33
Zuda masagi Manasé
(2 Masagiti 21:1-18)
1 Manasé ná-konagi ɠɛni ga puugɔ maazu felegɔ (12), siɛgi zu é zeini la ga masagi. Kona ʋuulɔɔlugɔ maazu lɔɔlugɔ (55) ɠa é kɛɛni masadai zu Zeluzalɛme.
2 É Ɠɔoɠɔ GALAGI wanama vai ɠɛɛni, é ʋilɛ kɔzɔba vaiti polu niiti zii ɠiligiti ti ɠɛni kɛɛzu, niiti Ɠɔoɠɔ GALAGI ti ɓɛɛni Izilayɛle nuiti tuɠɔ.
3 É zalaɠa ɠula adaʋɛti toni ʋolu, niiti kɛɛɠɛ Ezekiase ti ɠoloɠoloni, é Ɓaale ná-zalaɠa ɠulazuʋɛti kpɛtɛ, é sale wului ɓadɔ, é nɔkɔ aniiti pɛ bu ti volozu geeɠɔlɔgi zu, é ti lɛbi.
4 É zii ɠiligiti ta-zalaɠa ɠulazuʋɛti kpɛtɛ Ɠɔoɠɔ GALAGI zei ʋɛlɛi wu Zeluzalɛme, ʋɛ Ɠɔoɠɔ GALAGI boni ga ná ɠa daaseigi ɠa ɠɛ wosu ná ɠɔoɠɔ.
5 É zalaɠa ɠulazuʋɛti kpɛtɛni foloi ta alugi ta somideɠaiti bɛ Ɠɔoɠɔ GALAGI zei ʋɛlɛi ma ɠoi felegɔiti su.
6 É ná-doun zunuiti galani abui zu ga zalaɠai Ɓɛne-Ɠinɔme ʋɛtugi zu, é ɗa adɔi ɓɛ é ʋilɛ ʋelela ʋele vaiti ba, é ɗa zoɠo vai ta mɔta vai ma zii pɛ kɛ. É gɔvɛ laawooleʋe nuiti seini, ti ɗa ʋelela ʋele vaiti bo. É ɠɛni liizu nɔ ga Ɠɔoɠɔ GALAGI wanama vai ɠɛa, nii a kɛ é naa yiiɠaawana.
7 Kɔɔɠɔ ganigi é kpɛtɛni, é naa lɛɛni GALA sei ʋɛlɛi wu, ʋɛ GALA ge ɓɔɛni é lo ná ʋa Davide ta ná-doun zunui Salomɔn ʋɔ, é ɠɛ ti ma: «Pɛlɛi nii, ta Zeluzalɛme ɠa gè yiimazeɠeai ga náti Izilayɛle wolodamaiti pɛ saama ga dàaseigi ɗa wo ná eyɛsu ɠɔ.
8 Gè la mɔ Izilayɛle nuiti pilɛga ɠɔɠɔma pɛ, ti maa ʋa ɠooza naama yooi ʋa gè feai ti-mɛmɛwolani bɛ, ni ta naati kɛɛna nɔ nii kpein gè boga ti ma, é zoloo tɔgi, faa laa ʋelei ta devei naati ma nii nà-botiɠɛ nui Moize feai ti ya.»
9 Kɛlɛ Manasé Zuda ta Zeluzalɛme nuiti kakani, ti faa ɲɔi ɠɛ é leʋe naama yooiti ba Ɠɔoɠɔ GALAGI ti ɠoloɠoloni Izilayɛle nuiti tuɠɔ.
10 Ɠɔoɠɔ GALAGI kpaazaɠaiti boni Manasé ma ta ná-nuɓusɛiti, kɛlɛ ti la ɠɛni woiloni naama wooiti ma.
GALA ná-ziiɠaawanai
11 Ɠɔoɠɔ GALAGI ʋaani ga Asiili masagi ná-kɔɔɠuluɓaiti ti laalɔɠɔma, ti Manasé zo. Ti kɔlu kalamaiti pilini sokpai ʋa, ti gili ga kɔlu ɓɔi yɔlɔɠɔiti, ti lii la Ɓaɓilɔne.
12 Kɛai ma kidaaʋiligi zu, é wooɠulani Ɠɔoɠɔ GALAGI ma, ná-GALAGI, é ɓɔɠɔmaayeini ɠɛzɛɠɛzɛ mɛmɛwolani ta-ƓALAGI ɠaazu.
13 É maanɛɛnɛi woni, Ɠɔoɠɔ GALAGI ma ge gooɠaaʋote, é woiloni ná-maanɛɛnɛ wooi ma, é gaaɠale ma Zeluzalɛme ná-masadai zu. Naa maaʋele ma Manasé gaaɠaani ga Ɠɔoɠɔ GALAGI ɠila kpe nɔ ɠa é ga GALAGI.
14 Naama vaiti teʋega ʋoluma, é siɠigi loni Davide ná-taai ʋoluʋɛ, siɠigi naa leʋeni ga Giyon ɗɛungiti pɔ pelei, é la Sedelɔn ʋɛtugi ɠomaʋɛ, eyɛsu é zeeli Kale Ziɠidaʋɛ, é leʋe Wofɛle ɠobaʋɛ. Manasé gola ɠaaɠoozani. É salaʋusu ɠundiɠiiti seini ɓalaa Zuda laa wolaiti pɛ su, ʋɛti siɠigi náti ma.
15 É wɛɛn ɠalagiti ta vololibaiti kulani Ɠɔoɠɔ GALAGI zei ʋɛlɛi wu, naa ʋɛɛ zalaɠa ɠulazuʋɛti ba niiti é ti loni GALA sei ʋɛlɛi ma ɠizei ma ta Zeluzalɛme taa ɠoozuʋɛ. Ti naati pɛ pilini ya taa ʋoluʋɛ poun.
16 É Ɠɔoɠɔ GALAGI ná-zalaɠa ɠulazuʋɛ ɓɛtɛni ʋolu. Ti tɔɔzei ga ti ɗa ziilɛi zalaɠaiti ta faanɛɛ wuuɠwɛɛ zalaɠaiti kula. É devei veeni Zuda nuiti zea ga ti ɗa lɛbiyai ve Ɠɔoɠɔ GALAGI ʋɛ, Izilayɛle ná-GALAGI.
17 Kɛlɛ nuɓusɛi ɠɛni ba nɔ é ɗa zalaɠaiti kula zalaɠa ɠula adaʋɛti, kɛlɛ Ɠɔoɠɔ GALAGI nɔ ʋɛ, ta-ƓALAGI.
18 Manasé ná-kɛɛwotii mɔtaiti, maanɛɛnɛ wooi nii é daazeelini ná-GALAGI ma, naa ʋɛɛ keela wooiti ba niiti GALA goo wo nuiti ti boni ma Ɠɔoɠɔ GALAGI lɔɠɔi zu, Izilayɛle ná-GALAGI, naati sɛʋɛʋɛ Izilayɛle masagiti ta-ɠɛɛwoti zɛʋɛi zu.
19 Ná-maanɛɛnɛi, ta ʋelei GALA ge gooɠaaʋoteni, ná-kotoiti ta wooʋaladai nii é kɛɛni ga GALA, ʋɛti é zalaɠa ɠula adaʋɛti toni ná, mináti daaseigiti ʋɛ é sale wuluiti kpadɔni ná ta vololibaiti, aisa é ʋa ɓɔɠɔmaayei, naati sɛʋɛʋɛ Wozai ná-kɛɛwoti zɛʋɛi zu.
20 Manasé zaani. Ti maaɠuluni ná-zooi ma. Ná-doun zunui Amon ɠa é masadai ɠɛɛni potogi zu.
Zuda masagi Amon
(2 Masagiti 21:19-26)
21 Amon ná-konagi ɠɛni ga puufele maazu felegɔ (22), siɛgi zu é zeini la ga masagi. Kona felegɔ ɠa é kɛɛni masadai zu Zeluzalɛme.
22 Amon Ɠɔoɠɔ GALAGI wanama vai ɠɛɛni, eɠɛʋelei nɔ kɛɛɠɛ Manasé kɛɛni la, é ɠɛni zalaɠaiti kulazu kɔɔɠɔ ganigiti bɛ niiti kɛɛɠɛ ti ɓɛtɛni, é ɗa ti lɛbi.
23 É la ɠɛni ɓɔɠɔmaayeini pɛ Ɠɔoɠɔ GALAGI ʋɛ, ʋelei kɛɛɠɛ Manasé kɛɛni la, kɛlɛ tɔun é ɓɔɠɔ ɠɛɛni ga sɔba nu wolai.
24 Ná-botiɠɛ nu wolaiti ti yaavai ɠilini ma, ti paa ná-masa pɛlɛi wu.
25 Kɛlɛ zooi zu nuɓusɛiti ti naama nuiti pɛ paani, niiti ti yaavai ɠilini masagi Amon ma. Ti ná-doun zunui Zoziase zeini ga masagi potogi zu.