55
Nui ti yaavaai, ná-GALA falii
1 Guye loo ɠundiɠii nɔnɔi ʋe. É loozu ga kɔnigiti. Davide ná-kidafaawui.
2 Ee, GALA, woilo nà-maanɛɛnɛ wooi ma,
mina lɔɔɠu nà-maanɛɛnɛ wooi ʋa!
3 Ɠida nà-faiti bu, è gòoɠaaʋote!
Mazɔlɔɔ nà kpalagi wosu, gè ɗa kpeei loo.
Zìi ɠa kpɔlɔzu,
4 sìli nuiti daawooi maaʋele ma,
kpɔidai ʋɔ nu ɲɔiti ti bosu.
Mazɔlɔɔ ta màanɔɠɔzu,
ti ɗa ʋilɛ pòlu ta-yiiɠulagi zu.
5 Zìi ɠa ɓalizu kòozu,
saai ʋa luabai ɠa lɔɔzu ùnga.
6 Dualuagi ta sasuɓalii naati ta kpɔ̀lɔzu,
maalua vai màaɓɔlega.
7 Gè ɠɛ ma: «Nà pɔ ga gè koʋe sɔlɔɔ, ga poopogi ɠɛʋele,
gè ɠoʋe, gè li gè dooɠo bosu ʋagɔ zɔlɔɔ.
8 Wɛlɛ, nà ʋela gè li ɠoozama,
gè li gè zei teʋebai zu.
Lo!
9 Nà ʋelazu ʋagɔ zɔlɔɔ ga suvilɛ,
gè lɔɔɠu fiilɛi ʋa, anɛɛ fiilɛ wolai.»
10 Faazupui lɔ ti zaama, Màliɠii,
ti laawooi zupu,
mazɔlɔɔ nà toomai ta zeeɠaaɠwɛɛi ɠaazu taazuʋɛ,
11 ti ziɛzu kpidii ta foloi siɠigiti ga,
telebotalai ta faa ɲɔi ɠa taazuʋɛ.
12 Faa zuɠoloɠologi nɔ ɠa é ɠɛɛzu siɠigi naa zu,
yaavai ta zɛɛi la zeɠezu ta-maaɓɔ bosuʋɛti.
13 Mazɔlɔɔ sìli nu laade, é ʋa ɠɛ ɓaaɠulazu mà,
nà la va naa wu,
wɔ̀inzeɠe nui laade, é ʋa ɠɛ wuzeɠeni dàalɔɠɔma,
nà la lɔɔɠu ba.
14 Kɛlɛ ɗa ʋe, è ga zunui ga nɔ̀un kɛʋele,
bɔ̀ɔlai, nɛ̀ɛɲɔɠɔi!
15 Dɛi de ɠɛa ɓɔni dɔɔɠuzu vaiti ma,
siɛgi zu de ɠɛni liizu la ʋɔɔma, ada bɛbɛi GALA pɛlɛi wu!
16 Saai ɠula ti viliba!
Ti ma vului yei gɔvɛalaazu!
Mazɔlɔɔ faa ɲɔi ɠa ti-zeizuʋɛ, ta ti-yiimaʋɛ.
17 Nɔ̀un nà, nà kpee loozu GALA goizu,
Ɠɔoɠɔ GALAGI ɠa kìzo.
18 Kpɔkɔ, sobu ta folo gaalɔgai,
zìi ɠa ɓɔlɔzu, gè ɗa ɓala,
toɠa gòoi mɛni.
19 Toɠa ziilɛigi veezu bɛ̀, é zɛ̀nvui unmɔɔ,
é kùla kɔɔi ya, nii ti daalɛa bù.
Mazɔlɔɔ niiti ti kpɛ̀ɛzu, ti wola mɔinʋɛ.
20 GALA ka gòomɛni é ti ɠaayei.
Toɠa masadai ɠɛɛzu yeenɔpɛ!
Lo!
Mazɔlɔɔ ti la valibosu ɲɛgɛlɛin,
ti la luazu GALA ba.
21 Zunui naa ɠa laalɛɛzu seiɲɔɠɔiti kpein bu,
é ná-minazeɠegi ɠaaʋala ba.
22 Daaʋɛ ʋagɛ nɔnɔ vukɔi ʋa,
kɛlɛ kɔɔi ɠa é ziimaʋɛ,
daawooiti nɛɛʋɛ gulɔi ʋa,
anɛɛ naa ʋe, ta ga boɠa zɔkpɔiti niiti ti ɠulaai ti-maalaɠagiti su.
23 È-maavaiti zɛ Ɠɔoɠɔ GALAGI ya,
toɠa è zɛsɛbo,
é la telebo nui yɛga ná, é ʋa ɲiikpi, eyɛsu ɠɔ.
24 Ee, GALA, ɗa ti yei zeɠezaɠai ɓomaʋɛ,
ɲama ʋuu nuiti, yaava nuiti,
ti la ti-zii ma voloi ma ɠaaɠwɛsui zɔlɔɔga eteai zu,
kɛlɛ nɔ̀un nà, nà ɠalivaazu è ma.