6
Kpɔbai ɠaiziɛ vai
1 Guye loo ɠundiɠii nɔnɔi ʋe. É looni ga kɔnigiti, niiti galu lɔsaʋai ti ɠa. Davide ná-guyei.
2 Ɠɔoɠɔ GALAGI, mina dòɠa ɗa-yiiɠaawanai zu,
mina kòlo ɗa-yiiɠulagi zu.
3 Ɠɔoɠɔ GALAGI, màawɔinɠa, mazɔlɔɔ zɛbɛ nɔpɛ ge la mɔ bà!
Ɠɔoɠɔ GALAGI, bàlo, mazɔlɔɔ sàsu ɠa ɓalizu,
4 zìi ɗa wola ɓali.
Yeelɛ ɠa è ʋaazu la Ɠɔoɠɔ GALAGI, nà-kpɔba vai ma?
5 Ʋa bɛ̀ mɔnɔ, Ɠɔoɠɔ GALAGI, è ùnmɔɔ,
kìzo ɗa-wooɠɛɠiladai maaʋele ma.
6 Mazɔlɔɔ niiti ti zaai, naati ti la zooga ti ʋa ɠisiɛ è zu!
Ɓɛ ɠa a zoo é è maamusɛ gɔvɛalaazu?
7 Gè yɛga kpalagi wola wosu, gaaɓaai ɠula sù,
nà laani nà-betei zu, kpidii kpein gè ɗa wɔlɔ,
dàazuʋɛ yɛɓɛa, é lɛilɛi ga gàazuɗɛi.
8 Gàazuɠɛzɛiti ti wɔlɔzaɠaga ga ziizoolɛi,
ta wɔlɔzaɠasu, tɔɔzei sìli nuiti ta-vaa zu.
9 À maaɠooza bà, faa ɲɔu ɓɛtɛ nuiti,
mazɔlɔɔ Ɠɔoɠɔ GALAGI nà-gɔlɔ wooiti mɛnini.
10 Ɠɔoɠɔ GALAGI yeezeini nà-maanɛɛnɛ wooiti bu.
Ɠɔoɠɔ GALAGI vaani nà-maanɛɛnɛ wooi wu.
11 Sìli nuiti kpein ta unfe, ti zasuɓali,
ti ɠula ʋolu gaamanɔ, ti pɛ ti unfe.