Sɛʋɛi Zaʋasiɛi
73
(Guyeiti 73—89)
Leeni vaa zu
faa ɲɔu ɠɛ nuiti ti ɓɔɠɔ zɔlɔɔsu?
1 Azafe ná-guyei.
Ungo, GALA pagɛ Izilayɛle ʋɛ,
pagɛ naati bɛ, niiti ti-yiimaʋɛ ɠoleai.
2 Anɛɛ naa ʋe, nɔ̀un nà, ná tago nɔ kɔ̀ɠɔiti ti ɠɛnina ɓunɛsu,
ná tago nɔ te, gè ʋa loo,
3 mazɔlɔɔ gè ɠɛni toloi ɠulazu ga waso nui,
gè nu ɲɔiti ta-zɔlɔɔgi ʋɛtɛgai ma.
4 Mazɔlɔɔ kpɔlɔ la zeelizu ti ma, eyɛsu ti zaa voloi zeeli,
kɛdɛyai ɠa ti ya, ti lɔtɔai.
5 Kpɔlɔi nii é zeizu nuɓusɛiti ma, naa tanɔpɛ ge la zeizu ti ma,
nimizai nu vuluiti ti sɔlɔɔsu, naa ta la zeizu ti ma.
6 Naa ɠa é ba, ta ɓɔɠɔ maaɠilizu ga wasogi, é ɠɛ ti ɠɔbu ga yɔlɔɠɔi,
ti maaɠiliʋɛ ga toomai, eɠɛ tookɔbai kɔɠɔgai ti ma.
7 Ti-ɠaazuʋɛ ɠa volozu ga ti-ma wulɔi,
ti ɠoozu ɠisiɛ ɲɔi ɓela ge la ba.
8 Ta ɲɛɛɠulasui ɠɛɛzu, ti ɗa ɓɔɛ ga ɲɔuɗa,
nu nimiza vai zu, ta ɓɔɛzu ga gaazulɛɛi.
9 Ta laalosu geeɠɔlɔgi ɓɔɠɔi ʋa,
ti-laa la leʋesu faa nɔpɛ ba eteai zu.
10 Naa ɠa é ba, nuɓusɛiti ta ʋilɛsu ti ʋolu,
ti ɓɔɔle ga ti-laawooiti eɠɛ ziɛ,
11 ti ɗa ɠɛ ma: «Leeni ɠa GALA ge kwɛɛ?
Zɔi é Anii-Pɛ-Unda, naa ɠa kwɛɛ ɠale?»
12 Ʋele ɠana faa ɲɔu ɠɛ nuiti ti la,
ti yiilɛiɗai yeenɔpɛ nɔ, ti ɗa naavoloi ɠaalɛ ba.
13 Deɠɛmu fuun faa ɠa gè kɛɛni ga gè ɓɔɠɔ makɛ ladalai zu,
gè ɓɔɠɔ makɛ sɔbalalai zu nɔ fuun.
14 Nà kpɔlɔi zɔlɔɔsu folo-o-folo,
nà maaɠoloi laawu sobu-o-sobu.
15 Kɛlɛ ni gè deveni ga gè ɓɔɛ ga ti ɠɛʋele,
nà la ɗa-nuɓusɛiti yaava.
16 Gè tɔɔzeini ga ɠigaiziɛ, gè ɠidaani bu, ga gè gaaɠa,
é ɠɛni gàazu ga faaɓaa gola.
17 Eyɛsu naama voloi, yeei gè lɛɛni la GALA seizu ɲadegai,
miná ɠa gè ɠidaanina faa ɲɔu ɠɛ nuiti gaaɓelazuʋɛ wu.
18 Gaamazu, ɗa ti ʋilɛsu pele zuɲagiti su,
ɗa ti laaʋilisu ti-undaaʋilisuʋɛ.
19 Ee, wɛlɛ, yeeɠɛɠala go nɔ laawu, é ɠɛa ga nimizai, ti loa ya,
saai ma luabai ti ɠoloɠologa.
20 Eɠɛʋelei maaniinigiti ti la, niiti ti ɠaazu segi zu, ɗa wuunna ti ɲɛɛlɛ,
ee, Màliɠii, siɛgi zu è wuzeɠezu la, ɗa ti kpein ɲɛɛlɛ.
21 Siɛgi zu zìiɠaawanani la gola,
gè ɗa ɓɔlɔ zìimaʋɛ,
22 gè ɠɛni ga ɠimalala nui,
gè ɗa ziɛ è ʋolu, eɠɛ suai nii nɔungi la ná.
23 Anɛɛ naa ʋe, nà è ʋa yeenɔpɛ,
è sògɛ zèezai ʋa.
24 Ɗa losu tùɠɔ è-yiimai zu,
naa ʋoluma, ɗa sèɠe, è li ga ze ɗa-lɛbiyai zu.
25 Ɓɛ ɠili ka é zèema geeɠɔlɔgi zu?
É ɠula ɗɔun è ʋolu, zìima vaa ɠili nɔpɛ ge la ná eteai zu.
26 Anɛɛ ni kpùsɛi ɠa ɓɔlɔ, zìi ɓalaa,
kɛlɛ GALA ka ga nà-fasai, zìi ʋoluzeiɗai ba, é ɠɛ ga nɔ̀nɔ.
27 Mazɔlɔɔ wɛlɛ, niiti ti maaɠoozazu è ʋa, ti undaa ɠa ʋilisu.
Ɗa naati pɛ koloɠolo, niiti ti la ga wooɠɛɠila nu è ʋɛ.
28 Nɔ̀un nà, nà-undaanɛɛi ɠa é ga gè ɠɛ GALA kobaʋɛ yeenɔpɛ.
Ungo, gè dɔɔɠuzu ɠiteɠitegi ɓɛtɛʋɛ, Màliɠii Ɠɔoɠɔ GALAGI ʋɔ bɛ,
naa ɠa a kɛ, nii kpein é kɛa, gè ɗa naati bo.