Lute
Ná-Sɛʋɛi
Lute ná-sɛʋɛi lɔɔzei ʋelei
Ɓɛ ɠa é ga sɛʋɛi nii ɠɛ nui: Nu la kwɛɛ.
Sɛʋɛi nii zu ɓɔɛ ma ungi: GALA ná-zaalai ta ná-gaazumaawɔinɠai ɠa naati kɔnɔ fe, niiti ti ɠigi losu ba.
Sɛʋɛi nii ɠɛ ziɛgi: Kona waagila kona ungila (1 100) siɛgi zu, Yesu Kilista zɔlɔɔ siɛgi yeeluɠɔ.
Lute ná-fai ziɛ ʋelei ɠa de ɠigi loozu tukpɔɠaaleʋe nuiti ta-ziɛgi zu, ti ɠɛai ma Izelayɛle nuɓusɛiti untuɠɔ.
Sɛʋɛi nii ɠɛ ungi ta ɠa ga, é dɛɛ eɠɛʋelei anzanu ɠili ge ʋaani la, é zei GALA ná-nuɓusɛiti saama. Naa maaʋele ma, sɛʋɛi nii ɠaa: Lute ná-wooɠɛɠiladai maaɓakpasu, nii nu ɠa ʋokɔɠɔ ma, é lo sinigi ná-pɛlɛyeɠei ʋa, é ʋɛɛ Izelayɛle ná-GALAGI ʋa. Toɠa naa ɠɛʋelei lɛɛzu, eɠɛʋelei GALA ge Moaɓe nui Lute mɔɛin veeni la, ná-wooɠɛɠiladai vaa zu. Lute ta deemɔɔin Naomi ti maanɔɠɔni mɔungi ti ɠɛni ga maawɔin nuiti, kɛlɛ ti ɠulani naa zu, ti ɠɛ ziilɛigi zu ta undaanɛɛi. Sɛʋɛi nii zu vai zuɠula ʋe ga pagɔ, toɠa lɔɠɔ ʋagɔ wosu, é lo wooɠɛɠiladai ʋa ga nuɓusɛiti zɔɠɔzu nɛɛbɛi maaʋele, ta é ʋilɛ GALA ná-kitogi ʋa é nui zu.
Ɓoaze ɠɛʋele ɓɛtɛni ga é Lute unmɔɔ, tɔɔzei ba: Elimeelɛke nii é ɠɛni ga ná-nu ɓɔɔɓɔgi, zobo ge la ɠɛni bɛ, é ʋa unmɔɔ. Ɓoaze ɠa ga Kilista ma ʋoogi, nii paai naa laazeelizu, nii tɔgi la zooni é ʋa kɛ: É nuiti unmɔɔni.
Lute ná-doun zunui zɔlɔɔ fai ɠa ga sɛʋɛi nii zu vai ma ɓiingi: Doin naa ɠa é ɠɛni ga masagi Davide kɛɛɠɛ wolai, toɠa ga kɛɛɠɛ wolaiti ti ta.
Lute Moaɓe anzanui ɠa Yesu Kilista ɓɔɠɔi mavofodai zaama. (Matiyo 1:5)
1
Elimeelɛke ná-pɛlɛyeɠei
ná-maanɔɠɔ vai
1 Tukpɔɠaaleʋe nuiti ta-ziɛgi zu, pului looni Izelayɛle nuiti ta-yooi zu. Ɓɛteleyɛme laai é Zuda yooi zu, naama zunui ta liini ta anzai ta ná-doun zunu felegɔiti, ga ti lago zei Moaɓe yooi zu.
2 Zunui naa laaseigi ɠɛni ga Elimeelɛke, anzai laaseigi ɠɛni ga Naomi, ta ná-doun zunu felegɔiti daaseigiti ti ɠɛni ga Maalon ta Kiliyon. Ti ɠɛni ga Efelata nuiti, Ɓɛteleyɛme laai zu Zuda yooi zu. Ti zeeliai ma Moaɓe yooi zu, ti zeizuʋɛ ɓɛtɛni ná.
3 Naomi zinigi Elimeelɛke zaani, anzanui ɠila ko yɛni niina ná, ta ná-doun zunu felegɔiti.
4 Ti Moaɓe anzanuiti seini. Gilagi laaseigi ɠɛni ga Wɔɔlepa, felesiɛi laaseigi ɠɛ ga Lute. Ti zeini ná kona puugɔ laawu.
5 Maalon ta Kiliyon ti zaani ɓalaa ti felegɔ pɛ. Naomi yɛni ná, balagai ná-doun felegɔiti ma ta sinigi.
Lute ta Naomi
ti lii vai Ɓɛteleyɛme
6 É yɛni Moaɓe yooi zu, é mɛni ga Ɠɔoɠɔ GALAGI undaanɛɛ laa ná-nuɓusɛiti bɛ, é daamianigi vea ti ya. É wuzeɠeni, tɔ-o, ná-doun anzaiti-yo, ga ti zeɠe Moaɓe yooi zu.
7 Ti zeɠeni ti-zeizuʋɛ, ta ná-doun anza felegɔiti, ti ʋilɛ pelei ma, ga ti ɠale ma Zuda yooi zu.
8 Naomi ɠɛni naazu ná-doun anza felegɔiti ma: «À ɠale ma, ɛsɛ ge li dee ná-pɛlɛi wu. Ɠɔoɠɔ GALAGI faaɓɔɠɔ ɠɛ wo ʋɛ, ʋelei wo kɛa la wo-zinigiti bɛ, niiti ti zaai, ta wo kɛa la nà ɓalaa bɛ.
9 Ɠɔoɠɔ GALAGI wo ɠilagilagi zeiʋele ɓɛtɛ zini pɛlɛi wu, wa ɠɛ bu!» É ti nɛɛnɛni. Ti tɔɔzeini ga wɔlɔa.
10 Ti ɠɛni ma: «Ɓa-o, ada liizu ʋɔɔma ɗa-nuɓusɛiti pɔ bɛ.»
11 Naomi ɠɛni ti ma: «À ɠale ma, dòun anzanuiti! Lee vaa zu wa ʋilɛ pòlu? Doun zunua ta kòozu mɔnɔ ɓaa, ta ɠɛ ga wo-zinigiti?
12 À ɠale ma, dòun anzanuiti. À li! Mazɔlɔɔ gòla ʋɔlɔʋɛ na, gè ʋa zei zini bɛ. Anɛɛ ɓalaa nà ɠɛɛzu ma: ‹Kito ka bɛ̀, ga za ɓidii, gè ve zini bɛ ga gè zunu lounɠa zɔlɔɔ,›
13 wa naati maaɓɔun ga ti wɔɔlɔ, wa ɠɛlɛ wo zei vai ʋa zini bɛ naazu ɓaa? Ɓa-o, dòun anzanuiti! Mazɔlɔɔ nà-kpɔlɔi wɔɔlɔʋɛ wɔnɔi ʋa, ta mɔnɔ Ɠɔoɠɔ GALAGI yeewuzeɠeʋɛ dàalɔɠɔma.»
14 Ti wɔlɔni mɔnɔ. Wɔɔlepa deemɔɔn nɛɛnɛni, ti bali ma, kɛlɛ Lute ɠilini ba.
15 Naomi ɠɛni Lute ma: «Pɛtɛ, è-zeebɔi ɠalega ma ná-nuɓusɛiti pɔ ta ná-galagiti. Ɠale ma, è ʋilɛ è-zeebɔi ʋolu.»
16 Kɛlɛ Lute ɠɛni ma: «Mina ɓɔi dà ga gè zeɠe è ʋolu, ga gè ɠɛlɛ è ʋa! Ʋɛ ɗa li ná, nà li miná, ʋɛ ɗa zei ná, nà zei miná. Ɗa-nuɓusɛiti ta ɠɛ ga nà-nuɓusɛiti, ɗa-ƓALAGI ɠa ɠɛ ga nà-GALAGI.
17 Ʋɛ ɗa za ná, nà za miná, màaɠulu ná. Ɠɔoɠɔ GALAGI sò ná-ziiɠaawanai pɛ su, ni ani ɠili ka kpèteʋena è ʋa, é ɠula saai ʋolu!»
18 Naomi kaai ma ga wɔinʋɛ ga ti li ʋɔɔma, é zɛni kana niina.
19 Ti felegɔ ti ziɛni ʋɔɔma, eyɛsu ti zeeli Ɓɛteleyɛme. Siɛgi zu ti lɛɛni la Ɓɛteleyɛme, taai kpein ge ɓusɛni ti maaʋele ma, anzanuiti ti ɠɛni ɠɛɛzu ma: «Naomi ɠa nɛi ɓaa?»
20 É ɠɛni ti ma-o: «À mina mɔ tòli ga Naomi, kɛni Mala. Mazɔlɔɔ Zɛbɛi-Pɛ-Maliɠii eteai ɓaa mà.
21 Dìizuʋɛ, zèei laavega ɠɛni de, Ɠɔoɠɔ GALAGI ʋaa ga ze zèaɲakai. Lee vaa zu wa tòli ga Naomi? Tɔɔzei Ɠɔoɠɔ GALAGI ʋoluavega bà, Zɛbɛi-Pɛ-Maliɠii màanɔɠɔa.»
22 Zekana Naomi ta ná-doun anzai Lute, Moaɓe nui, ti ʋaani la, ti zeɠe Moaɓe yooi zu. Ti zeelini Ɓɛteleyɛme, moloi nii daa ga wɔɔlezegi, naa leʋe vai lɔɔzeiɗai nɔ kpein.