47
À yealoɠa GALA bɛ
1 Guye loo ɠundiɠii nɔnɔi ʋe. Kolé mavofodaiti ta-wuyei.
2 Nuɓusɛiti, wo kpein à yealoɠa!
À ɠoozunɛ wo wooɠula GALA ma!
3 Mazɔlɔɔ Ɠɔoɠɔ GALAGI maayikiʋɛ, nii é Anii-Pɛ-Unda,
tɔ ɠa é ga eteai kpein su masa golai.
4 É nuɓusɛiti koloa gi wu,
é ziiti kolo gi-ɠɔɠɔi wu.
5 É yiimazeɠea ga gá-yooi gi ʋɛ,
é ɠɛ ga nɛɛbɛ nui Zakɔɓe mavofodai ná-lɛbiyai.
Lo!
6 GALA ka lɛɛzu seizuʋɛ pilɛ sɔlɔɔ gooi zaama.
Ɠɔoɠɔ GALAGI ɠa liizu ɠakala ʋelei puʋu fɛɛ wooi ʋɔ.
7 À guyei loo GALA dɛbi vai ma, à guyei loo!
À guyei loo gá-masagi lɛbi vai ma, à guyei loo!
8 Mazɔlɔɔ GALA ka ga eteai ma masagi,
à kidafaawu wuyei loo bɛ!
9 GALA ka masadai ɠɛɛzu ziiti unda,
GALA ka masadai ɠɛɛzu ná-masa kpɔkpɔ ɲadegai ɠa.
10 Ziiti ta-ɠundiɠiiti ta ɓɔsu su,
ta Abalaame ná-GALAGI ná-nuɓusɛiti!
Mazɔlɔɔ eteai ma wɛlɛma nuiti kpein ta GALA zeezu.
Tɔ ɠa é zeini eteai pɛ unda.