17
Zuda masagi Zozafate
(1 Masagiti 22:41-45)
1 Aza ná-doun zunui Zozafate ɠa é masadai ɠɛɛni potogi zu. É loni kpaan Izilayɛle laalɔɠɔma.
2 É salaʋusu ɓɔgiti seini Zuda laa wolaiti pɛ su, ʋɛti siɠigi ɠɛni náti ma. É salaʋusuiti seizuʋɛti kpɛtɛni zooi zu ná pɛ, naa ʋɛɛ Efelayime laa wolaiti ba niiti kɛɛɠɛ Aza ti zoni.
3 Ɠɔoɠɔ GALAGI ɠɛni Zozafate ʋa, tɔɔzei ná-eteai lɔɔzeizuʋɛ, é ziɛni ga mɛmɛwola Davide ziɛ ʋelei, é la ɠɛni ɠilini Ɓaalegiti ba.
4 Kɛlɛ tɔun é ɠilini mɛmɛwola ná-GALAGI ʋa, é ziɛ ga naa ná-deveiti, naa ɠa Izilayɛle geleiti ti la ɠɛɛni kɛɛzu.
5 Ɠɔoɠɔ GALAGI ɓalaa ge ná-masa fai zapelɔ kpekpe, Zuda nuiti pɛ ti ɓena ʋa pɔ ga vebɛaniiti. É naavoloi ta lɛbiyai zɔlɔɔni ga pooʋama.
6 É yiiɓaani kpaan ga é ziɛ ga naama ʋeleiti niiti Ɠɔoɠɔ GALAGI ti zɛʋɛai, eyɛsu vɔlɔ é zalaɠa ɠula adaʋɛti ta sale wuluiti kula Zuda yooi ʋa.
7 Ná-kona zaʋasiɛi ma masa fai zu, é ná-botiɠɛ nu wolai tanigaa leʋeni Zuda laa wolaiti su: Ɓɛne-Ɠayile, Aɓediyase, Zakali, Netaneyɛle naa ʋɛɛ Misé ʋa, ga naati ti li, ti nuɓusɛiti kala.
8 Levi nui niiti ka ti ɠɛni ti ʋolu: Semaya, Netania, Zeɓadia, Azayɛle, Semilamɔte, Zonatan, Adoniya, Toɓiya, naa ʋɛɛ Tɔɓe-Adɔniya ʋa, ta zalaɠa ɠula nuiti: Elisama ta Yolame.
9 Ti ɠɛni kalagi wosu Zuda yooi zu, Ɠɔoɠɔ GALAGI ná-tɔ sɛʋɛi ɠa é ɠɛni ti ya. Ti leʋeni Zuda laa wolaiti pɛ su, ti ɗa nuɓusɛiti kala.
Zozafate ná-zobogi
10 Ɠɔoɠɔ GALAGI ɠaazuluabai maaʋele ma, Zuda maaɠoolii zu masa zooi tanɔpɛ ge la mɔ ɠɛni kɔɔ ʋɛɛzu Zozafate ʋa.
11 Filisiti nuiti ti ɠɛni ʋaazu pɔ ga vebɛaniiti, naa ʋɛɛ maazoloo ganii ʋa ga walii. Alaɓuiti ɓalaa ti ɠɛni ʋaazu pɔ ga kpeɠa zuaiti: baala sinɛ waadɔfela undɔfela (7.700), naa ʋɛɛ boli zinɛ waadɔfela undɔfela (7.700) ʋa.
12 Zozafate zɛbɛi ta ɠɛni liizu ga ʋiliga su, é kɔɔlaaɠa laa wolaiti kpɛtɛni Zuda yooi zu, ta ani makɛ taa wolaiti.
13 É ani mɔinmɔin makɛni Zuda laa wolaiti su, kɔɔɠɔ nu ɠɛzɛɠɛzɛgiti gaalɛai ba Zeluzalɛme.
14 Naati gaaɠwɛɛni su ga ta-ʋɛlɛyeɠeiti sei ʋelei kpasu. Zuda geleiti saama, wɛlɛ niiti ka ti ɠɛni ga totuɠɔiti nu waagilagilagi unda. Kundiɠii Adana ɠɛni kɔɔɠɔ nu ɠɛzɛɠɛzɛ waaunsaʋagɔ (300.000) levezu.
15 Zɔi é ɠɛni koba, kundiɠii Yoɠanan ɠɛni kɔɔɠɔ nu ɠɛzɛɠɛzɛ waaunfelegɔ puulɔsaʋa (280.000) levezu.
16 Zɔi é ɠɛni naa ɓalaa koba, Zikili ná-doun zunui Amasia, nii tɔ ɓɔɠɔi é veeni Ɠɔoɠɔ GALAGI ʋɛ, é ɠɛni kɔɔɠɔ nu ɠɛzɛɠɛzɛ waaunfelegɔ (200.000) levezu.
17 Ɓɛnzamɛn geleiti saama, niiti ka ti ɠɛni ná: kɔɔɠuluɓa wolai Eliada, é ɠɛni kɔɔɠɔ nu waaunfelegɔ (200.000) levezu, mɛɛinti ta kɔɔɠɔ zɛpɛgiti ti ti ya.
18 Zɔi é ɠɛni tɔun koba, Yeɠozaɓade, naa ɠɛni kɔɔɠɔ nu waaungila waaʋuulɔsaʋa (180.000) levezu, sɔɔlaiti ti ti ya kɔɔɠɔ vai zu.
19 Niima nuiti pɛ ti ɠɛni botii ɠɛɛzu masagi ʋɛ, naa ʋɛɛ niina zɔiti ba niiti masagi ti ʋuuni kɔɔlaaɠaiti su, taa wolaiti su, niiti siɠigi ti ma Zuda yooi ɠɔlɔkɔlɔma ná pɛ.