34
Màliɠii ùnmɔɔni,
é kùla maalua vaiti su
1 Davide ná-guyei, siɛgi zu é ɓɔɠɔ ɠɛɛni la ga titi nui Aɓimelɛke ɠaazu, naa kpɛ, é ʋela, é li.
2 Ungo, yeenɔpɛ nà yɛ Ɠɔoɠɔ GALAGI mamasu ɠɔ,
ná-maamusɛi ɠa ɠɛ dàaʋɛ eyɛsu ɠɔ.
3 Nà-ɓɔɠɔ maamusɛi ma ungi ɠa é ga Ɠɔoɠɔ GALAGI.
Ɓɔɠɔmaayei nuiti ti woilo, ti ɠoozunɛ.
4 À ʋa wo ɓɔ bà, ade Ɠɔoɠɔ GALAGI maamusɛ ʋɔɔma!
Ade daaseigi lɛbi ʋɔɔma!
5 Gè Ɠɔoɠɔ GALAGI ɠaiziɛni, é gòoɠaaʋote,
toɠa ɗa kùla fai kpein su, nii é màaluazu.
6 Siɛgi zu nu wɛlɛzu la tɔun ba, ɗa ɗa volo ga koozunɛɛi,
unfe ge la lɔa nu ɠaazu.
7 Maanɔɠɔ nui kpeei looni, Ɠɔoɠɔ GALAGI goomɛnini,
é kizo ná-kidaaʋili fai pɛ ma.
8 Ɠɔoɠɔ GALAGI ná-geezuɠeelai ɠa naati maaɠoolii zu,
niiti ti ziɛzu ga GALA ziimai, é ti ɠizo.
9 À kɔɠɔ, wo pɛtɛ, ʋelegi Ɠɔoɠɔ GALAGI ʋagai la!
Undaanɛ nu ɠa ga zunui naa, nii é lɔɔɠuzu pɔ bɛ!
10 À lua Ɠɔoɠɔ GALAGI ʋa, wɔi wo ga ná-nu ɲadegaiti!
Mazɔlɔɔ ani nɔpɛ ge la ʋalaga naati zea, niiti ti luazu ba.
11 Zala yiʋoiti ta ɗa ʋala ani ma, ti yɛ pului zu,
kɛlɛ niiti ti Ɠɔoɠɔ GALAGI ɠaiziɛzu, naati ti la ʋalaga ani ʋagɔ nɔpɛ ma.
12 À ʋa, dòun zunuiti, wo woilo gòoi ma!
Nà wo ɠalasu ga Ɠɔoɠɔ GALAGI ɠaazuluabai.
13 Zunui ɓɛ ɠa é wɔinni ga zɛnvui,
é wɔinni ga sii zuɠooza, é undaanɛɛi zɔlɔɔ?
14 È-nɛgi makɛ, é mina faa ɲɔu ɠɛ,
è-lakɔlɔgiti ti mina yaava ɓɔɛ wo.
15 Ʋoluave faa ɲɔi ʋa, è faa ʋagɔi ɠɛ,
ziilɛigi ɠaiziɛ, è ʋilɛ polu.
16 Ɠɔoɠɔ GALAGI ɠaazuʋɛ ɠa telebo nuiti ba,
goilogɛ gola ti ɓain gooiti ma.
17 Ɠɔoɠɔ GALAGI ɠa ɗa ɠaazuʋɛ lati naati daalɔɠɔma, niiti ti faa ɲɔi ɠɛɛzu,
nii a kɛ é ti ɠaaleʋe, nu mina ɠisiɛ ti zu eteai zu.
18 Siɛgi zu telebo nuiti ti kpeei loozu la, Ɠɔoɠɔ GALAGI ɠa ɗa woilo,
toɠa ɗa ti ɠula ta-ɠidaaʋiligiti kpein su.
19 Ɠɔoɠɔ GALAGI ɠa ziiɠoloɠolo nuiti koba,
toɠa naati kizo, niiti ti ziiɓɔlɔi zu.
20 Maanɔɠɔ mɔinmɔin ka ɗa zeeli telebo nui ma,
kɛlɛ Ɠɔoɠɔ GALAGI ɠa ɗa unmɔɔ, é kula ti pɛ su.
21 Toɠa ma ɠaeiti pɛ makɛ,
tanɔpɛ ge la ɠalea.
22 Maanɔɠɔi ɠa faa ɲɔu ɠɛ nui ʋaa,
telebo nui zili nuiti ta ti-zalai zɔlɔɔ,
23 kɛlɛ Ɠɔoɠɔ GALAGI ɠa ɗa ná-botiɠɛ nuiti kpein zɛnvui ɠizo,
ta niiti ti tɔun kɛai ga ti-lɔɔɠuzuʋɛ, naati ti la ʋeelala.