20
Laɓa zo fai Zoaɓe ʋɛ
(2 Samiyɛle 11:1; 12:26-31)
1 Poluma ɠonagi, yeeɠɛɠalai nii masagiti ta ɗa lii la kɔɔɠɔzuʋɛ, Zoaɓe loni kɔɔʋɛbɛ wolaiti tuɠɔ. Ti Amɔn yooi zuɠoloɠoloni, é ta-laa wolai Laɓa zei kɛlɛ su. Kɛlɛ Davide yɛni Zeluzalɛme. Zoaɓe vɔnini Laɓa ma, é ná ɠoloɠolo.
2 Davide masa bɔɔlɔgi zeɠeni nii é ɠɛni ta-masagi unma. Bɔɔlɔgi naa ɠɛni ga zanu tetelegi, buɲɛgi ɠɛni ga kilo ʋuusaʋagɔ (30), kɔtu zɔngɔ ɓaagi ɠila ge ɠɛni ba. Ti dɔɔni Davide unma. É ɠulani taai naa zu ga ani mɔinmɔin, niiti é ti zoni kɔɔi zu.
3 Nuɓusɛi niiti ti ɠɛni zeini ná, é naa tanigaa ɠɛɛni ga sii ziɛ nuiti, kɔtu zaɠa nuiti, gulu ʋɔ nuiti. Ʋele ɠana Davide kɛɛni la ga nuɓusɛiti pɛ niiti ti ɠɛni Amɔn laaiti su. Naa ʋoluma, Davide ta kɔɔʋɛbɛiti pɛ ti ɠaleni ma Zeluzalɛme.
Kɔɔi niiti ti ɠɔɔni
Filisiti nuiti daalɔɠɔma
(2 Samiyɛle 21:18-22)
4 Kɔɔi taɠili su mɔnɔ Filisiti nuiti daalɔɠɔma Gezɛɛl, Ɠusa nui Siɓekayi Sipayi ʋaani, naa ɓalaa ɠɛni ga Lefa mavofodai ta. Filisiti nuiti gaazu unfe ge zeɠeni naazu.
5 Naa ʋolu kɔɔi taɠili su mɔnɔ Filisiti nuiti daalɔɠɔma, Yayiil ná-doun zunui Ɛlɛɠanan Gate nui Lami ʋaani, Goliate kɛɛɠɛloin, nii ná-kpɛɛin ma wului wɔɔlɔni, eɠɛ seɠe vɛlɛ nui ná-gba gului.
6 Kɔɔi taɠili su mɔnɔ Gate, zunui ta ɠɛni ná, koozaai, zeeɓeɠaiti ta kɔɠɔɓeɠaiti ti ga dɔzitadɔzita, ti pɛ kpɔga ɠɛ ga puufele maazu naani (24). É ɠɛni ga Lafa mavofodai ta tɔ ɓalaa.
7 É malimasakɛɛi leʋeni ga Izilayɛle nuiti. Davide kɛɛɠɛloin Simeya ná-doun zunui Zonatan paani.
8 Lafa mavofodai niiti ti zɔlɔɔni Gate, ti pɛ ti zaani Davide ta ná-kɔɔɠɔ nuiti zeezu.