22
1 Davide ɠɛni ma: «Ʋɛ ɠa Ɠɔoɠɔ GALAGI zei ʋɛlɛi losu ná, ʋɛ ɠa ná ɠɛɛzu ga Izilayɛle ná-gala zalaɠaiti kulazuʋɛ.»
GALA sei ʋɛlɛi lo fai ma ɠɛʋele ɓɛtɛi
2 É devei veeni ga ti wɛɛinti pɛ gaalɛ ba, niiti ti ɠɛni zeini Izilayɛle yooi zu, é naati kakala laani ga ti kɔtui ɠula, ti saɠa GALA sei ʋɛlɛi lo fai zu.
3 Davide kɔlu mɔinmɔin kɛʋele ɓɛtɛni ɓalaa kpogiti kpadɔ vai zu, ta kalagiti, é kɔlu ɓɔigi ma mɔinmɔin gaalɛɛni ba ɓalaa, nii nu la ɓena zoo gaalusu,
4 naa ʋɛɛ sɛdele gulu mɔinmɔingi ʋa, nii Sidɔn nuiti ta Tiil nuiti ti ɠɛni feezu.
5 É ɠisiɛni, é ɠɛ ma: «Dòun zunui Salomɔn ɠa ga zunu loungo, nii é la dɛ faa mɔinmɔin kwɛɛ. Ɠɔoɠɔ GALAGI zei ʋɛlɛi niima maanɛai ga é lo, kɛni tɔɠɔi ɠula zooi pɛ su, tɔɔzei bɔɔlɔ ʋelei ʋa, ta gola ʋa pelei ʋa. Naa ɠa é ba, nà kɛʋele ɓɛtɛi lɔɔzeizu bɛ.» Ʋele ɠana Davide pɛlɛ lo sɔɔlai ma mɔinmɔin gaalɛɛni la ba, é ʋa ʋɛ zaazu.
6 Naa ʋoluma é ná-doin Salomɔn lolini, é devei ve naa ya ga naa GALA sei ʋɛlɛi lo Ɠɔoɠɔ GALAGI ʋɛ, Izilayɛle ná-GALAGI.
7 É ɠɛni naa ma: «Dòun zunu, wɔin ɠɛa mà ga nà ɓɔɠɔi gè GALA sei ʋɛlɛi lo nà-GALAGI, Ɠɔoɠɔ GALAGI ʋɛ dɛbi vai ma.
8 Kɛlɛ Ɠɔoɠɔ GALAGI ɓɔɛni pɔ̀, é ɠɛ mà: ‹È ɲamai wola ʋuuʋɛ, è kɔɔ wolaiti kɔɔʋɛ. Ɲama mɔinmɔingi nii è pua gàazu zooi ma naa maaʋele ma, ɗa laade è ʋa ɠɛ pɛlɛi losu bɛ̀ dɛ̀bi vai ma.
9 Kɛlɛ doun zunu ɠa zɔlɔɔsu è ʋɛ, nii é ʋaazu ɠɛɛzu ga ziilɛi nu. Nà ziilɛigi ɠɛʋele ɓɛtɛ ti yɔɠɔzu ta sili nuiti pɛ, niiti ti maaɠoolii zu. Daaseigi ɠa ɠɛɛzu ga Salomɔn (nii poluʋɛ ga «ziilɛi nui»). Sii ma voloi pɛ su, nà ziilɛigi ta dooɠogi ve Izilayɛle ʋɛ.
10 Tɔ ɠa é ʋaazu pɛlɛi losu bɛ̀, toɠa ɠɛ bɛ̀ ga dòun zunui, gè ɠɛ bɛ ga kɛɛɠɛ. Nà ná-masadai makɛ kpaan Izilayɛle unda, é la ɲiikpiga pɛ.› »
11 Davide ɠɛni ma ʋolu: «Dòun zunu, Ɠɔoɠɔ GALAGI yɛ è ʋa, nii a kɛ è zoo è GALA sei ʋɛlɛi lo ɗa-ƓALAGI ʋɛ, nii é ga Ɠɔoɠɔ GALAGI, eɠɛʋelei tɔ ɓɔɠɔi é bogai la é ʋilɛ è ʋa.
12 Ee, Ɠɔoɠɔ GALAGI soma kae siɛgi zu é è zeizu la Izilayɛle unda, é ɠimalai ta keleɠelegi ve è ʋɛ, nii a kɛ è ɠolo ná-tɔgi ʋɛ, tɛigi é ga ɗa-ƓALAGI.
13 Ɗa ʋaazu liizu luɠɔ, ni ɗa ɠaaɓaana kele è ɠolo Ɠɔoɠɔ GALA ná-deveiti ta ná-tɔgiti bɛ, niiti é ti veeni Moize ya Izilayɛle ʋɛ. Yiilɔɔ, è zɛbɛzeɠe, mina lua, è zasu mina ɓali pa.
14 Wɛlɛ, Ɠɔoɠɔ GALAGI zei ʋɛlɛi lo fai zu, gè ɠaaɓaaʋɛ kele gè kilo miliyɔn saʋagɔ (3.000.000) ɠaalɛ ba zanugi zu, naa ʋɛɛ kilo miliyɔn ʋuusaʋagɔ (30.000.000) ʋa walii zu, ta kɔlu ɓɔigi, naa ʋɛɛ kɔlu ɠitei ʋa, niiti nu la zooga ti ɠaalusu. Gè gului ta kɔtui ɓalaa kɛʋele ɓɛtɛʋɛ, ɗa ta ɓɔ niina naati ba ʋolu.
15 Ɲɛɛliɠi ɠɛ nu mɔinmɔin ka è ɠoba, kɔtu zaɠa nuiti, gului ta kɔtui maaʋɔnɛ nuiti, ta kala nu wolaiti botii pɛ su.
16 Zanugi, walii, kɔlu ɓɔigi, kɔlu ɠitei, naati ta è ya gaalu ge la ba. Tɔ ɠa é ba botii lɔɔzeina, Ɠɔoɠɔ GALAGI yɛ è ʋa kae!»
17 Naa ʋoluma Davide boni Izilayɛle lotuɠɔiti pɛ ma ga ti yeeve ná-doun zunui Salomɔn ʋɛ.
18 É ɠɛni ti ma: «Wa-ƓALAGI, Ɠɔoɠɔ GALAGI ɠa wo ʋa. É dooɠogi vea wo ya wa-you ɠwɛmaʋɛti pɛ, mazɔlɔɔ é zooi zu nuɓusɛ wɔlɔmaiti dɔa nà-zobogi wu. Pɛtɛ naati ta niina Ɠɔoɠɔ GALAGI ta ná-nuɓusɛiti ta-zobogi wu.
19 Naa ɠa é ba, à ɠili Ɠɔoɠɔ GALAGI ʋa ga wo-yii pɛ ta wo-yɛnvui pɛ. À botii lɔɔzeina, wo Ɠɔoɠɔ GALAGI zeizu ɲadegai lo, nii a kɛ wo ʋa ga Ɠɔoɠɔ GALAGI ná-minazeɠe kesui ta ani niiti kpein ti veai Ɠɔoɠɔ GALAGI ʋɛ, wo ti la pɛlɛi naa wu, nii togai Ɠɔoɠɔ GALAGI ʋɛ.»