18
Davide zobo sɔlɔɔ fai
zɔɔma ziiti ma, ti maaɠoolii zu
(2 Samiyɛle 8:1-14)
1 Naa ʋoluma Davide vɔnini Filisiti nuiti ma, é ti ɠaazu unfe seɠe, é ta-laa wolai Gate ɠula ti ya, naa ʋɛɛ koba laaiti pɛ ba.
2 É vɔnini ɓalaa Moaɓe nuiti ma. Naati ti ɠoloni bɛ, ti ɗa mului zala ma.
3 Naa ʋoluma Davide vɔnini Soɓa masagi Ɠadadezɛɛl ma Ɠamate ʋele, siɛgi zu é ɠɛni liizu la ga ná-masadai zeiɗa ziɛ wolai Efelate maaʋɛ.
4 Davide kɔɔɠɔ wotolo waagila (1.000) kulani zea, naa ʋɛɛ soo ɓizɛ zalaʋusu waadɔfela (7.000) ʋa, ta siɛ kɔɠɔa zalaʋusu waaʋuufelegɔ (20.000). É wotolo ɓizɛ zoo ungila (100) makɛni. É mɔtaiti kɔɠɔʋolu ɲataiti teʋeni.
5 Siili yooi zu nuiti ti ɠɛni Damase, naati ti ʋaani ɓɔsu Soɓa masagi Ɠadadezɛɛl ʋa. Davide nu waaʋuufelegɔ maazu felegɔ (22.000) ʋaani ti ʋa.
6 Naa ʋoluma, Davide kundiɠiiti seini Damase yooi zu Siili nuiti saama. Siili nuiti ti ɠoloni Davide ʋɛ, ti ɗa mului zala ma. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi.
7 Davide zanu kɔɔɠɔ zɛpɛgiti seɠeni, niiti ti ɠɛni Ɠadadezɛɛl ná-salaʋusuiti zea, é li ga tiye Zeluzalɛme.
8 Davide kɔlu ɓɔi mɔinmɔin seɠeni masagi Ɠadadezɛɛl ná-taa wolaiti su Tiɓate, ta Kun. Suɠoozaai ma, naama ɠɔlu ɓɔigiti ka Salomɔn ti zeɠeni, é ziɛ liɠi wolai ɓɛtɛ la ta kɔlu ɓɔi kpɛdɛgiti, naa ʋɛɛ sɔɔlai mɔtaiti pɛ ba, niiti é ti ɓɛtɛni ga kɔlu ɓɔigi.
9 Siɛgi zu Ɠamate masagi Towu mɛnini da ga Davide vɔnigɛ Soɓa masagi Ɠadadezɛɛl ná-kɔɔʋɛbɛiti pɛ ma,
10 é ná-doun zunui Ɠadolame leʋeni Davide ma ga é tuʋɔ, ta é mama, fala vai zu Ɠadadezɛɛl ʋa, é vɔni ma, tɔɔzei Towu ta Ɠadadezɛɛl ti ɠɛni kɔɔi ɠa nɔ ɠɔ. É sɔɔlai ma zii pɛ teʋeni ɓalaa, niiti ti ɠɛni ga walii, zanugi, ta kɔlu ɓɔigi.
11 Masagi Davide ti veeni Ɠɔoɠɔ GALAGI ʋɛ, eɠɛʋelei é kɛɛni la niina ga walii ta zanugi nii é kulani zɔɔma zii ɠiligiti zea, naati ka ti ga: Edɔme nuiti, Moaɓe nuiti, Amɔn nuiti, Filisiti nuiti, ta Amalɛke nuiti.
12 Seluya ná-doun zunui Aɓisayi vɔnini Edɔme nu waapuugɔ maazu lɔsaʋai (18.000) ma, Kpolo Ʋɛtugi zu.
13 Naa ʋoluma, é kundiɠiiti seini Edɔme yooi zu. Edɔme nuiti pɛ ti ɠoloni Davide ʋɛ. Ɠɔoɠɔ GALAGI ɠɛni fɔnifaamai veezu Davide ʋɛ, ʋɛ kpein é ɠɛni liizu ná ga kɔɔi.
Davide ná-botiɠɛ nu wolaiti daaseigiti
(2 Samiyɛle 8:15-18)
14 Davide masadai ɠɛɛni Izilayɛle pɛ unda, é ɠɛni tukpɔi ɠaaleʋezu ga sɔledai ná-nuɓusɛiti pɛ bɛ.
15 Seluya ná-doun zunui Zoaɓe ɠa é ɠɛni ná-kɔɔʋɛbɛi unda, Ayilude ná-doun zunui Zozafate ɠɛ ga laavaawogi,
16 Ayituɓe ná-doun zunui Sadɔke, ta Aɓiataal ná-doun zunui Aɓimelɛke, ti ɠɛ ga zalaɠa ɠula nuiti, Savɔɠa ɠɛ ga sɛʋɛ ɠɛ nui.
17 Yeɠoyada ná-doun zunui Ɓenaya ɠa é ɠɛni Kelɛte nuiti ta Pelɛte nuiti unda, niiti ti ɠɛni ga masa makɛ nuiti. Davide ná-doun zunuiti ka ti ɠɛni ga ná-seikobaiti.