3
Folo ɠaaɓelagi zu vaiti
1 Ɠizɛ nii zu gola, ga yeeɠɛɠalaiti ta ɓaa gola folo ɠaaɓelagiti su.
2 Mazɔlɔɔ nuiti ta ɠɛ ga gaazumaavɔɔ nuiti, wali wɔin nuiti, ɓɔɠɔ vaa lɛsu nuiti, gaazumaanɛɛ nuiti, woo ɲɔi wo nuiti, ti zɔlɔɔ nuiti goozotala nuiti. Ta ɠɛ ga faanɛɛ wuuɠwɛɛtala nuiti, faa ɲadega la ti ɠaazu ga faa,
3 maayotala nuiti, zɔɠɔzuɓɛtɛ vaa wɔin la ti ma. Ta ɠɛ ɓalaa ga tɔɠɔ ɠoloɠolo nuiti, ɓɔɠɔzotala nuiti, suɲɔu nuiti. Ta ɠɛ faa ʋagɔi laalɔɠɔma,
4 ti ɠɛ ga yaava nuiti, ziiɠula nuiti, ti laavegai ga wasogi, ɓɔɠɔyiimai ɠa nɛɛ ti ʋɛ é leʋe GALA ba.
5 GALA gaazuluabai ɠa ɠɛ ti-ɠaazuʋɛti nɔ, kɛlɛ ta ɠɛlɛ ma zɛbɛi ʋa. Maaɠooza naama nuiti ba!
6 Tanigaani ta ti zaama, niiti ta ɗa lɔ pɛlɛiti bu, ti ɗa anzanuiti dɔ ta-zobogi wu, niiti zɛbɛ la ti ya, ta ɠi ge la ti ma. Kotoi ɠa anzanui niiti ba, gaazuɠulapɔ ɲɔi ma zii pɛ ge ɠɛ ti zu,
7 anzanui naati ta kalagi zɔlɔɔsu yeenɔpɛ, kɛlɛ ti la zooga pɛ ti ʋa gaamai ɠwɛɛ.
8 Eɠɛʋelei Zanɛseni ta Zamebelɛse ti Moize maaɠaalini la, zenɔ ɠana, zunui niiti ɓalaa ti gaamai maaɠaalizu la. Zunua ʋe ti-ɠigi ɠoloɠologai, ta-ɠidaaleʋei la ga kidaaleʋe ɠiteɠite.
9 Kɛlɛ ti la lia luɠɔma pɛ, mazɔlɔɔ ɛsɛ pɛ ka suɠwɛɛ ga ta ga ɠimalala nuiti, eɠɛʋelei Zanɛseni ta Zamebelɛse tɔnɔi ɠɛni la.
Deve ɠaaɓelagiti
10 Kɛlɛ ɗɔun è ʋilɛgɛ pòlu nà-kala bo fai zu, ta tùʋa ʋelei, naa ʋɛɛ kìsu vaiti, ta nà-kidaaleʋei ʋa, ta nà-ziilɔɔi, naa ʋɛɛ nà-nɛɛbɛi ʋa, ta ʋelei gè loni la kpaan,
11 wɔinzeɠemai ta kpɔlɔi niiti ti zeiɗai mà. Kpɔlɔi ɓɛgele ɠa gè la ɠɛni sɔlɔɔni Antiyɔse ta Ikoniyume, ta Lisitele? Kpɔlɔi ɓɛgele ɠa gè la ɠɛni suzoni? Kɛlɛ Maliɠii kùlani naati pɛ su.
12 Tama, zɔi nɔpɛ é pɔ é eteai ziɛ GALA gaazuluabai zu ta-ɠilibalai zu ta Yesu Kilista, naati ta ɗa wɔinzeɠemai zɔlɔɔ.
13 Kɛlɛ faa ɲɔu ɠɛ nuiti ta yaava nuiti ta ɗa li nɔ luɠɔma yeenɔpɛ faa ɲɔi zu, ti ɗa nuiti kaka, ti ɗa ɓɔɠɔ ɠaka tiya ɓɔɠɔi.
14 Ɗɔun, lo kpaan naama vaiti su, niiti è ti ɠalani, è yeezeiɗai ti wu ga ladala laazeeliai, mazɔlɔɔ nui é è ɠalaga ga tiye, è naa ɠwɛɛ.
15 Kaite è-ma loungo ziɛgi zu, è GALA sɛʋɛ ɲadegai ɠwɛɛ. Toɠa zoo é ɠimalai ve è ya, é lo è luɠɔ, è kizogi zɔlɔɔ ga kidaaleʋei maaʋele Yesu Kilista ma.
16 GALA Sɛʋɛi pɛ feeʋɛ GALA saalai zu, ná-kulanumai wɔɔlɔʋɛ kalagi wo fai zu, zɛɛi zakpe fai zu, kaka faiti sɔle fai zu, ta telebodai ma ɠalagi wo fai zu,
17 naa ɠa a kɛ, GALA nui laazeeli, kɛʋele ɓɛtɛ kɛɛwoti ʋagɔi pɛ kɛɛ vai ma.