99
À nɔkɔ Ɠɔoɠɔ GALAGI wu,
mazɔlɔɔ ɲadegɛ
1 Ɠɔoɠɔ GALAGI ɠa masadai ɠɛɛzu,
nuɓusɛiti sasu ɠa ɓalizu.
Toɠa ná-masa kpɔkpɔgi zeini seeluɓɛinti unda,
zooi ɠa ɲiikpisu.
2 Ɠɔoɠɔ GALAGI wɔɔlɔʋɛ Siyɔn,
buzeɠeʋɛ gola, é zei nuɓusɛiti kpein unda.
3 Nuɓusɛiti pɛ ti maamusɛ, tɔ ɠa é ga GALA golai, maayikiai,
mazɔlɔɔ ɲadegɛ!
4 Ti è-zɛbɛi maamusɛ, masagi nii telebodai nɛai bɛ!
Ungo, ɗa ɠa è sɔle faiti seiɗai kpasu,
è telebogi ta faa zɔlegai zei Izilayɛle zaama.
5 À ada-ƓALAGI, Ɠɔoɠɔ GALAGI ná-bɔɔlɔlai ɠula kɛlɛma,
à nɔkɔ bu, ná-kɔɠɔloma anii ɠakala,
mazɔlɔɔ ɲadegɛ!
6 Moize ta Aalɔn, ti ɠɛni ga ná-zalaɠa ɠula nuiti,
Samiyɛle ɠɛni naati saama, niiti ti ɠɛni wooɠulazu ma,
ti wooɠulani Ɠɔoɠɔ GALAGI ma, é ti wooɠaaʋoteni.
7 É yɛni tonaɓiingi zu, é ɓɔɛ ti ʋɔ,
ti ná-tɔgiti soni ta ná-deveiti, niiti é ti veeni ti ya.
8 Ee, Ɠɔoɠɔ GALAGI, gá-ƓALAGI, ɗa ɠa è ti wooɠaaʋoteni,
è ɠɛ ti ʋɛ ga maavaayɛ bo GALAGI,
kɛlɛ è ti loɠani ta-vaa ɲɔiti faa zu.
9 À Ɠɔoɠɔ GALAGI ná-bɔɔlɔlai ɠula kɛlɛma, ada-ƓALAGI,
à nɔkɔ bu, ná-gize ɲadegai ma!
Mazɔlɔɔ ɲadegɛ, Ɠɔoɠɔ GALAGI, da-ƓALAGI!