13
An Jesús jala'ch'anch'a'ay an ixt'alhtanan
1 Akxni jantuka' ixchin ixk'atan Paxku, an Jesús ixk'atsaycha li chilhcha ixpanch'e'ex para li ani lakamunulhpa tan ixt'ajun kala'ancho'oyacha an ixPay, chi mu ixjamapayniya an yu ixtat'alhtanan ani lakamunulhpa, sta wa nilhcha jamapaynilh.
2 Akxni ixtalakwayt'ajuncha puts'ista, an xapay makxkay'un ixtamaknunitacha la ixjatapast'ak'at an Judas Iscariote, ists'alh Simón, li kama'axt'a'a an Jesús.
3 An Jesús ixk'atsayi li an ixPay ixma'axta'ni'ojota wa tuchicha la ixmaka'. Ixk'atsayi an Jesús li tan wilhchalh Diosi ixmintachalh chi li anchacha kacha'ancho'oya'.
4 An Jesús tayalhi an tan ixtalakwayt'ajun, chi ayp'uxkalhi an ixla'ch'it an yu ixpu'ayxt'a'kanta. Xa'a'ilhcha la'atam toalla chi ch'axpach'imuk'akalhcha.
5 Ixli'astan mujulhcha xkan laka la'atam axi, chi tsukulhcha jala'ch'anch'a'ayi an ixt'alhtanan chi jalakch'anxakalhcha an laka toalla an yu ixch'axpach'imuk'akanta.
6 Akxni yucha an Pedrojcha kach'anch'a'akana, yucha juniy:
―Jamach'alhkat Jesús, ¿uxint'ich'a ak'inch'anch'a'aya'a?
7 An Jesús juniy:
―Chaway jant'u lhimach'a'xayi tuchini ik'ilhtut'ajuncha, pero ixli'astan k'alhimach'a'xaya'acha.
8 An Pedro juniy:
―¡Jantu aktilhitamakawlhi li ak'inch'anch'a'at'i!
An Jesús juniy:
―Li jantu aktich'anch'a'an, jantu kint'alhtanak'at'i k'at'i'unt'i.
9 Pus an Simón Pedro juniy:
―Jamach'alhkat Jesús, jant'u wa ak'ila'ch'anch'a'at'i, wach'u ak'ila'ma'ch'a'at'i ch'i ak'ila'p'ach'a'at'i.
10 An Jesús alhtaylh juniy:
―Yu wa pax'ojotaka jantu ma'lhtask'iniya kapaxpalh, mu oxicha paxta, wa kach'anch'a'alhcha. Chi uxitnan oxich'a lakp'axt'at, masi jantu minchuxk'an.
11 “Jantu minchuxk'ani oxicha la'stalan'an la mijalhunutk'an,” jajuniy, mu yucha ixk'atsayi tichini yuchacha yu kama'axt'a'a'.
12 Akxni jala'ch'anch'a'a'olhcha, la'ch'icho'olhcha an ixla'ch'it an Jesús, chi tawlhcho'olhcha an laka mesa, jajuniy:
―¿Lhimach'a'xayat'iti tacha an ikla'ilhtuw?
13 Uxitnan Maestro chi Jamach'alhkati kilajunaw, chi kit'in sawalh, oxich'a t'ach'a an nawnat.
14 Pus kit'in ikMaestro chi ikJamach'alhkat, chi iklala'ch'anch'a'awcha, chaway wach'uch'a k'alala'ch'anch'a'ap'axat'it.
15 Mu iklamasuniwcha t'ani k'a'ilht'utcha, wachucha chuni k'a'ilht'ut tacha an ikla'ilhtuw.
16 Tacha ani iklajunaw sawalh, an patrón yucha yu ay, an yu wa ma'tapatsay jantu, chi yu inta mala'achakan jantu yu xa'ay, yucha an yu jamala'achanan.
17 Li lhimach'a'xayat'iti ani tanlhun ch'i ilht'uyat'it, oxi para uxitnan.
18 ’Jantu minchuxk'ani iklalhichiwint'awnaw, kit'in ijk'atsayi tichini yu'unchacha yu ijkasakxtuta. Pero katapasaya tacha an najunta an tan ts'o'muk'akanta: “An yu kint'alakwayt'ajun wa akint'atasp'it'a'.”
19 Chawaycha iklamak'atsaaniyaw akxni jantuka' tapasay, para li akxni katapasayacha k'ak'iklak'a'iya'itcha li kit'in.
20 Ani iklajunaw sawalh, yu kala'a'iya yu kit'in ikmala'achata, kit'ini kila'a'iy; chi yu kila'a'iy, la'a'iya an yu kimakminta.
An Jesús najun li an Judas yucha kama'axt'a'a'
(Mt. 26:20-25; Mr. 14:17-21; Lc. 22:21-23)
21 Akxni chunchacha naw'olh, an Jesús sawalhcha ta'oxila'alhilh, chi ixla'ts'awalanticha nawlh, jajuniy:
―Xapumatam uxitnani akima'axt'a'a', chi sawalhi tacha ani iklajunaw.
22 Pus wa chuncha an ixt'alhtanan ixtalala'ts'impaxaycha, jantu ixtak'atsay tichini yuchacha.
23 Xapumatam yu yu'uncha, yu an Jesús ixmapayniy, la ixpa'xti an Jesusi ixmalh,
24 pus an Simón Pedro tamakyawnilh, para li kalhisakmilhi tichini yuchacha an yu lhichiwiniy.
25 Wa chuncha yucha stalhcha la'alh palayi an Jesús, chi lhisakmilhcha, juniy:
―Jamach'alhkat Jesús, ¿tisiyuchacha?
26 An Jesús alhtaylh juniy:
―Ak'awaya lakat'ikt'i xatach'e'en pan, chi an yu akxta'niya yucha.
Pus awalhcha an pan, chi yucha an Judas Iscariotejcha xta'nilh, ists'alh Simón.
27 Akxni u'olhcha, an Satanás putanulhcha. Wa chuncha an Jesús juniy:
―Yu k'a'ilht'uya'a, wa t'uk'anch'a k'a'ilht'u.
28 Pero jantu xamati lhimacha'xalh an yu ixtawilanalh laka mesa tuchini chunchacha lhijunilh.
29 Ali'in ixtanajun li sna an Jesús jumputulh: “K'at'amawcha yu kama'lhtask'iniyaw an laka k'atan”, u li tu'ucha kajaxta'nilh an jakilhpatinin, mu yucha an Judasi ixma'ay an tumin laka bolsa.
30 Akxni ix'u'ojotacha an pan an Judas, taxtulhcha, puts'istacha.
Sast'i lhamap'a'sin
31 Chi akxni alhcha an Judas, an Jesús jajuniy:
―Chaway kala'ayakanacha an yu kijunchilh isTs'alh Lapanak, chi an ixta'ayat Dios yucha an isTs'alhcha kaputasuya'.
32 Li an isTs'alh Dios masuyi an ixta'ayat Dios, an Dios wachu kamasuya an ixta'ayat an isTs'alh, chi watukancha kamasuya'.
33 Lakt'ikt'in kijas'at'an, jantucha ma'ani aktilat'a'aklatsukuw. Uxitnan akilapuxkawyaw, pero tacha an ijkajunilh judiojnin wanajcha chuni iklajunaw uxitnan: Jant'u lay k'at'ip'it'iti tan ikti'an kit'in.
34 Iklaxta'niyaw ani sast'i lhamap'a'sin: Li k'alamap'aynip'axat'it. Tacha kit'in iklamapayniyaw.
35 Li k'alamap'aynip'axaya'it'it, ta ixlijalhi'ay an lakamunulhpa katalhakapu'ana li kint'alhtanani uxitnan.
An Pedro najun li jantu mispayi an Jesús
(Mt. 26:31-35; Mr. 14:27-31; Lc. 22:31-34)
36 An Simón Pedro juniy an Jesús:
―Jamach'alhkat, ¿t'anisch'a t'ip'ini?
An Jesús juniy:
―Tan ikti'an jant'u lay ak'int'ich'a'o'a chaway, pero ixli'astan chun.
37 An Pedro juniy:
―Jamach'alhkat, ¿tasu li jantu lay aktich'a'o'ani chawayi? ¡An kijatsukunti aklhima'axt'a'a milakata!
38 An Jesús juniy:
―¿K'alhima'axt'a'a'a mijatsukunti kilakata? Kit'in sawalhi yu ijkunan, jantuka' katit'asalhi an puyux, a't'utucha k'anawna'a li jant'u k'imisp'ay.