3
GALA sei ʋɛlɛi lo fai
(1 Masagiti 6:1-38)
1 Masagi Salomɔn Ɠɔoɠɔ GALAGI zei ʋɛlɛi lo fai lɔɔzeini Zeluzalɛme, Moliya gizei ma, ʋɛ Ɠɔoɠɔ GALAGI ɠulani ná kɛlɛma kɛɛɠɛ Davide ʋɛ. É toni ʋɛ kɛɛɠɛ yiimazeɠeni ga ná, Yeɓuse nui Wɔɔlenan ná-molo loɠazuʋɛ.
2 Salomɔn GALA sei ʋɛlɛi lo fai lɔɔzeini ná-kona naanisiɛi ma masadai zu, naama ɠonagi ma alugi velesiɛi ma voloi velesiɛi.
3 Pɛlɛi nii Salomɔn toni GALA bɛ sɔligi ɠɛni ga mɛtɛlɛ ʋuusaʋagɔ (30), kogi ɠɛ ga mɛtɛlɛ puugɔ.
4 Tɛɛ wosuʋɛ ɠɛni GALA sei ʋɛlɛi ɠaazu ʋelei, sakpai ɠɛni ga mɛtɛlɛ puugɔ, é zoloo pɛlɛi ɠogi ma, gaazɔligi ɠɛni ga mɛtɛlɛ ʋuulɔzita (60). Salomɔn koozuʋɛ ziɛni ga zanu kitei.
5 Pɛlɛ ɠoozu wolai ziɛni ga sipɛlɛ gului, é naa ziɛ ga zanu pagɔi, ti pɛlupɛlu ga dɔɔ laai ʋaaɠulabai ta yɔlɔɠɔ goiti baaɠulabai.
6 Ti GALA sei ʋɛlɛi ʋɔnɛni ga kɔtu zɔngɔ ɓaaɓaagiti, zanugi ɠɛni ga Palivayime zanugi.
7 GALA sei ʋɛlɛi ná pɛ ge ziɛni ga zanugi: pɛlɛ ɠoozu wolai, kpɛdɛgiti, kpofalagi, teʋesuiti, kpogiti. Naa ʋoluma, Salomɔn teʋesuiti koozuʋɛti pɛlupɛluni ga seeluɓɛinti baaɠulabaiti.
Ada ɲadega wolai
8 É koozuʋɛ ɓɛtɛni, naa ɠɛ ga ada ɲadega wolai, sakpai ɠɛni ga mɛtɛlɛ puugɔ, é zoloo GALA sei ʋɛlɛi ɠogi ma, kogi ɓalaa ɠɛni ga mɛtɛlɛ puugɔ, kilo waaʋuufelegɔ (20.000) ɠa é feeni zanu pagɔi zu ga ti siɛ naati pɛ ma.
9 Zanu gaazoɓagiti buɲɛgi ɠɛni ga galamu undɔzita (600). É geezu ʋɛlɛiti ɓalaa siɛni ga zanugi.
10 Ti seeluɓɛn felegɔ ɓɛtɛni ada ɲadega wolai vaa ma, ti zanugi ziɛ ti ma.
11 Ti-ɠoʋegi zɔligi ɠɛni ga mɛtɛlɛ puugɔ, ma mɔungi ɠoʋe gilagi ɠɛni ga mɛtɛlɛ felegɔ ta tukpɛ (2,5), é ɗa zei pɛlɛi ʋa, zɔi ɓalaa ɠooza ga mɛtɛlɛ felegɔ ta tukpɛ (2,5), é ɗa zei bɔɔlai ɠoʋe gilagi ʋa.
12 Bɔɔlai naa ɓalaa ɠoʋe gilagi zuviegai, é ga mɛtɛlɛ felegɔ ta tukpɛ (2,5), é ɗa zei pɛlɛi ʋa zɔɔla ʋelei, koʋegi ɠilagi zɔi ɓalaa ɗa zei bɔɔlai nɔnɔi ʋa.
13 Naa ɠa é kɛɛni seeluɓɛn felegɔi naati koʋegiti sɔligi ɠɛni ga mɛtɛlɛ puugɔ. Ti felegɔ ti ɠɛni loni ti-ɠɔɠɔiti ga, ti ɗa wɛlɛ ga pɛlɛ ɠoozu ʋelei.
14 Ti kwɛpele seɠezuɠoozagi vɛlɛni, ti pɔnɛ ga ma ɓiinii, ta ma ɓɔigi, ta ma ɓɔi sɔsɔgi, ta geze ʋagɔi, ti suʋu ga seeluɓɛinti baaɠulabai.
Kpɛdɛgiti ta zalaɠa ɠulazuʋɛ
ti ɓɛtɛai ga kɔlu ɓɔigi
(1 Masagiti 7:14-22)
15 GALA sei ʋɛlɛi ɠaazu ʋelei, é kpɛdɛ felegɔ ɓɛtɛni ga kɔlu ɓɔigi, ti ɠooza ga mɛtɛlɛ puugɔ maazu lɔfela (17), é seiga felegɔ ɓɛtɛni kpɛdɛgiti faa ma, ti ɠilagilagi zɔligi ɠɛni ga mɛtɛlɛ felegɔ ta tukpɛ (2,5).
16 É kɔlu ansa ʋɛlɛʋɛlɛgiti kpɛtɛni, ti ʋilipiligai ɓɔɠɔ zu eɠɛ yɔlɔɠɔ, ti naati pilɛ kpɛdɛgiti ungaʋɛ. Gelenade gulu waai ʋaaɠulabaiti ungila (100) é ɠɛni zɛlɛni kɔlu yɔlɔɠɔi naati ba.
17 É kpɛdɛ felegɔiti pilɛni pɛlɛla wolazuʋɛ ɠakalaʋɛ, nu yeezazu ʋelei ta nu ɠɔʋɛzu ʋelei. É gilagi laasei pɛɛni ga Yakin (nii poluʋɛ ga «toɠa sɛbɛlɔɔi wo su»), é felesiɛi laasei pɛɛ ga Ɓoaze (nii poluʋɛ ga «zɛbɛi ɠa tɔun su»).