Guyei Pagai Guyei Pɛ Ba
Sɛʋɛi lɔɔzeizuʋɛ ma woo mɔungiti
Sɛʋɛi é ga Guyei Pagai Guyei Pɛ Ba, toɠa ga Izilayɛle nuiti ta-nɛɛbɛ ɠidafaawu wuye zɛʋɛi, nii tanisu sɛʋɛi ɠɛɛ nu mɔinmɔin ge sɛʋɛai. Eɓulu wooi zu «guyeiti ta-wuyei» wooi wo pelei ta ʋe, nii poluʋɛ ga tɔ ɠa pagai guyei pɛ ba, eɠɛʋelei nu a ɠɛɛ la ma «masagiti ta-masagi», é dɛɛzu la ga tɔ ɠa é ga masa golai. Sɛʋɛi tɔɔzeiʋɛ ga é masagi Salomɔn laaseigi wo (1:1) kɛlɛ naa la bosu ga tɔ ɠa é sɛʋɛai. Toɠa zoo ɠɛɛzu ga nu ɠili ka é sɛʋɛai, nii a kɛ é Salomɔn maawui. Faaɠwɛ nu wolai ti la kwɛɛ yeeɠɛɠalai nii sɛʋɛi ɠɛai ma, kɛlɛ tanisu naa ɠɛɛʋɛ siɛgi zu Salomɔn ɠɛni la masadai zu, é zo kona untaaʋuugɔ puulɔfela (970) ɠɛɠala ma, é yei untaaʋuugɔ puusaʋagɔ maazu ɠilagi (931) ma, aisa Yesu Kilista ʋa zɔlɔɔ. Tama gaalɛɛʋɛ ba ná yee ʋolu ʋelei.
Guyei Pagai Guyei Pɛ Ba, naa ɠa nɛɛbɛ ɠitei maamusɛzu. Sɛʋɛi lɔɔzeizu é li gaaɓelasu, zunu ɠila ta anzanu ɠila ta su ɛsɛ ge ɗa koozu ɠisiɛi ʋagɔi wo bɔɔlai ma. Ná tanigaa, ti-wɔɔlaiti ta-vaiti zɔɠɔzu lɛɛzu, ti lati ti ʋɔɔkpɔ ta-woozunɛɛi ʋa (6:1). Faaɠwɛ nuiti bɔɔlɔzu zoloogɛ ma, ti ɠɛ ma sɛʋɛi nii ma woo ɓiigi ɠa gaaɠwɛsu lɔsaʋai zu puuzu lɔɔlugɔ é li dɔfelai zu (8:5-7). Miná anzanui ɠɛɛʋɛ ma nɛɛbɛi zɛbɛi wɔɔlɔʋɛ ga saai ɠɛʋele. Nɛɛbɛi ɠa é ga anii nii sɛbɛi wola wɔɔlɔai, nii nu a zoo gaaɠaazu, ta nu la zoo ga sakpesu, eɠɛʋelei nɔ saai la. Tanisu naa ɠa é kɛai ná zeizu ɠɛai la saʋa, anzanui ɗa ɠɛ nuiti ma, ti mina nɛɛbɛi maaloɠa, aisa é ʋa nɛɛ bɛ (2:7; 3:5; 8:4).
Unsosuʋɛ
1. Sɛʋɛi ma ungi (1:1).
2. Kidafaawu mɔungi (1:2—2:7).
3. Kidafaawui velesiɛi (2:8—3:5).
4. Kidafaawui zaʋasiɛi (3:6—5:1).
5. Kidafaawui naanisiɛi (5:2—6:3).
6. Kidafaawui lɔɔlusiɛi (6:4—8:4).
7. Kidafaawui lɔzitasiɛi (8:5—8:14).
1
1 Guyei nii pagai guyei pɛ ba. Salomɔn ná-guyei.
(Anzanui)
2 Ee, nɛ̀ɛnɛ ga è-laaʋɛ, è nɛ̀ɛnɛ!
Ɗa-nɛɛbɛi ɠa sòsu, é leʋe dɔɔi ʋa.
3 Ɗa-wulɔiti kugi wola nɛɛʋɛ.
È-laaseigi ɠulaʋɛ ga gulɔi nii maku nɛɛnɛgi liizu,
naa ɠa é kɛɛzu anzalopoiti ti wɔinzu la ga ɗe.
4 Sò zèei ʋa, è mɛ̀ɛn, de ɓizɛ ʋɔɔma!
Masagi lɛɛʋɛ ga ze ná-pɛlɛ ɠoozu ʋɛlɛiti bu.
De ɠoozunɛ, de ɠɔkɔ è-zaalai zu,
de ɗa-nɛɛbɛi ma ɠoozunɛɛi ɠula,
nii é nu zosu, é leʋe dɔɔi ʋa!
Gaama ɠa anzalopoiti zea ga ti wɔin ga ɗe.
5 Zeluzalɛme anzalopoiti, kɔ̀lɔgi maalɛitɛigɛ, kɛlɛ pàgɛ,
eɠɛʋelei Kedaal zeɠe ɠota maalɛitɛigiti ti la,
ta Salomɔn ná-seɠe zuɠooza gola zuʋua ʋapagiti.
6 À mina wɛlɛ màalɛitɛi pelei nɔ ʋa,
ga tɛi gàlaai foloi ʋɛ.
Kɛ̀ɛlointi ka ti yiiɠaawanani mà,
ti ɠɛ, gè ɗa wɛlɛ leezɛn ɓeleiti ma.
Gè la wɛlɛni nà ɓɔɠɔi nà-leezɛn ɓelei ma.
7 Mini ɠa è ɗa-ʋaala kpulugi makɛsu ná?
Ee, zìima nui, ná lɛ ga ze kae,
mini ɠa ná ga ta-looɠo bosuʋɛ è ya folo gaalɔgai?
Nii a kɛ gè mina ɠɛ ga teʋeteʋe nu
è-wɔɔlaiti ta-ʋaala kpulugiti koba.
(Zunui)
8 Ni è la naa zuɠwɛɛni, ɗɛi è ʋagai anzanuiti kpein saama,
ɠula, è ʋilɛ baalagiti kɔɠɔ ɠoba,
ɗa-woli yiʋoiti kɔnɔkula
togani makɛ nuiti ta-ɠotaiti kobaʋɛti.
9 Ee, zìima anzanui,
è ʋagɛ eɠɛ soo zaai nii Falaɠɔn ná-wotoloiti giliai ba.
10 È-ɠomagiti gola ʋagɛ ɗa-woizu anigiti saama.
È-ɠɔgi ɠeeluai ga pagɔ ɗa-ɠɔbu anigiti saama.
11 Da zanu goizu anigiti kpɛtɛzu è ʋɛ,
ti ʋɛlupɛlugai ga walii.
(Anzanui)
12 Nà-masagi ɠɛai ma daazuʋɛ,
nà-naal gulɔi maku nɛɛnɛgi ɠɛni ɠulazu.
13 Nɛ̀ɛbɛ nui ɠa bɛ̀ ga miilegi ma liʋɛi,
toɠa ɲiizu piin ɲìimiiti zɔɠɔzuʋɛ.
14 Eɠɛʋelei gulu ʋuai yisɔyisɔgiti ti la En-Gedi leezɛn ɓelei zu,
ʋele ɠana nɛ̀ɛbɛ nui la bɛ̀.
(Zunui)
15 Ee, è ʋagɛ!
È ʋagɛ, zìima anzanui,
è-ɠaazuɠɛzɛiti pagɛ eɠɛ poopo kolegiti.
(Anzanui)
16 Ɗa ɓalaa è ʋagɛ ɗɛ!
Nɛ̀ɛbɛ nui, ɗa nu ɛnɛkɛ.
De laa ʋetei ɠa ga tufa lɛnugi.
17 Sɛdele guluiti ti ɠɛ de maazu ga dakai,
sipɛlɛ guluiti ti ɠɛ ga da-ʋɛlɛi ma leʋesuiti.