maazuʋɛ geezuʋɛ!
5 Naama aniiti kpein ti Ɠɔoɠɔ GALAGI laaseigi maamusɛ!
Mazɔlɔɔ é devei veeni, ti pɛ ti ɓɛtɛ.
6 É ti zeini ga ti yɛ ɠɛʋele ma eyɛsu ɠɔ,
é ɠɛ ga tɔgi é la valiboga eyɛsu pɛ.
7 À Ɠɔoɠɔ GALAGI maamusɛ, wɔi pɛ wo eteai zu,
wɔi wo ga kpoloɗɛ wu zua wolaiti, kpoloɗɛ wu yeɠezaɠaiti wo pɛ,
8 mainmain, sakɔtui, kɔɔlɛ vukɔi, ɓumugi,
fiilɛ wolai nii é ɠolozu daawooi ʋɛ,
9 gizeiti ta gize goiti,
gwaa wuluiti ta sɛdele guluiti kpein,
10 dɔɓɔ zuaiti ta toganiiti kpein,
niiti kpein ti ɓokposu ɓaa ti ɠoʋesu,
11 eteai zu masagiti ta nuɓusɛiti kpein,
kundiɠiiti ta eteai leve nuiti,
12 zunu loungoiti ta anzanu loungoiti,
kɛwola wɔlɔiti ta doungoiti!
13 Ti Ɠɔoɠɔ GALAGI laaseigi maamusɛ!
Mazɔlɔɔ daaseigi ɠa bɔɔlɔai ti pɛ unda,
ná-maayikii zooi ta geeɠɔlɔgi laaɠulaʋɛ.
14 É zobogi ɠɛʋele ɓɛtɛʋɛ ná-nuɓusɛiti bɛ.
Naa ɠa ga ɓɔɠɔ maamusɛ vaa ná-wooɠɛɠila nuiti bɛ,
Izilayɛle nuiti, nuɓusɛiti ti maaɓuɠaai tɔun ba.
À Ɠɔoɠɔ GALAGI maamusɛ!