13
Ɠolo zobobɛ nuiti bɛ
1 Ɛsɛ pɛ ge ɠolo zobobɛ nu wolaiti bɛ, mazɔlɔɔ zoboda nɔpɛ ge la ná, nii é la zeɠeni GALA pɔ. Zobobɛ nuiti ti ná, GALA ka é naati seiɗa.
2 Naa ɠa é ba, zɔi nɔpɛ a wuzeɠe zobobɛ nui laalɔɠɔma, é wuzeɠea GALA ná-devei laalɔɠɔma, é seiɗai. Niiti ta wuzeɠe daalɔɠɔma, naati ta ɓɔɠɔ ʋeelalazu.
3 Mazɔlɔɔ kundiɠiiti ti la zeini faa ʋagɔ ɠɛ nu laalɔɠɔma, kɛni faa ɲɔu ɠɛ nui. Ɗa pɔ ga è mina lua zobobɛ nui ʋa, kɛlɛ? Faa ʋagɔi ɠɛ, toɠa è maamusɛ naazu.
4 Mazɔlɔɔ toɠa ga GALA ná-botiɠɛ nui è letemazu, faa ʋagɔi ɠɛɛ vai zu. Kɛlɛ ni ɗa faa ɲɔi ɠɛɛna, lua! Mazɔlɔɔ é la boɠa zɔkpɔi zeɠezu wafuun. Toɠa ga GALA ná-botiɠɛ nui, é ɗa potokulai ɠɛ, é faa ɲɔu ɠɛ nui nɔnɔ ma zalai ve zea.
5 Naa ɠa é ba, fizɔgɛ ga nu ɠolo zobobɛ nuiti bɛ, é la nɔ ga nii a kɛ GALA ná-ziiɠaawanai ʋoola è ʋa, kɛlɛ ɗa-ɠisiɛi vaa zu ɓalaa.
6 Naa ɠa é kɛɛzu wo muluiti kulazu. Mazɔlɔɔ zobobɛ nuiti ta ga GALA ná-botiɠɛ nuiti, nii a kɛ ti niima vaiti kɛ ga kɛʋele.
7 À naa ve ɛsɛ zea, nii maanɛai wo fe zea. À mului ve naa ya, nii maanɛai wo mului ve zea. À aniiti ma mului ve naa ya, nii maanɛai wo aniiti ma mului ve zea. À unfemai ve naa ʋɛ, nii maanɛai unfemai ve bɛ. À naa wɔɔlɔ, nii maanɛai wo bɔɔlɔ.
Seiɲɔɠɔ nɛɛbɛi
8 Nu nɔpɛ ná-kuye mina yɛ wo ma, kɛni nɛɛbɛi nɔ a ɠɛ wo yɔɠɔzu ga kuyei wo ɠilagilagiti. Mazɔlɔɔ zɔi a zɔiti nɛɛna ʋɛ, naa ɠoloa tɔgi ʋɛ mɛtu.
9 Mazɔlɔɔ tɔgiti ti ɠɛɛzu ma: «Mina wɛɛnziɛ bo, mina nu ʋaa, mina unma wo, mina gaazuɠulapɔ ɠɛ,» naati ta tɔgi taɠiligaani, ta deve ɠila kpegi nii zu, é ɠɛɛzu ma: «È-zeiɲɔɠɔi nɛɛ ʋɛ, eɠɛ ɗa ɓɔɠɔi.»
10 Nɛɛbɛi la faa ɲɔu ɠɛa ga seiɲɔɠɔi, naa ɠa é ba, nɛɛbɛi ɠa é ga tɔgi laazeeliai.
Foloi maaɓuɠaa
11 Naa pɛ poluma, wo suɠwɛɛ yeeɠɛɠalai ade su, wo un geei ɠa wo ɠula wa-ɲiimɛnii zu. Kizo fai maaɓuɠaa de ʋa niizu, é leʋe naama ziɛgi zu ʋa, de ɠidaaleʋeni la.
12 Gee maalia, geelaa ɠana lao. Naa ɠa é ba, ade ɠɛlɛ kɛɛwoti ɲɔiti ba, ti ɠɛɛzu kpidii zu. Ade wozakalagi nɔnɔ ma ɠɔɔɠɔ zɔɔlaiti seɠe.
13 Ade ziɛ fɔɔn letema, é zoloo wozakalagi ná-fai ma. Ade dama ga ziimaɠɛɛ lateʋegai, ta dɔɔzodai, ta wɛɛnziɛgi, ta ɓaaɠulama vai, ta kpɔɛ vaiti, ta tolo ɲɔi.
14 Kɛlɛ à Maliɠii Yesu Kilista loo ɠɔba, wo mina mɔ yiizoolɛ ga kpusɛi yiimaiti, wo ʋa ná-gaazuɠulapɔ vaiti kɛ.