69
Màaɓɔlea, kìzo
1 Guye loo ɠundiɠii nɔnɔi ʋe. Davide ná-guyei. Nii é loozu é zoloo guye wooi ma, nii daa ga: «Bulɛgi ma ʋuaiti».
2 Kìzo, ee, GALA!
Ziɛi sòga kɔ̀daʋɛ.
3 Gè ɠataga palaʋalai zu,
kɔ̀ɠɔ losu nɔpɛ ge la bɛ̀.
Wɛlɛ, nɔ̀un gè yeiɗa ziɛi ɓomaʋɛ,
ziɛ veinfeingi màaɓɔlega.
4 Gè ɓɔlɔa ga kpee looi,
kɔ̀da yeɠei ɠaawana,
gàazuɠɛzɛiti ti ɓɔlɔa,
ga nà-GALAGI maaɓɔun fai.
5 Mazɔlɔɔ niiti ti wɔ̀inzeɠezu un ge la ba,
naati mɔinʋɛ, ti leʋe ùnma undeɠai liegɔi ʋa.
Ti-zɛbɛi wɔɔlɔʋɛ, tɛiti ti pɔ ga ti kòloɠolo,
ti ga sìli nuiti un ge la ba,
nii gè la unmani, kɛni gè naa ʋotogi ve.
6 Ee, GALA, è nà-ɠimalalai ɠwɛɛ,
ta nà-kɛɛwoti ɲɔiti ti la lɔɔɠuni è ʋa.
7 Niiti ti ɠitogai è ʋa, naati ti mina unfe nɔ̀un maaʋele ma,
Ɠɔoɠɔ GALAGI, Fai-Pɛ-Maliɠii!
Niiti ti è ɠaiziɛzu, naati ti mina unfe nɔ̀un maaʋele ma,
Izilayɛle ná-GALAGI!
8 Ɗa-vaa ɠa é kɛɛzu gè ɓaaɠulamai zuzosu,
ta unfegi lɔɔzu gàazu.
9 Gè ɠɛa ga wɛɛn kɛ̀ɛleaiti gaazu,
gè ɠɛ ga nui é la ɠwɛɛni pɛlɛyeɠei wu.
10 Mazɔlɔɔ ɗa-ʋɛlɛi ma wɔinlai ɠa gàlazu eɠɛ abui.
È ʋoomu nuiti ta-ʋoomugiti ti zeelia mà.
11 Gè wɔlɔni ga zìimaʋɛ pɛ, gè zugi zo,
naa ɠɛa zèa ga ɓaaɠulamai.
12 Gè saa wɔlɔ wo seɠei loa ɠɔba,
gè ɠɛa tiya ga ɲɛɛɠulasu anii.
13 Ta zeizu kpɔgi zu, ti ɗa sùɠula,
dɔɔ ɓɔle nuiti ti ɗa dàalɔɔ guyei zu.
14 Kɛlɛ nɔ̀un nà, nà nà-maanɛɛnɛ wooi laazeelizu è ma, ee, Ɠɔoɠɔ GALAGI!
É ɠɛ ga siɛgi nii soloogai,
ee, GALA, gòoɠaaʋote ɗa-wooɠɛɠilada wolai zu,
è kìzo ɗa-wooɠɛɠiladai maaʋele ma!
15 Ùnmɔɔ, è kùla palaʋalai zu, gè mina mɔ yei su ʋolu!
Ùnmɔɔ, è kùla naati zea, niiti ti wɔ̀inzeɠezu,
kùla pali ɓomaʋɛ!
16 Ziɛ veinfeingi mina màaɓɔle,
zeɠezaɠa ɓokulagi mina màalɔɔɠu!
Kabayeɠei laa mina ɠulu mà!
17 Gòoɠaaʋote, Ɠɔoɠɔ GALAGI, mazɔlɔɔ è ʋagɛ ɗa-wooɠɛɠiladai zu.
Ɗa-maawɔinɠaa wolai zu, lati nɔ̀un ma.
18 Mina ʋoluave bà, nà ga ɗa-wotiɠɛ zunui.
Nà-kidaaʋiligi zu, gòoɠaaʋote fala!
19 Maaɓuɠa bà, è ùnmɔɔ.
Nɔ̀un fie, sìli nuiti maaʋele ma.
20 È nà-ɓaaɠulamai ɠwɛɛ, ta nà-unfegi, ta nà-bɛlɛʋiligi,
niiti ti wɔ̀inzeɠezu, ta loni è ɠakala.
21 Ɓaaɠulamai ɠa zìi ɓɔlɔzu, gè la ziɛzu bu,
kìtogɛ maawɔinɠai ʋa tètema, kɛlɛ nà-maaɓɔungi ɠɛa ga wafuun!
Nà gaanɛɛnɛ nu ɠaiziɛzu, kɛlɛ gè la nu zɔlɔɔsu.
22 Ta anivebɛi ʋuuzu nà-daamianigi zu,
kpɔɔle wɔin a ɠɛna mà, ti dɔɔ ɓodai ve, è lo dà.
23 Ta-laami maaɓɔgi ɠɛ ti ʋɛ ga balii, ti ɠɔɔ la,
ti-zɔlɔɔ ganii ɠɛ ti ʋɛ ga balii!
24 Ti-ɠaazuʋɛ ɓidi, ti mina wozaɠa,
è ti-zaamaʋɛ ɓili eyɛsu ɠɔ.
25 Ɗa-yiiɠulagi yei ti ma,
ɗa-yiiɠaawana wolai ti mazɔlɔɔ.
26 Ti-ʋuuzuʋɛ ɠoloɠolo,
ti ʋala nuɓusɛiti ma ti-zeizuʋɛ.
27 Mazɔlɔɔ ta ʋilɛsu naa ʋolu, nii ɗa ɓɔɠɔi è doɠaai na,
ta naati ta-maanɔɠɔ vai zuɠulazu, niiti è ti maawanaai niina.
28 Ta-vaaɠaaza golai ma ɠasɔi la ti unma,
ti mina lɔɔzu zɔlɔɔ ɗa-lelebodai zu.
29 Ti-laaseigi ɓale, é ɠula zɛnvu zɛʋɛi zu,
ti-laaseigi mina zɛʋɛ ʋɔɔma ta telebo nuiti.
30 Nɔ̀un, màanɔɠɔʋɛ, gè ɗa zoolɛ ga ɓɔɠɔ,
ee, GALA, ɗa-ɠizo fai bùzeɠe!
31 Nà GALA daaseigi mama ga guyei,
nà bɔɔlɔ, nà ɠɛna maamusɛa,
32 naa nɛɛʋɛ Ɠɔoɠɔ GALAGI ʋɛ, é leʋe nikɛ zinɛi ʋa,
anɛɛ nikɛ zinɛ wolai nii minɛiti ti ba, ta polokagiti.
33 Ɓɔɠɔmaayei nuiti ta naa ɠa, ti ɠoozunɛ.
Ungo, wɔi wo GALA gaiziɛzu, zɛnvui ve wo ya.
34 Mazɔlɔɔ Ɠɔoɠɔ GALAGI ɠa ɗa woilo bala nuiti gooi ma,
wooɠɛɠila nuiti ti ga ná-nuiti, é la ɗa ga naati ta-vai ʋɛlɛʋɛlɛga, ni ta ɠɛna kasoi ɠa.
35 Geeɠɔlɔgi ta zooi ti maamusɛ,
ta kpoloɗɛi ta niiti kpein ti bu.
36 Mazɔlɔɔ GALA ka ʋaazu é Siyɔn taai ɠizo,
toɠa Zuda laa wolaiti to ʋolu.
Ná-nuɓusɛiti ta zei ná, ná ɠɛ ga tɔnɔ,
37 Ɠɔoɠɔ GALAGI ná-botiɠɛ nuiti ti-mavofodai ɠa ná zɔlɔɔ ga tɔnɔ,
niiti nɛai ti ʋɛ, naati ta ná ɠɛ ga ti-zeizuʋɛ.