GALA Daawoo Zɛʋɛi Guyeiti 27

GALA pɔ bɛ ɠa é ga nu lɔɔɠuzuʋɛ

1 Davide ná-guyei.

Ɠɔoɠɔ GALAGI ɠa é ga nà-wozakalagi, ta nà-kizogi.

Ɓɛ ɠa nà lua ba?

Ɠɔoɠɔ GALAGI ɠa é ga zɛ̀nvui makɛ nui.

Ɓɛ ɠa nà inɛinɛ ba?

2 Siɛgi zu niiti ti faa ɲɔi ɠɛɛzu,

ti maaɓuɠazu la bà, ga ti kpùsɛi mi,

wɔ̀inzeɠe nuiti ta sìli nuiti,

tiya ɠa naazu, ti-ɠɔɠɔi ziɠazu, ti loo.

3 Ni kɔɔɠɔ nua ta wuzeɠena dàalɔɠɔma,

gè la lua zìimaʋɛ ga tago ɓalaa,

ni kɔɔ a wuzeɠena dàalɔɠɔma,

anɛɛ naa ʋe, dàavegɛ ga kitogi.

4 Ani ɠila kpe ka gè falizu Ɠɔoɠɔ GALAGI ma,

gè gaiziɛzu gola,

gè zei Ɠɔoɠɔ GALAGI ná-pɛlɛi wu,

sìi ma voloi pɛ su,

gè ɗa Ɠɔoɠɔ GALAGI ná-maayikii ʋɛtɛ,

gè ɠaaɓa gè tɔun kwɛɛ sei ʋɛlɛi wu.

5 Mazɔlɔɔ toɠa màkɛ ná-seɠe ʋɛlɛi wu,

kpɔlɔi ma voloi zu.

Toɠa dɔ̀ɔɠu ná-seɠe ʋɛlɛi wu,

toɠa bùzeɠe, é gàalɔ fasai ma.

6 Nɔ̀ungi wuzeɠeʋɛ na, gàaɠooza sìli nuiti ba, ti ɠooliai mà.

Nà zalaɠaiti kula ná-seɠe ʋɛlɛi wu, mama zalaɠaiti,

nà guyei loo, gè guyei loo Ɠɔoɠɔ GALAGI lɛbi vai ma.

7 Ee, Ɠɔoɠɔ GALAGI, woilo gòoi ma, nà wooɠulazu è ma,

gòoɠaaʋote è-zaalai ʋɔ!

8 Kìgi ɠa ɗa-vai wosu ma ga: «Gàiziɛ, è lati mà!»

Ee, Ɠɔoɠɔ GALAGI, nà è ɠaiziɛzu!

9 Mina ɠaazuʋɛ lɔɔɠu bà,

nà ga ɗa-wotiɠɛ nui, mina dàaʋili ga ziiɠaawanai,

ɗa ga nà-kpɔba nui!

Mina yeeɓe bà, mina ɠɛlɛ bà,

nà-kizo GALAGI!

10 Kɛ̀ɛ ta dèe ti ɠɛlɛni bà,

kɛlɛ Ɠɔoɠɔ GALAGI yeezeini bù.

11 Pelei lɛ ga ze, nii è pɔ ga gè ziɛ la,

ee, Ɠɔoɠɔ GALAGI, lo tùɠɔ telebo pelei zu,

tɔɔzei sìli nuiti ta gàiziɛzu.

12 Mina dɔ̀ sìli nuiti ziimai zu,

mazɔlɔɔ zɛɛ zeeleiti ti wuzeɠea dàalɔɠɔma,

toomai ɠa ti bosu.

13 Nà la ɠɛ ga leeni, ni kito ge la ɠɛni bɛ̀,

gè ʋa Ɠɔoɠɔ GALAGI ná-nɛɛbɛi ɠwɛɛ,

niima eteai zu fulu nuiti saama?

14 Ɠito Ɠɔoɠɔ GALAGI ʋa!

Zɛbɛzeɠe, è yiilɔɔ!

Ɠito Ɠɔoɠɔ GALAGI ʋa!