5
GALA sei ʋɛlɛi laalao fai
(1 Masagiti 8:1-13)
1 Salomɔn ɓegai ma ga Ɠɔoɠɔ GALAGI zei ʋɛlɛi lo fai ma wotii pɛ kɛ tɛtɛ, é devei veeni ga ti ʋa ga sɔɔlaiti pɛ kɛɛɠɛ Davide ti veeni Ɠɔoɠɔ GALAGI ʋɛ: walii, zanugi, naa ʋɛɛ sɔɔlai ma zii pɛ ba, é ti pɛ pu GALA sei ʋɛlɛi ma naavolo makɛsuʋɛ.
2 Naama ziɛgi zu masagi Salomɔn Izilayɛle ɠɛwolaiti pɛ ta bolodama ɠundiɠiiti, ta pɛlɛyeɠeiti gaazuʋɛti pɛ tolini ga ti ɠaalɛ ba Zeluzalɛme, ga ti Ɠɔoɠɔ GALAGI ná-minazeɠe kesui zeɠe Davide ná-taa wolai zu ná laa ga Siyɔn, ti li la Ɠɔoɠɔ GALAGI zei ʋɛlɛi ma ɠoizuʋɛ.
3 Izilayɛle nuiti kpein ti ɠaalɛɛni ba masagi ɠoba fɛti ɠula vai ma, nii a ɗa ɠɛ alugi lɔfelasiɛi ma.
4 Izilayɛle ɠundiɠiiti pɛ ti ʋaani, Levi nuiti tosuʋɛ ɠɛni ga ti minazeɠe kesui zeɠe.
5 Levi nuiti ti ga zalaɠa ɠula nuiti ti minazeɠe kesui zeɠeni, ta GALA daaɠomi seɠe ʋɛlɛi, naa ʋɛɛ bu zɔɔlai ɲadegaiti pɛ ba.
6 Masagi Salomɔn ta Izilayɛle nuɓusɛiti pɛ, niiti ti ɠaalɛɛni ba koba, naati ti ɠɛni minazeɠe kesui ɠakalaʋɛ, ti ɗa togani ʋɛlɛʋɛlɛgiti ta ma ɓaazagi ma mɔinmɔin kula ga zalaɠai, nu la ɓena tie kwɛɛ.
7 Zalaɠa ɠula nuiti ti Ɠɔoɠɔ GALAGI ná-minazeɠe kesui laani, ʋɛ ná ɓɛtɛai bɛ, ʋoluzu ʋele ʋɛlɛ ɠoozuʋɛ GALA sei ʋɛlɛ wu, ná laa ga ada ɲadega wolai, seeluɓɛinti koʋegiti bu.
8 Tɔɔzei seeluɓɛinti koʋegiti suviega ɠɛni de minazeɠe kesui zeizuʋɛ maazu, nii a kɛ ti ʋɛɛ kesui ta seɠe wulu zɔkpɔiti ma.
9 Ʋelei ti gulu zɔkpɔi naati koozani la, nu ɠɛni yɛsu ada ɲadegai wu, ʋɛ ná ada ɲadega wolai ɠakalaʋɛ, nu ɗa ti-zokpaiti ka, kɛlɛ nu la ɠɛni ti ɠaazu ga etea ʋelei. Miná ɠa ti yɛgai ná eyɛsu za.
10 Ani ɠili ge la ɠɛni minazeɠe kesui zu, kɛni kɔtu ɠokolo felegɔiti Moize ti laani su Wolɛɓe, siɛgi zu Ɠɔoɠɔ GALAGI minazeɠegi ɠɛni la ti yɔɠɔzu ta Izilayɛle nuiti, ti ɠulazuʋɛ Ezipete.
11 Zalaɠa ɠula nuiti ti ɠulani ada ɲadega wolai. Zalaɠa ɠula nui niiti kpein ti ɠɛni ná, ti ɓɔɠɔ ɲadeni ga ʋelei ta ɗa kɛɛ la pɔlɔma, ti la kɛɛni nɔ ga ta-ɓɔgiti niiti ti ti zu naati teʋe pelei.
12 Levi nui niiti kpein ti ɠɛni ga gɛingɛin gani gɛin nuiti, naati ti ɠɛni loni zalaɠa ɠulazuʋɛ ɠobaʋɛ, folo ɠulazu ʋelei, kɔtɛgiti ti ti ya, naa ʋɛɛ kɔnigiti ta papaiti ba. Zɔiti ti ɠɛni ná, naati ti ɠɛni ga: Azafe, Ɠeman, Yedutun, naa ʋɛɛ ti-loun zunuiti ta ti-ɠɛɛlointi ba, ti pɛ ti maaɠiliai ga geze ʋagɔ zeɠei. Zalaɠa ɠula nu ungila puufelegɔ (120) ɠɛni loni ti ɠoba, ti ɗa puʋugiti fɛ.
13 Puʋu fɛɛ nuiti ta guye loo nuiti ti ɠɛni liizu la ʋɔɔma, ti goo ɓɔsu, nii a kɛ ti Ɠɔoɠɔ GALAGI lɛbi ta ti maamusɛ. Siɛgi zu gɛingɛin gani gɛin nuiti ta la puʋugiti ta kɔtɛgiti gooɠulana la, naa ʋɛɛ gɛingɛin gani zɔiti ba, ti ɠɛni Ɠɔoɠɔ GALAGI maamusɛzu, ti ɗa ɠɛ ma:
«Mazɔlɔɔ pagɛ,
mazɔlɔɔ ná-wooɠɛɠiladai ɠa yɛsu ná ɠɔ!»
Naama yeeɠɛɠalai nɔ zu, Ɠɔoɠɔ GALAGI zei ʋɛlɛi wuulaaveni kpekpe ga duului.
14 Tonaɓiingi maaʋele ma, zalaɠa ɠula nuiti ti la ɠɛni zooni ti ʋa yɛ ná, ti ʋa ta-wotii ɠɛ, mazɔlɔɔ Ɠɔoɠɔ GALAGI ná-lɛbiyai GALA sei ʋɛlɛi wuulaaveni.