3
Kidaaleʋe nui ziɛ ʋelei
1 Kidaaleʋe nuiti kitoo su, ga ti maanɛɛʋɛ ti ɓɔɠɔmaayei kundiɠiiti bɛ, ta zobobɛ nuiti, ti maanɛɛʋɛ ti woozogi ɠɛ, ti ɠɛʋele ɓɛtɛ kɛɛwoti ʋagɔi pɛ kɛɛ vai ma.
2 Ti mina ɠɛ ga nu nɔpɛ tɔɠɔ ɠoloɠolo nu, ti mina ɠɛ ga kpɔɛleʋe nu, ti ɠɛ ga nu zɛsɛbo nu, ti ɠɛ ga ɓɔɠɔmaayei nu nuiti pɛ bɛ.
3 Mazɔlɔɔ da ɓalaagi de ɠɛni ga ɠimalala nuiti mɔungi zu, de ɗa kololalai ɠɛ, de ɠɛni kaka pelei zu. De ɠɛni ga duɔiti gaazuɠulapɔi ma zii pɛ su, ɓɔɠɔyiimai zu. De ɠɛni eteai ziɛzu nu ɲɔulai zu, ta tolo ɲɔi zu, nuiti ti ɗa de maayoseɠe, de ɗa ɓɔɠɔ maayoseɠe.
4 Kɛlɛ, ade Ɠizo Nui GALA ná-nuɓɔɠɔlai ta ná-nɛɛbɛi nuɓusɛiti pɛ faa ma, naati kulaai ma kɛlɛma,
5 é ade ɠizoni, naa la ɠɛni ɠɛɛni da-ɠɛɛwotii ma lelebodai maaʋele ma, kɛlɛ tɛi é ade maawɔinɠaai. É ade ɠizogɛ ga gbagi, nii Zɛnvu Ɲadegai sɔlɔɔ niinɛ daai ta zɛnvu niinɛi veezu de ʋɛ ga maaʋele.
6 É naama Yɛnvui veeʋɛ ade ya ga bɔɔlɔa ga Yesu Kilista de Ɠizo Nui maaʋele,
7 naa ɠa a kɛ de ɠɛ ga telebo nuiti ga ná-zaalai maaʋele, de ɠɔoɠɔ zɛnvui zɔlɔɔ ga poganii, nii de ɠitogai ba.
8 Naama wooiti ta ga lada ɓɔɛi. Nà pɔ ga è ɠili ti wo fai ʋa gola, naa ɠa a kɛ, zɔiti ti ɠidaaleʋeai GALA ma, naati ti ɠaaɓa, ti ɗa kɛɛwoti ʋagɔiti kɛ. Tama naa ɠa pagai, fizɔgai nuiti ma.
9 Kɛlɛ ɓe ɠimalala maaɠaaliiti ba, ta boloda lɔlɔ faiti, ta sakpegiti, ta tɔgi ma ɓɔɛzuɠulai ma maaɠaaliiti. Mazɔlɔɔ naati ta ga wafuun faa, tɔnɔ ge la ti ʋa.
10 Ni nui ta a zeeɠaaɠwɛɛ vaa ɠɛɛna, tɛnɛ ná zeizu ɠɛ ɠila, ɓaa felegɔ, naa ʋoluma maaɠooza ba.
11 Suɠwɛɛ ga naama nu zii ɠakagɛ. Toɠa ɓɔɠɔ ʋeelalazu ga kotoi giliai kɛɛ vai ʋa.
Fali ɠaaɓelagiti ta tuʋɔ gooiti
12 Nà Aaletemase leʋena nɔ feya è ma, ɓaa Tisike, ɠaaɓa, è ʋa pɔ̀ bɛ Nikopolise, mazɔlɔɔ gè deveʋɛ ga gè samai ɠɛ ná.
13 Ɠaaɓa gola, è ɓɔ tɔ kalamɔin Zenase ta Apolɔse ʋa ta-ziɛi ma vaa zu, ti mina ʋala ani nɔpɛ ma.
14 Da-nuiti ɓalaa maanɛɛʋɛ, ti kɛɛwoti ʋagɔiti maalɛlɛ ga pagɔ, naa ɠa a kɛ, ti ɗa losu ɠɛ nu ɓɛdɛma vaiti su, ta ʋa ɠɛ ga kulanumalala nua.
15 Zɔiti pɛ ti bà ʋɛ, ta è luʋɔsu. De-wɔɔlaiti tuʋɔ, ti kidaaleʋei zu.
GALA ná-zaalai yɛ wo pɛ wo ʋa.