Song 71
Prea bilong lapun man
1 Bikpela, mi save stap
wantaim yu,
na ol birua
i no inap bagarapim mi.
Yu no ken larim ol i winim mi.
2 Yu stretpela olgeta,
olsem na yu ken helpim mi
na kisim bek mi
long han bilong ol birua.
Yu ken harim prea bilong mi
na kisim bek mi.
3 Yu stap olsem strongpela banis,
na olsem strongpela haus.
Bai mi go insait
na yu lukautim mi, long wanem,
mi ken i go long yu tasol
na mi hait.
Yu tasol inap lukautim mi
na mi stap gut.
4 God bilong mi, kisim bek mi
long han bilong ol man nogut.
Ol i strong tumas
na pasin bilong ol i nogut tru.
5 Bikpela, mi save bilip
long yu tasol.
Mi yangpela yet na mi bilip long yu,
na mi bilip yet inap long nau.
6 Oltaim mi stap
long han bilong yu tasol
na mi wokabaut.
Mama i karim mi
na yu bin lukautim mi
i kam inap long nau.
Olsem na bai mi litimapim
nem bilong yu oltaim.
7 Planti manmeri i bin lukim mi
na ol samting i kamap long mi,
na ol i save,
yu tasol yu strong tumas
long lukautim mi.
8 Long olgeta de
mi save litimapim nem bilong yu
na tokaut long biknem bilong yu
long ol manmeri.
9 Nau mi lapun pinis
na mi no gat strong moa,
orait nogut yu lusim mi
na givim baksait long mi.
10 Ol birua i laik kilim mi,
na ol i kibung
na pasim tok long bagarapim mi.
11 Ol i tok olsem,
“Goan, yumi ranim em
na holimpas em.
I no gat wanpela man i stap
bilong helpim em.
God i lusim em pinis.”
12 Orait God, yu no ken i stap
longwe long mi.
God bilong mi,
yu mas i kam hariap na helpim mi.
13 Dispela ol man i sutim tok long mi,
yu ken daunim ol
na pinisim ol tru.
Ol i laik bagarapim mi,
olsem na yu mas paulim ol
na mekim ol i sem nogut tru.
14 Tasol bai mi bilip long yu oltaim
na mi wet long yu i helpim mi.
Bai mi litimapim nem bilong yu
moa yet.
15 Bai mi tokim ol manmeri
long stretpela pasin yu bin mekim.
Mi no save gut
long as bilong olgeta samting
yu bin mekim,
tasol maski, long olgeta de
bai mi tokim ol
long yu bin kisim bek mi.
16 God, Bikpela, bai mi tingim
bikpela strong bilong yu
na bai mi litimapim
nem bilong yu.
Bai mi autim tok olsem,
“Bikpela tasol em i stretpela.”
17 God, yu bin skulim mi
long taim mi liklik yet
na i kam inap long nau,
na mi save tokaut yet
long ol gutpela gutpela samting
yu bin mekim.
18 Nau mi lapun pinis
na gras bilong mi
i waitpela olgeta,
tasol God, yu no ken lusim mi.
Yu mas i stap wantaim mi
na bai mi autim tok
bilong bikpela strong bilong yu
long ol lain manmeri
i kamap bihain.
19 God, stretpela pasin bilong yu
inapim olgeta hap,
na i stap ples klia
long ai bilong olgeta manmeri.
Yu bin mekim bikpela wok tru.
I no gat wanpela man bilong graun
i wankain olsem yu.
Nogat. Yu winim olgeta.
20 Yu bin salim olkain hevi
i kam long mi.
Tasol mi save,
bai yu strongim mi gen.
I olsem mi stap long matmat
na yu kirapim mi gen.
21 Bai yu mekim nem bilong mi
i go bikpela moa yet,
na bai yu mekim bel bilong mi
i isi gen.
22 Bai mi paitim gita
na mekim musik
bilong litimapim nem bilong yu.
God bilong mi,
yu no save lusim mi,
na tok bilong yu i tru olgeta,
olsem na bai mi
litimapim nem bilong yu.
God bilong Israel,
yu God bilong mekim
gutpela na stretpela pasin olgeta.
Bai mi paitim gita na singim song
bilong litimapim nem bilong yu.
23 Mi mekim musik
na bai mi amamas na singaut.
Bai mi singim song long yu,
na mi no singim long maus tasol.
Nogat.
Mi bai singim long olgeta tingting
na bel wantaim,
long wanem,
yu kisim bek mi pinis.
24 Olsem na long olgeta de
bai mi tokaut long ol manmeri
long stretpela pasin bilong yu.
Long wanem, ol man
i bin traim long bagarapim mi,
tasol yu daunim ol
na mekim ol i sem tru.