GALA Sɛʋɛi 1 Samiyɛle 26

Davide ɠɛlɛ vai ʋolu
Sayile ʋaa vai ʋa

1 Zife nuiti ti liini Giɓea, ti ɠɛ Sayile ma: «Davide lɔɔɠuʋɛ Ɠakila ɠizei ma, teʋebai ɠobaʋɛ.» 2 Sayile liini Zife teʋebai zu, ga é Davide ɠaiziɛ. Nu waasaʋagɔ (3 000) ɠa é ɠɛni polu, niiti ti ga salaʋusu ɠɛzɛɠɛzɛgiti Izelayɛle yooi ná pɛ su. 3 É ná-kɔɔlaɠai ʋuuni Ɠakila ɠizei ma, teʋebai ɠobaʋɛ pele laaʋɛ. Naama ziɛgi zu Davide ɠɛni ɲiizu teʋebai zu. É mɛnigai ma ga Sayile ʋilɛgɛ polu, é ɗa gaiziɛ teʋebai zu, 4 é nɛnɛgiti teʋeni dɔɔɠuzu, é kwɛɛni naazu ga Sayile ʋaa ga ɠite.

5 Davide wuzeɠeni, é ʋilɛ pelei ma, é zeelini ʋɛ Sayile ná-kɔɔɓɔgi ʋuuni ná, é wɛlɛ ga pagɔ, é Sayileni daazuʋɛ ɠa, ta ná-kɔɔɠuluɓai Aɓenɛɛl, Nɛɛl ná-doun zunui. Sayile ɠɛni laani kɔɔlaɠai zaamaʋɛ, ná-salaʋusuiti ti laani maaɠoolii zu.

6 Davide Ɠɛte nui Ayimeelɛke lolini, ta Aɓisayi, Seluya ná-doun zunui, Zoaɓe kɛɛɠɛloin, é ti ɠaazaɠani, é ɠɛ ti ma: «Wo zaama, gá ɓɛ ɠa gi liizu Sayile ʋɔ bɛ, kɔɔlaɠai zu?» Aɓisayi ɠɛ ma: «Nɔ̀un, kɛ̀ʋele ɓɛtɛʋɛ ga de li.»

7 Davide ta Aɓisayi ti lɔɔni kɔɔʋɛbɛi zaama ga kpidii, ti Sayile ɠaani laani zaamazuʋɛ, kɔɔlaɠai zu, ná-kpɛɛin ɓadɔai unbuaʋɛ zooi ma. Aɓenɛɛl ta salaʋusuiti ti laani maaɠoolii zu.

8 Aɓisayi ɠɛ Davide ma: «GALA ge è zili nui lɔa za è yeezu. Va bu gè sɔ ga kpɛɛin, ná ɠɛ ɠila nɔ, felesiɛ vaa la ba.»

9 Kɛlɛ Davide ɠɛni Aɓisayi ma: «Mina paa! Mazɔlɔɔ ɓɛ ɠa a yeeloo naama nui ma, nii GALA ge yiimazeɠeai la, é gulɔi ziaai ma, ma nui ɠɛ ga sɔbalala nu? 10 Gè ɠonaa Ɠɔoɠɔ GALAGI ma, nii é vulua, ga Ɠɔoɠɔ GALAGI ɓɔɠɔi ɠa é nii yɛnvui zeɠezu ga saai, ɓaa é undaaʋili kɔɔi zu. 11 Ɠɔoɠɔ GALAGI kìzo naa ma, gè ʋa yeevɔɔɠu naama nui ʋa, nii é gulɔi ziaai ma. Kpɛɛin nɔ zeɠe, nii é unbuaʋɛ, ta ziɛ woolei, de li.»

12 Davide kpɛɛin ta ziɛ woolei zeɠeni, niiti ti ɠɛni Sayile unbuaʋɛ, ti ɗa li. Nu nɔpɛ ge la ti ɠaani, nu la looni ga ná, tanɔpɛ ge la ɓalaa wuunni, ti pɛ ti ɠɛni ɲiizu, mazɔlɔɔ Ɠɔoɠɔ GALAGI ɲiimɛni wolai leʋeni ga tiye.

13 Davide pɛtugi maaleʋeni, é lo gize unmaʋɛ ɠoozama, ti yɔɠɔzu ɠooza ta Sayile ná-kɔɔlaɠai. 14 É tɔɔzeini ga wooɠula Nɛɛl ná-doun zunui Aɓenɛɛl ma ta ná-kɔɔʋɛbɛi, é ɠɛ ma: «Aɓenɛɛl, è la gòoɠaaʋotesu?» Aɓenɛɛl ɠɛni ma: «Ɓɛ ɠa ga ɗe, ɗɛi è ɓainsu masagi woizu?»

15 Davide kpɔɛi zeɠeni ʋolu, é ɠɛ Aɓenɛɛl ma: «Ɗa ga zunu ɠiteɠite, è ɠɛɠala nɔpɛ ge la Izelayɛle, lee vaa zu mu è la masagi makɛni, è-maliɠii? Mazɔlɔɔ nuɓusɛiti saama nui ta ʋaaʋɛ, ga é è-maliɠii ɗa-masagi ʋaa. 16 Nii è kɛai, é la ʋani. Gè ɠonaa Ɠɔoɠɔ GALAGI ma, nii é vulua, ga wo maanɛɛʋɛ ga wo za, mazɔlɔɔ wo la masagi makɛni, wo-maliɠii, nii Ɠɔoɠɔ GALAGI gulɔi ziaai ma. Wɛlɛna! Mini ɠa masagi ná-kpɛɛin ta ná-ziɛ woolei ti ná, niiti ti ɠɛa unbuaʋɛ?»

17 Sayile Davide wooi ɠwɛɛni, é ɠɛ ma: «Dòun zunu Davide, è-wooi ɠa gè mɛnisu ɓaa?» Davide gooɠaaʋoteni, é ɠɛ ma: «Ungo, masagi màliɠii, gòoi ɠa è mɛnisu.» 18 É ɠɛni ma: «Lee vaa zu màliɠii ʋilɛsu pòlu, nɛ̀i gè ga ná-botiɠɛ nui? Lee ɠa gè kɛa? Faa ɲɔi ɓɛgele ɠa é ga sɔ̀gi? 19 Niizu, màliɠii, soma é woilo gòoi ma, nɛ̀i gè ga ná-botiɠɛ nui: Ni Ɠɔoɠɔ GALAGI ɠa é è laaʋilisu mà, naazu é soma é yeezei zalaɠa ɠila bu, naa ziilɛi, kɛlɛ ni nuiti ka ti è laaʋilisu mà, Ɠɔoɠɔ GALAGI ɠa ma nuiti foovo, mazɔlɔɔ ta kpɛ̀ɛzu ga ti kùla zooi ʋa za, nii Ɠɔoɠɔ GALAGI feai ná-nuɓusɛiti zea ga tɔnɔ, kɛɛʋɛ eɠɛ ta ɠɛ ɠɛɛzu mà: ‹Li, è gala kiligiti dɛbi.› 20 Kɛlɛ, ee! Mà ɲamai mina ʋu kae Ɠɔoɠɔ GALAGI ɠaazu ɠɔpoluma, mazɔlɔɔ Izelayɛle masagi liiʋɛ ga kɔɔi koe fɔfɔ go nɔ laalɔɠɔma, eɠɛ ta ɠɛ kakalo kpɛɛzu gizeiti ma.»

21 Sayile ɓainni, é ɠɛ ma: «Gè kotoi ɠɛa. Ɠale ma è ʋa, dòun zunu Davide, mazɔlɔɔ gè la mɔ faa ɲɔu nɔpɛ kɛa ga ɗe, tɔɔzei zɛ̀nvui vizɔga za è ɠaazu. Ɠimalala vaa ɠa gè kɛai, gè faaɠaaza golai ɠɛa.» 22 Davide gooɠaaʋoteni, é ɠɛ ma: «Masagi, ɗa-ɓɛɛin ɠa é ʋɛ, ɗa-wotiɠɛ nui gila ge ʋa é seɠe. 23 Ɠɔoɠɔ GALAGI ɠa ɛsɛ pɛ ná-telebodai, ta ná-wooɠɛɠiladai zulɔnɔgi ve zea, mazɔlɔɔ Ɠɔoɠɔ GALAGI ɠɛa è veeni zèa za, kɛlɛ gè la vaani bu, gè ʋa yeevɔɔɠu naa ʋa, nii ná-gulɔi ziaai ma. 24 Eɠɛʋelei è-yɛnvui vizɔga la gàazu za, nà ɓalaa zɛ̀nvui vizɔ ɠana kae Ɠɔoɠɔ GALAGI ɠaazu, é kùla kidaaʋiligi pɛ su.» 25 Sayile ɠɛni Davide ma: «Ɠɔoɠɔ GALAGI tuya loo è ʋɛ, dòun zunu Davide. Ɗa ʋaazu faa wola mɔinmɔin kɛɛzu, nii nɔpɛ ɗa tɔɔzei, ti pɛ su ɠa nɛɛ.» Naa ʋoluma Davide liini ga ʋɔ pelei, Sayile ɓalaa ge li ná-taazu.