GALA Daawoo Zɛʋɛi Guyeiti 86

Nà-kidaaʋiligi zu, nà wooɠulazu è ma

1 Davide ná-GALA falii.

Woilo gòoi ma, Ɠɔoɠɔ GALAGI, è gòoɠaaʋote,

mazɔlɔɔ màawɔinɗa, gè ɠɛ ga bala nu.

2 Ʋa è zɛ̀nvui makɛ, mazɔlɔɔ gìliʋɛ è ʋa.

Ɗɔun ɗa ga nà-GALAGI, nà ga ɗa-wotiɠɛ nui, é ɠalivaazu è ma, ʋa è kìzo.

3 Ee, Màliɠii, zaalai la mà,

yeenɔpɛ nà wooɠulazu è ma.

4 Ɗa-wotiɠɛ nui ɠoozunɛ,

mazɔlɔɔ è ʋɔ pelei ɠa, Màliɠii, gè ɠaaʋotegai ná.

5 Ungo, Màliɠii, è ʋagɛ, ɗa ɗa maavaayɛgi wo fala,

è ɓɛtɛʋɛ wooɠɛɠiladai zu naati kpein tetema, niiti ti wooɠulazu è ma.

6 Woilo nà-maanɛɛnɛ wooi ma, ee, Ɠɔoɠɔ GALAGI!

Woilo, siɛgi zu gè è valizu la!

7 Nà-kidaaʋili foloi zu, ɗa ɠa nà ɗa wooɠula è ma,

mazɔlɔɔ ɗa ɠa ɗa gòoɠaaʋote.

8 Màliɠii, galagi tanɔpɛ ge la ga è ɠɛʋele,

tanɔpɛ ge la zooga, é ʋa naa ɠɛ, nii è kɛa.

9 Ɗa ɠa è ziiti kpein kpɛtɛai, ta ʋa, ti nɔkɔ è ɠɔɠɔwu, Màliɠii,

ti lɛbiyai ve è ʋɛ.

10 Mazɔlɔɔ è wɔɔlɔʋɛ, ɗa laavɔɔ vaiti kɛɛzu,

ɗa ɠa è ga GALA kite ɠila kpegi.

11 Ee, Ɠɔoɠɔ GALAGI, pelei lɛ ga ze, nii è pɔ ga gè ziɛ la!

Nà ziɛ ɗa-ɠaamai zu.

Naama ɠi gila kpegi ve bɛ̀, gè ɠolo ɗa-zobogi ʋɛ.

12 Nà è maamusɛzu ga zìimaʋɛ pɛ, Màliɠii, nà-GALAGI!

Nà è-laaseigi lɛbi yeenɔpɛ.

13 Mazɔlɔɔ ɗa-wooɠɛɠiladai zuwɔɔlɔʋɛ nɔ̀un tetema,

ɗa zɛ̀nvui unmɔɔsu, è kula gɔvɛalaazu ɓomaʋɛ.

14 Ee, GALA, waso nuiti ti wuzeɠea dàalɔɠɔma,

zunu ɓulugiti ta gaiziɛzu ga ti pàa.

Ti la seizu veezu è ʋɛ ta-ɠisiɛiti su.

15 Kɛlɛ, ɗɔun Màliɠii, ɗa ga maawɔinɠa ƓALAGI, nii é zaalai veezu,

zii la ɠula fala, kpɛtɛai nuɓɔɠɔlai ta wooɠɛɠiladai zu.

16 Ɠaaʋote nɔ̀un ma, è zaalai la mà!

È-zɛbɛi ve bɛ̀, nɛ̀i gè ga ɗa-wotiɠɛ nui.

Ʋa è ɗa-wotiɠɛ anzanui ná-doun zunui ɠizo.

17 Ɗa-nuɓɔɠɔlai ma ʋoogi ta ve bɛ̀,

niiti ti wɔ̀inzeɠezu, ti ka, ti lɔ unfegi zu.

Mazɔlɔɔ ɗa ɠa Ɠɔoɠɔ GALAGI, è ɓɔsu bà, è gàanɛɛnɛ.