Pɔle Ná-Sɛʋɛi
É Teʋeni
Tite Ma
Sɛʋɛi lɔɔzeizuʋɛ ma woo mɔungiti
Tite ná-sɛʋɛi nii ɠa sɛʋɛ naanigɔiti saama niiti Pɔle ti leʋega nu ɠilagilagiti ma, kɛlɛ é la teʋeni Egilisi ma. Zɔ saʋagɔiti ta ga: Timɔte ná-sɛʋɛ mɔungi ta felesiɛi, naa ʋɛɛ Filemɔn nɔnɔi ʋa. Pɔle sɛʋɛi nii ɠɛɛni Tite ma, kɛlɛ é kɛɛni ɓalaa eɠɛ sɛʋɛi nii a zoo ɠalasu kpɔgi zu. Ada naa ɠwɛɛsu ga kɛʋelei niiti ti dɛɛzu ga toɠa ga keelai ta, naati suɠula vai maaʋele, tɔɔzei Tite mu ge ɠɛni naa ɠwɛɛ niina. Tanisu Pɔle sɛʋɛi nii ɠɛɛni kona ʋuulɔzita maazu saʋagɔiti zɔɠɔzuʋɛ ta puulɔzita maazu lɔɔlugɔi (63-65), Kilista zɔlɔɔgai ʋoluma.
Pɔle Tite ɠalani ga ʋelei maanɛɛni é lo da Egilisiiti tuɠɔ, niiti ti ɠɛni ziɛ zaama yooi zu, daa ga Kelɛte. Pɔle sɛʋɛi nii ɠɛɛni, nii a kɛ é Tite ɠala ga ʋelei a Egilisi lotuɠɔiti suwɛɛn da, ta ʋelei a ti ɠala da. É kalagi naa ma ziiti feeni ná-sɛʋɛiti su, niiti é ti leʋeni Timɔte ma. Ná-sɛʋɛi ɠa naa lɛɛzu ʋelei Egilisi lotuɠɔiti maanɛai la, ti ɠɛ nuiti peelalazu la ti ʋa. Za, yeeɠɛɠalai nii zu, Egilisiiti ta ta-lotuɠɔiti maanɛɛʋɛ ga kɛʋelei niiti kala ga pagɔ, é ʋilɛ totuɠɔiti ba.
Unsosuʋɛ
1. Pɔle devei veeni Tite ya ga é yeelo totuɠɔiti ba, ti ga GALA gaazuluaba nuiti (1:1-16).
2. Naa ʋoluma, é devei ve naa ya ga é nuiti kala ga ti eteai ziɛ GALA gaazuluabai zu (2:1—3:11).
3. Pɔle gaaɓelagɛ ga é ná-faazeikpasui tanigaa lɛɛ la, ta é ná-tuʋɔ gooiti daazeeli ma (3:12-15).
1
Kalagiti ti logai kidaaleʋe ʋelei ziɛ vai ʋa
1 Nɛ̀i gè ga Pɔle, gè ga GALA ná-botiɠɛ nui ta Yesu Kilista ná-keelai, nà ɠa gè nii wosu. Zɔiti GALA ge yiimazeɠeni ga tiye, é tèʋegɛ ga gè ʋa ga tiye, ti ɠidaaleʋe, ti gaamai ɠwɛɛ, nii a kɛ ti eteai ziɛ wooɠɛɠiladai zu GALA bɛ,
2 ga ti ɠɔoɠɔ zɛnvui ma ɠitogi zɔlɔɔ. Naama yɛnvui ma minazeɠegi woni ade ʋɛ kaite aisa wɔlɔwɔlɔi, GALA zea, nii é la zɛɛ woga.
3 Ziima yeeɠɛɠalai zeeliai ma, é daawooi ʋilɛni su, ga keela wooi nii é kalivaani mà, gè daazeelizu ga GALA ná-devei, de Ɠizo Nui.
4 Nà è luʋɔsu, dòun ɠitei Tite, de ɠidaaleʋe ʋelei vai zu faa zii ɠilagi nɔ ma. Ɠɛɛɠɛ GALA ta de Ɠizo Nui Yesu Kilista, ti zaalai la è ma, ti ziilɛigi ve è ʋɛ.
5 Gè è yɛni Kelɛte, nii a kɛ faiti ti ɠaa la ɠulani ba, è naati gaaɠula ba, è Egilisi lotuɠɔiti sei taai ɠilagilagi pɛ su, é zoloo devei naa ma, nii gè feeni è ya.
6 Egilisi lotuɠɔiti ti ɠilagilagi ti maanɛɛʋɛ ti ɠɛ ga zunui nii peelalazu la ba, é ɠɛ ga anza ɠila kɛɛ nui, ná-dointi ti ɠɛ ga kidaaleʋe nuiti, ti mina ɠɛ ga tuʋa ʋele ɲɔu nuiti, ti-ziɛ ʋelei zu, ti mina ɠɛ ga kololala nuiti.
7 Mazɔlɔɔ kɛni Egilisi ɠundiɠii ɠɛ ga nui nii peelalazu la ba. Tɔ ɠa é makɛsu GALA ná-faiti ma. É mina ɠɛ ga gaazulɛɛ nu, ɓaa ziiʋilɛ nu, é mina ɓɔɠɔ ve dɔɔi ya, é mina ɠɛ ga kpɔɛleʋe nu, é mina naavolo ɠaiziɛ kazemazu.
8 Kɛni é ɠɛ ga wɛɛn zɛsɛbo nu. Nii pagai, naa nɛɛ bɛ. Kɛni é ɠɛ ga kidafaawu nu, é lelebo, é ɲade, é zoo ɓɔɠɔ zosu.
9 Kɛni é ɠili lada ɓɔɛi ʋa, nii soloogai kalagi ma é sɔlɔɔgai. Naazu toɠa zoo zɔiti iɲɔdɔɔzu gaamai ma ɠalagi zu, toɠa pilɛ sɔlɔɔ maaɠaali nuiti ma.
10 Kololala nu mɔinmɔin ka kidaaleʋe nuiti saama, ma un ge daa ma mɛɛ ga niiti ti wola ɠilizu tati pɛlɛʋolu vai ʋa, nii a kɛ ti ʋa ɠizo, ti ga wafuun kpɔɛzuɠula nuiti, ti ga nuɓusɛiti kaka nuiti.
11 Kɛni è ti laaɠulu, mazɔlɔɔ ta ɗa pɛlɛyeɠeiti kɛ unga wuulee, ti ɗa kalagi wo, nii maa la nɛɛni, ga ti kazemazu anii zɔlɔɔ.
12 Ti zaama, ti ɓɔɠɔ nui ta, ti pɛtɛsu ga gala goo wo nui ta, naa ɠɛni ma: «Kelɛte nuiti ta ga zɛɛ wo nuiti yeenɔpɛ, sua ɲɔiti be, ɠulukpu nuiti, dɔɔʋɛ nuiti.»
13 Niima zeele wooi ɠa ga gaamai. Naa ɠa é ba, zelilo ti ma ɠɛzɛɠɛzɛ, naa ɠa a kɛ ti ɠili kidaaleʋe ɠiteɠitegi ʋa,
14 ti mina ɠili Zuifuiti ta-vaalaali wafuungiti ba, ti mina ɠili ɓalaa nuiti ta-leveiti ba, niiti ti ʋoluavegai gaamai ʋa.
15 Anii pɛ ɲadegɛ naati bɛ, niiti ti ɲadegai. Kɛlɛ ani nɔpɛ ge la ɲadeni naati bɛ, niiti ti ɠɔzɔai, ti ga kidaaleʋelala nuiti. Ta-ɠeleɠelegi ta ta-ɠisiɛi pɛ ka kɔzɔai.
16 Ta ɠɛɛzu ti GALA kwɛɛ, kɛlɛ ti-ziɛ ʋelei zu, ta ɠɛlɛzu ba. Ti wɔinzeɠeʋɛ, kololala nuiti, ti la zooga ti ʋa kɛɛwoti ʋagɔ nɔpɛ kɛ.