94
GALA ka ɗa telebotala vaiti potokula
1 GALA nii é faa ɲɔu ɠɛ nui zalazu, Ɠɔoɠɔ GALAGI,
GALA nii é faa ɲɔu ɠɛ nui zalazu, ɠula kɛlɛma!
2 Ee, wuzeɠe, eteai lukpɔɠaaleʋe nui!
È fe waso nuiti zea, eɠɛʋelei ta-ɠɛɛwotiiti ti la!
3 Ee, Ɠɔoɠɔ GALAGI, faa ɲɔu ɠɛ nuiti ta ná, eyɛsu yeelɛ?
Ta pilɛ sɔlɔɔsu mɔnɔ, eyɛsu yeelɛ?
4 Ti ɗa kpɔɛi zuɠula, ti ɓɔɛ ga wasogi gaazumaavɔi zu,
tɛiti kpein ti telebotalai ɠɛɛzu, ta ɓɔɠɔ lɛɛzu su.
5 Ta ɗa-nuɓusɛiti nimizazu, Ɠɔoɠɔ GALAGI,
ti naati pɛlɛʋɛlɛ, niiti ti ga ɗa-nuiti.
6 Ta poanzai ta seikɔɠɔma nu ʋaazu ga kɛɛɠɛɛi,
ti podointi paa.
7 Ti ɠɛ ma: «Ɠɔoɠɔ GALAGI la kaazu,
Zakɔɓe ná-GALAGI la ɠidaazu bu!»
8 À dama, ɠimalala nuiti,
nuiti ta-ɠisiɛi ɓuɠaai, yeelɛ ɠa wa kisiɛ ʋagɔ zɔlɔɔ da?
9 Zɔi é nu woii ɓɛtɛa, naa la faa mɛniga ɓaa?
Zɔi é nu ɠaazuɠɛzɛi ɓɛtɛa, naa la wozaɠa ɓaa?
10 Tɔungi é zii ɠiligiti maaɠolozu, é la zooga é ʋa salai wo ɓaa?
Tɔungi é nuɓusɛiti kalasu, é la zooga é ʋa keleɠelegi zɔlɔɔ ɓaa?
11 Ɠɔoɠɔ GALAGI nuɓusɛiti ta-ɠisiɛiti kwɛɛ,
ta nɔ ga faa ɲaka.
12 Undaanɛ nu ɠa ga naama nui, nii è maaɠolozu, ee, Ɠɔoɠɔ GALAGI,
è kalasu ga ɗa-lɔgi,
13 è dooɠogi ve bɛ, siɛgi zu maanɔɠɔi a zeeli la ma,
názu ma zeɠei wɔa faa ɲɔu ɠɛ nui luɠɔ.
14 Mazɔlɔɔ eyɛsu pɛ, Ɠɔoɠɔ GALAGI la ná-nuɓusɛiti pilɛga.
É la ɠɛlɛa nɔnɔi ta ʋa pɛ.
15 Mazɔlɔɔ tukpɔi ɠaa ɠa ʋaazu leʋezu ga niinɛ, ga telebodai,
niiti kpein ti-yii zɔlegai, naati tosu ɠa ɓɛtɛ.
16 Ɓɛ ɠa é wuzeɠeni bɛ̀ faa ɲɔu ɠɛ nuiti daalɔɠɔma?
Ɓɛ ɠa é loni bɛ̀ naati daalɔɠɔma, niiti ti telebotala vai ɠɛɛzu?
17 Ni Ɠɔoɠɔ GALAGI la ɠɛni ɓɔni bà,
é ga gè lia gaalɛi adaʋɛ.
18 Siɛgi zu gè ɠɛɛzu la ma: «Kɔ̀ɠɔi ɠa na ɓunɛ bù,»
ɗa-wooɠɛɠiladai zu, Ɠɔoɠɔ GALAGI, è ɠɛni ga pòluzeigi.
19 Siɛgi zu ziizoolɛ mɔinmɔingi wuzeɠezu la zìimaʋɛ,
è gàanɛɛnɛni, è kòozunɛ.
20 Kpɔfaama ɠa nɛi wo yɔɠɔzu, wa tukpɔɠaaleʋe nuiti, niiti ti la leleboni,
ti maanɔɠɔi ɓɛtɛzu tɔgi ʋɛlɛʋɛlɛ vai zu?
21 Ta ɓɔsu su, ti wuzeɠe telebo nui yɛnvui laalɔɠɔma,
ti sɔbalala nui ʋeelala, ti ɠɛ é za.
22 Kɛlɛ Ɠɔoɠɔ GALAGI ɠa é nɔ̀un ma ga siɠigi,
nà-GALAGI ɠa é ga fasai, nii gè lɔɔɠuzu bu.
23 Toɠa ta-ɠotoiti kula ti zu,
toɠa ti ɠoloɠolo ta-zuɲɔi ɓɔɠɔi nɔ zu.
Ungo, Ɠɔoɠɔ GALAGI, ada-ƓALAGI ɠa ti pɛ koloɠolo.