GALA Daawoo Zɛʋɛi Wɔlɔme 7

Kidaaleʋe nuiti ti viega,
ti ɠula tɔgi wu

1 Nà ɓɔɛzu naati pɔ, niiti ti tɔgi ɠwɛɛ ga pagɔ. Kɛ̀ɛleaiti, wo la kwɛni ɓaa, ga tɔgi ɠa zeini nui unda, ni nɔ dɛ toɠa vulua? 2 Zenɔ ɠana é la, anzanui fuluai, giliʋɛ sinigi ʋa tɔgi ya, ni naa ɠa dɛ vulua. Kɛlɛ sinigi a zaana, é viega, é ɠula sinigi ná-tɔgi wu. 3 Naa ɠa é ba, ni sinigi la dɛ zaani, a zeina zunu ɠili bɛ, toɠa loli ga wɛɛnziɛ anzanui. Kɛlɛ ni sinigi a zaana, é viega, é la mɔ naa ná-tɔgi wu, toɠa zoo naazu é ɠɛ ga zunu ɠili anza, é la loliga ga wɛɛnziɛ anzanu.

4 Zekana é la wo letema, kɛ̀ɛleaiti. Wo zaa, wo ɓeteʋe tɔgi ʋa, wo ɠili vai zu Kilista ɓusɛi ʋa, ga wo ɠɛ ga taɠili nɔnɔ. Niizu wa niina ga naa nɔnɔiti, nii é zaani, é wuzeɠe, é ɠula saai ya, naa ɠa a kɛ, de kɛɛwotiiti kɛ, kulanuma ɠɛ ba GALA bɛ. 5 Mazɔlɔɔ siɛgi zu de ɠɛni zɛnvui wosu la ga kpusɛi yiimai, kotoi ɠɛɛ wɔin nii tɔgi ɠɛni de liizu ma, naa ɠɛni botii ɠɛɛzu de-ɓusɛi ʋaalobazuʋɛ pɛ su, ma ɠulanumai ɠɛ ga é de lɔ saai zu. 6 Kɛlɛ niizu, de viega, de ɠula tɔgi wu, mazɔlɔɔ de zaa, de ɠula naa ya, nii é de zoni ga duɔi. Naa ma, da zoo niina de botii ɠɛ GALA bɛ ga pagɔ, Zɛnvu Ɲadegai ná-zobogi wu, naa la mɔ ɠɛɛzu kɛʋele wɔlɔmai ma, ga tɔ sɛʋɛi ná-zobogi wu.

Tɔgi ta kotoi

7 Lee ɠa da bo mu naazu? Tɔgi ɠa ga koto? Ɓa-o, naa li poun! Kɛlɛ gè la ɠɛni kotoi ɠwɛɛga, ni tɔgi laade. Gè la ɠɛni gaazuɠulapɔi ɠwɛɛga, ni tɔgi la ɠɛni ɠɛɛni ma: «Mina gaazuɠulapɔ ɠɛ.» 8 Kɛlɛ kotoi yeeɠɛɠalai zɔlɔɔni ga devei maaʋele, é gaazuɠulapɔ ɲɔi ma zii pɛ pu nɔ̀un su. Mazɔlɔɔ ni tɔ ge la ná, koto la ná. 9 Tɔ ge la ɠɛni dɛ ná, nɔ̀un gè ɠɛni vulua názuʋɛ. Kɛlɛ devei ʋaai ma, kotoi yɛnvuni, 10 nɔ̀un gè zaani. Naa ɠa é ba, devei nii mugi a la lo nu luɠɔ zɛnvui wo fai zu, naa ɠɛɛʋɛ nɔ̀un bɛ ga saai. 11 Mazɔlɔɔ kotoi yeeɠɛɠalai zɔlɔɔni ga devei maaʋele, é yàavani, é pàa ga devei naa nɔ maaʋele.

12 Naa ɠa é ba, tɔgi ɲadegɛ, devei ɲadegɛ, é zɔle, é ʋa. 13 Nii pagai, naa ɠɛa nɔ̀un bɛ ga saai ma zaɓui ɓaa? Ɓa-o, naa li poun! Kotoi ɠa kɛai ga ma zaɓui. Ʋele ɠana é ɓɔɠɔ ɠɛʋele ɠiteɠitegi ɠulaai la kɛlɛma: Nii pagai, naa ɠa é seɠeai, é kɛ ga nɔ̀un saa zaɓui. Ʋele ɠana kotoi ɠɛa la, devei maaʋele ma, ga kotoi ɲɔuɗai gola.

Nui kotoi zeini unda

14 De kwɛni, de ɠɛ, tɔgi ɠa ga zɛnvu zu vaa, kɛlɛ nɔ̀un nà ga kpusɛ zu nui, zɛbɛ la bà, pɔ̀diʋɛ ga duɔi kotoi ma. 15 Mazɔlɔɔ nii gè kɛɛzu, gè la naa ɠaaɠaazu. Nii gè pɔ ga gè kɛ, gè la naa ɠɛɛzu. Nii mugi gè wɔinzeɠezu, naa ɠa gè kɛɛzu. 16 Ni nii gè la pɔ, gè ʋa kɛ, nà naa ɠɛɛna, gè zolooga ma naazu ga tɔgi ʋagɛ. 17 Naazu nà la mɔ de, gè ʋa ɠɛ naa ɠɛɛzu, kɛlɛ kɛni kotoi é zeini zìimaʋɛ. 18 Gè kwɛni ga faa ʋagɔ la zeini zìimaʋɛ, kpùsɛi zu. Mazɔlɔɔ wɔin ɠa mà ga gè faa ʋagɔi ɠɛ, kɛlɛ ma zobo ge la bɛ̀, gè ʋa kɛ. 19 Mazɔlɔɔ faa ʋagɔi gè pɔ ga gè kɛ, gè la naa ɠɛɛzu, kɛlɛ faa ɲɔi mugi wɔin la mà ga gè kɛ, naa ɠa gè kɛɛzu. 20 Ni nii gè la pɔ ga gè ʋa kɛ, nà naa ɠɛɛzu, nà la mɔ ga naa gè ʋa ɠɛ kɛɛzu, kɛni kotoi é zeini zìimaʋɛ, naa ʋe.

21 Nà kaazu naazu ga toɠa mà eɠɛ tɔ ga siɛgi zu gè pɔ ga gè faa ʋagɔi ɠɛ la, faa ɲɔi ɠa ɠatasu nɔ̀un ba. 22 Mazɔlɔɔ GALA ná-tɔgi nɛɛʋɛ bɛ̀ zìimaʋɛ, 23 kɛlɛ nà tɔgi taɠili kaazu ɓusɛi ʋaalobazuʋɛti, nii é nà-kisiɛi ná-tɔgi zakpesu. Naa ɠa kɛ̀ɛzu ga kotoi ná-duɔi, é kpùsɛi ʋaalobazuʋɛti. 24 Ee, màawɔinɗa! Ɓɛ ɠa a fìe, é kùla kpusɛi nii ya, é dɔ̀ɔzu saai zu? 25 Mamagi ɠa GALA bɛ: Toɠa naa ɠɛ de-Maliɠii Yesu Kilista zaalai zu!

Naa ɠa é ba, nà ga GALA ná-tɔgi ma luɔi nà-kisiɛi zu, kɛlɛ nà ga kotoi ná-tɔgi ma luɔi kpùsɛi zu.