75
GALA ka eteai lukpɔɠaaleʋe
1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Azafe ná-guyei. Guyei.
2 Gá è maamusɛzu, ee, GALA!
Gá è maamusɛzu.
Gá zezezu ga è-lɔɠɔi.
Ɛsɛ pɛ ka ɗa-ɠɛɛwoti maayikiaiti ta-vaa wosu.
3 Ɠɔoɠɔ GALAGI ɠɛ ma: «Siɛgi gè teʋeai ba, naa a zeelina,
nà tukpɔi ɠaaleʋe ga sɔledai.
4 Eteai ɠa ɲiikpi, ta nii kpein é zeini su,
nà ɠa nà zɛ loni kpaan kpɛdɛgiti ga.
Lo!
5 «Nà bosu naati ma, niiti ti wasosu ga: ‹À mina waso pa!›
Gè ɠɛ faa ɲɔu ɠɛ nuiti ma: ‹À mina loʋalaʋɛ wuzeɠe!
6 À mina gaazulɛ ɠula ga GALA!
À ɓe ɠɔgi losu ga, wo ʋa ɗa gaazulɛɛ ɓɔɛiti bo!› »
7 À suɠwɛɛ ga nui ná-bɔɔlɔlai la zeɠezu folo ɠulazu ʋelei,
ɓaa folo liizu ʋelei, ɓaa teʋebai zu.
8 Mazɔlɔɔ GALA ka é tukpɔi ɠaaleʋezu,
toɠa ta wuzeɠe, é ta ɠaayei.
9 Ziawɔi ɠa zoni Ɠɔoɠɔ GALAGI ya,
daavegai ga ná-ziiɠaawana lɔɔi, nii sɔgai é zupu.
Toɠa puuzu faa ɲɔu ɠɛ nuiti bɛ eteai zu,
ta kpɔle, ti ziawɔi naa zuwo eyɛsu é zeeli kpogi zu.
10 Nɔ̀un nà, gè la looɠoga bo fai ʋa ɠɔ,
nà Zakɔɓe ná-GALAGI maamusɛ yeenɔpɛ ga guyei.
11 Toɠa faa ɲɔu ɠɛ nuiti ta-wasogi zuɠaleɠale,
kɛlɛ tɔun, telebo nui ɠa ɠɛ ziɛzu nɔungi wuzeɠeai.