GALA Daawoo Zɛʋɛi Guyeiti 63

Ɗa-nuɓɔɠɔlai vizɔgɛ zɛnvui ʋa

1 Davide ná-guyei. Siɛgi zu é ɠɛni la Zuda yooi zu teʋebai zu.

2 Ee, GALA, ɗa ga nà-GALAGI!

Nà è ɠaiziɛzu,

è wɔin ɠa zìi ma eɠɛ kpɔɔle wɔin,

kpùsɛi ɠa ɓalasu ga ɗa-vaa,

eɠɛ zou vɔɔi, ná vɔai, ziɛ la ná.

3 Zekana gè è ɠaazu la è-zeizu ɲadegai,

gè ɗa wɛlɛ è-zɛbɛi ta ɗa-lɛbiyai ʋa.

4 Mazɔlɔɔ ɗa-wooɠɛɠiladai vizɔgɛ zɛnvui ʋa,

dàkɔlɔgiti ta è maamusɛ.

5 Naa ɠa é ba, nà è mama sìi ma voloi pɛ su,

gè zèeiti tɛ geezu è-laaseigi zu.

6 Nà anii pɛ sɔlɔɔ é kula ɠɛ, eɠɛ ma wulɔi ta ma ɓɔlɔgi,

nà wooɠula ga koozunɛɛi, gè guyeiti too, gè è maamusɛ la.

7 Siɛgi zu kìgi loozu la è zu, dàazuʋɛ,

nà ɗa ɠigaiziɛ è zu kpidii ma yeeɠɛɠalai kpein su.

8 Mazɔlɔɔ ɗa ga nà-kpɔba nui,

nà guyei loozu ga koozunɛɛi, è-ɠoʋegiti ma niinigi wu.

9 Gìliʋɛ è ʋa ga zìimaʋɛ pɛ,

è-yeezai ɠa é ɓaazu màazu.

10 Kɛlɛ niiti wɔin ti ma ga ti zɛ̀nvui ɠoloɠolo,

naati ta yei zooi ma yeɠezaɠai ɓomaʋɛ.

11 Ta ti ʋaa ga boɠa zɔkpɔi,

ti ɠɛ ga koʋeiti daamianigi,

12 masagi ɠa ɠoozunɛ ga GALA maaʋele,

nu-o-nu nii a minazeɠe ná-faa zu, naa ɠa ɓɔɠɔ maamusɛ naazu.

Kɛlɛ naazu zɛɛ wo nuiti gaa ɠa lɛi, ti laaɠulu.