14
1 Aza Ɠɔoɠɔ GALAGI yiima vai ɠɛɛni, ta nii sɔlegai naa ɠaazu.
2 É wɛɛn ɠalagiti ta-zalaɠa ɠulazuʋɛti pɛ kulani zooi ʋa, naa ʋɛɛ zalaɠa ɠula adaʋɛti ba, é sale ɠɔtuiti kpezeɠele, é sale wuluiti teʋe ga.
3 É ɠɛni Zuda nuiti ma ti ɠili Ɠɔoɠɔ GALAGI ʋa, ti-mɛmɛwolani ta-ƓALAGI, naa ʋolu ti ɠolo tɔgi ma leveiti bɛ.
4 Aza gala kiligiti ta-zalaɠa ɠula adaʋɛti ta gulɔ maku nɛɛnɛ galazuʋɛti pɛ koloɠoloni Zuda laa wolaiti pɛ su. Zooi zeini kpɛ ziilɛi su ná-masa siɛgi zu.
5 É ziilɛi siɛgi naa zeɠeni, é siɠigi lo taa wola mɔinmɔin ma Zuda yooi zu. Naama yeeɠɛɠalai pɛ daawu, nu nɔpɛ ge la ɠɛni kɔɔ ʋɛɛni ba, tɔɔzei Ɠɔoɠɔ GALAGI ɠɛni ɓaazu ná-ziilɛigi maazu.
6 É ɠɛni Zuda nuiti ma: «Ade taa wolai niiti to ʋolu, ti maaɠaku ga kɔɔɠɔ ziɠigiti, naa ʋɛɛ kpogiti ba ti ʋilisu su. Ade naa ɠɛ siɛgi zu adɔnɔ ga dɛ, mazɔlɔɔ ada-ƓALAGI, Ɠɔoɠɔ GALAGI yiimai ɠɛɛ vai ɠa ade ʋilɛgai polu. Ade ɠilia ba kpaan, naa ɠa é kɛa é ziilɛigi vea ade ʋɛ ada-you ɠwɛmaʋɛti pɛ.» Ti tɔɔzeini ga naama ziɠigiti toga, ti ɗa li luɠɔma.
Aza ná-fɔnifaamaiti
7 Kɔɔʋɛbɛi é ɠɛni Aza ya, ti ɠɛni ga nu waaunsaʋagɔ (300.000) Zuda nuiti saama, kpɛɛinti ta kɔɔɠɔ zɛpɛ golaiti ti ti ya, Ɓɛnzamɛn geleiti ti ɠɛ ga nu waaunfelegɔ waaʋuulɔsaʋa (280.000), kɔɔɠɔ zɛpɛ koiti ti ti ya, naa ʋoluma ti zoogai mɛɛin ʋilisu, ti pɛ ti ɠɛni ga kɔɔɠɔ nu ɠɛzɛɠɛzɛgiti.
8 Etiyopi nui Zela lɔɔni kɔɔ lɔɓɔi ʋa daalɔɠɔma ga salaʋusu miliyɔn ɠila (1.000.000), naa ʋɛɛ kɔɔɠɔ wotolo unsaʋagɔ (300) ʋa, é yɛni ʋaazu é zeeli Malesa.
9 Aza liini é daaɠomi, kɔɔɓɔ felegɔiti ti zɛba ti ʋilɛ ɓɔɠɔ laawu kɔɔɠɔ vai ma, Sefata pɛtugi zu, Malesa ɠobaʋɛ.
10 Aza wooɠulani Ɠɔoɠɔ GALAGI ma, ná-GALAGI, é GALA falini ɠani: «Ɠɔoɠɔ GALAGI, é ɠula è ʋolu, nu nɔpɛ ge la zooga é ʋa ɓɔ zeemaalɔi nu ʋa zɛbɛsu nui laalɔɠɔma. Ʋa, è ɓɔ gi ʋa mu, Ɠɔoɠɔ GALAGI, gá-ƓALAGI, mazɔlɔɔ ɗa ɠa gi ʋoluzeizu è ʋa, è-laaseigi ɠa gi liizu la bɛbɛ wolai nii laalɔɠɔma. Ɠɔoɠɔ GALAGI, ɗa ɠa è ga gá-ƓALAGI, mina kɛ nu vului ʋa pilɛ sɔlɔɔ è ma!»
11 Ɠɔoɠɔ GALAGI loɠani Etiyopi nuiti su, Aza ta Zuda nuiti gaazu, ti ʋela.
12 Aza ta ná-kɔɔɓɔgi ti ʋilɛni ti ʋolu, ti ɗa ti ɓɛ eyɛsu ti zeeli Gelaal. Etiyopi nuiti ti wola zaani, gaaɓelasu vɔlɔ ti gila kpalaa ge ɠulani kɔɔi naa zu, mazɔlɔɔ Ɠɔoɠɔ GALAGI ta ná-kɔɔʋɛbɛi ti wola ziɠani ti ʋa. Aza ta ná-nuiti ti ani mɔinmɔin soni kɔɔi naa zu.
13 Tɛi Ɠɔoɠɔ GALAGI maaʋele ma, dualuagi lɔɔni Gelaal ta koba laa wolaiti pɛ. Aza ta ná-kɔɔʋɛbɛi ti valani ti ʋa ga kɔɔi, ti vɔni ti ma, ti naavolo mɔinmɔin seɠeni.
14 Ti valani ɓalaa togani makɛsuʋɛti ba, ti baala mɔinmɔin so ta boli mɔinmɔin, naa ʋɛɛ ɲɔmɛ mɔinmɔin ba. Naa ʋoluma ti ɠaleni ma Zeluzalɛme.