44
Nii GALA ge piligai ya
1 Guye loo ɠundiɠii nɔnɔi ʋe. Kolé mavofodaiti ta-ɠidafaawui.
2 Ee, GALA, gi mɛnini ga gi-woiyeɠeiti,
gi-mɛmɛwolani ti boni gi ma,
kɛɛwotii nii kpein è kɛɛni ta-ziɛgi zu,
wɔlɔwɔlɔi ma voloiti su.
3 È-yeei ɠa è zii ɠiligiti kpɛɛni la, è gi-mɛmɛwolani seizu ve,
è ziiti doɠani, nii a kɛ ti ɠaawɔɔlɔ.
4 Mazɔlɔɔ ta-woɠa zɔkpɔi laade, ti ʋa zooi zɔlɔɔ da ga tɔnɔ.
Ti-yeelokoi laade, é ʋa ti ɠizo.
Kɛlɛ kɛni è-yeezai, è-yeelokoi, è-ɠaazuʋɛ ma wozakalagi,
tɔɔzei è ɠɛni ga ti-ʋoluzeigi, ɗa-ƓALA pagɔlai ʋɔ.
5 Ee, GALA, ɗa ɠa è ga nà-masagi,
devei ve Zakɔɓe ná-kizo fai zu!
6 Gá ɠɛna è ʋolu, gá gi zili nuiti toka,
è-zaalai zu, gá ɠɔɠɔlo naati ma, niiti ti wuzeɠezu gi laalɔɠɔma.
7 Mazɔlɔɔ gè la ɠalivaani nà-mɛɛin ma,
nà-boɠa zɔkpɔi laade, é ʋa ɠɛ kìzosu.
8 Kɛlɛ ɗa ɠa è gi ɠizosu gi zili nuiti ma,
niiti ti gi maayoseɠezu, è unfegi lɔ naati gaazu.
9 Gá-ƓALAGI, gá è maamusɛzu folo-o-folo,
gá yɛ è-laaseigi lɛbizu eyɛsu ɠɔ.
Lo!
10 Anɛɛ naa ʋe, è gi ʋiliga ya, è unfegi yei ga giye,
è la mɔ yɛsu gá-zalaʋusuiti ba kɔɔmaʋɛ.
11 Ɗa vaazu bu gi zili nuiti ti gi ɓɛ,
gi wɔinzeɠe nuiti ti loo gi ma ga ti-yiimai.
12 È gi lɔɔni ti yeezu eɠɛ baalagiti ti liizu ti ʋaazu,
ɗa gi vazasu zii ɠiligiti saama.
13 È ɗa-nuɓusɛiti pɔdini ga daanɛai,
è la tɔnɔ nɔpɛ sɔlɔɔni su.
14 È gi ɠɛɛni ga zɔngɔzɛlɛ ba anii, gi-zeiɲɔɠɔiti zea,
gi ɠɛa ga gi-maaɠoolii zu nuiti ta-ɲɛɛɠulasu anii, nii ti zɔngɔzu ma.
15 È gi ɠɛa ga ɲɛɛɠulasu anii zii ɠiligiti zea,
nuiti ta ɠɔmɔɔnizu ga giye zii ɠiligiti saama.
16 Nà-ɓaaɠulamai ɠa tùɠɔ yeenɔpɛ,
unfegi gàazuʋɛ ɓidia,
17 siɛgi zu gè zɔngɔzɛlɛ ba nui wooi mɛnisu da,
é ɗa faiti gaaʋala ba, sili nui é ga potokula nui.
18 Naa kpein ka zeelizu gi ma,
anɛɛ naa ʋe, gi la yeemani è ma,
gi la ɗa-minazeɠegi ɠoloɠoloni.
19 Gi la ʋoluaveni ɗa gi-yiimaʋɛ,
gi-ɠɔɠɔiti ti la maaɠoozani ɗa-ʋelei ʋa,
20 anɛɛ naa ʋe, è gi wolowoloni koʋeiti pɛɛzuʋɛ,
è gi maaɓɔlega ga kpidi ɓɔii.
21 Ni gi yeemani gá-ƓALAGI laaseigi ma,
ni gi yeezeini gala kili bɛ,
22 GALA ge la ɓena naa ʋoluɠula ɓaa,
tɔungi é dɔɔɠuzu vaiti kwɛɛ nu yiimaʋɛ?
23 Kɛlɛ è maaʋele ɠa é kɛɛzu, ti gi lɔɔzu la saai zu folo-o-folo,
ti ɗa gi leve ga baalagiti, ti liizu ga tiye ti-ʋaazuʋɛ.
24 Wuzeɠe! Leeni vaa zu è ɲiizu, Màliɠii?
Wuun! Mina gi ʋili ya ɲɛgɛlɛin!
25 Leeni vaa zu è ɠaazuʋɛ lɔɔɠuzu?
Leeni vaa zu è yeemazu gá-maanɔɠɔi ma, ta gá-wɔinzeɠemai?
26 Mazɔlɔɔ gá laani fufiligi zu, ziiɓɔlɔi zu,
gi laaʋɛɛʋɛ zooi ma, ungo, pɔlɔi ɓɔɠɔi ma.
27 Wuzeɠe! È ɓɔ gi ʋa!
Gi unmɔɔ ɗa-wooɠɛɠiladai maaʋele ma!