19
1 Pus wa chuncha an Pilato lhinawlhcha li kala'ana'makalhcha an Jesús.
2 An soldadojnin tala'oxilhcha la'atam corona de jalhtukun chi tama'tanulhcha chi tamala'ch'inilhcha la'atam ixla'ch'it yu slapulh,
3 ixtajuniy:
―¡K'ajama'alht'axt'uncha ixrejk'an judiojnin!
Chi lo's lo'scha, ixtala'xtisay.
4 An Pilato a'tam taxtupalhchilh chi jajuniy:
―Jo' k'ala'ts'int'it, ani iklalhiminitaw, para li k'ak'ats'at'iti li jantu tu'u ikla'cha'aniniy ixtala'alhin.
5 Pus taxtulhcha an Jesús, ixtama'tanutacha an corona de jalhtukun, chi an slapulh la'ch'it ixtamala'ch'initacha. Chi an Pilato jajuniy:
―¡Jo' aniych'a lhit'awnat'iti ani lapanak!
6 Akxni tala'ts'ilhi an xalaj'ajin sacerdotejnin chi an yu ixtajalhistaknan laka tajtan, tsukulhcha talakt'asay, ixtalaknajun:
―¡K'amakxt'ukmuk'acha laka cruz! ¡K'amakxt'ukmuk'acha laka cruz!
An Pilato jajuniy:
―K'alhip'inchi'itcha uxitnan, uxitnanch'a k'amakxt'ukmuk'at, mu kit'in jantu tu'u ikla'cha'aniniy ixtala'alhin.
7 An judiojnin ta'alhtaylh:
―Kitnan iklhit'awnaw la'atam lhamap'a'sin tan chuncha t'acha'an li kaniylh, mu yucha wa ix'akstucha najun li isTs'alh Dios.
8 Akxni chunchacha asmatlhi an Pilato, palaycha talhanalh.
9 Pus a'tam tanupalhi an laka palacio chi juniy an Jesús:
―¿T'anisch'a t'ant'achi'?
Pero an Jesús jantu alhtaylh.
10 Wa chuncha an Pilato juniy:
―¿Jant'u ak'int'i'alht'ay? ¿Jant'u k'ats'ayi li iklhit'ajuni lhich'alhkat li akmakxtukmuk'an u li akmakajun k'ap'it'i?
11 An Jesús alhtaylh, juniy:
―Jant'u t'u'u ixlits'uk'u lhich'alhkat yu xak'imp'ut'alaxt'uk'u li jantu awint'i talhmani ixmakt'anik'anchi', xliyu an yu kima'axta'lhi la mimaka, palay ay tala'alhini lhit'ajun.
12 Pus wa akxni an Pilato ixmakawputuncha an Jesús, pero an judiojnin p'asi tamat'asalh, tajuniy:
―¡Li k'amak'awna'a, jantu mi'amigojo an César! ¡Wa tichicha yu jun rey, ixt'alaxkaycha an César!
13 Pus an Pilato akxni chunchacha ja'alha'asmatlhi, ma'spacha lhi'alh an Jesús, chi tawilhcha an tan tawlay juez, ani tan ixwilh ixjunkan ja'axi'ulanti de chiwx, laka lhihebreo junkan Gabata.
14 Akxni chuncha tapasalh, ka tacha ix'atunkunt'ajuncha, chi katunkunanta Paxkucha. An Pilato jajuniy an judiojnin:
―¡Ni'ijcha amiRejk'an!
15 Pero yu'uncha talakt'asalh tanajun:
―¡Jantu, jantu, k'amakxt'ukmuk'acha laka cruz!
An Pilato jajuniy:
―¿Akmakxtukmuk'alhcha amiRejk'an?
An xalaj'ajin sacerdotejnin ta'alhtaylh tajuniy:
―Kitnan jantu xamati iklhit'awpalaw pumatam kirrejk'an, wa yucha an César.
16 Pus wa chuncha an Pilato jama'axta'nilhcha an Jesús para li katamakxtukmuk'alhcha, chi talhi'alhcha.
An Jesús tamakxtukmuk'alh laka Cruz
(Mt. 27:32-44; Mr. 15:21-32; Lc. 23:26-43)
17 A'x'o'alhi'alhcha an ixcruz, tanchun junkan la Ixla'pa'axi Swe'elukut, lhihebreo junkan, Gólgota.
18 Anchacha tamakxtukmuk'alh, chi tichi yu'uncha ixt'uyunk'an lapanakni wachu jamakxtukmuk'ak'alh, tapiktutamincha jayawnikalh an Jesús, chi an Jesús tan'ajnicha lhitamakawlh.
19 An Pilato ts'o'lhicha jats'o'nut, chi lhinawlhcha li ka'akpuxtukmuk'akalhcha an ixcruz Jesús, tan najunta: “Jesús jamacha'a Nazaret, ixRejk'an judiojnin.”
20 Ixluwk'an an judiojnini tapunawlh an tacha ists'o'nikanta. Mu an tan makxtukmuk'akalh an Jesús, wa niya ixlitamakajun an la'acha'an. An tacha ists'o'nikanta, lhihebreo, lhigriego chi lhilatín.
21 An xalaj'ajin isacerdotejnink'an judiojnin tajuniy an Pilato:
―Jant'u k'ats'o't'i li: “IxRejk'an judiojnin”. K'ats'o't'i: “Yu najun li ma ixRejk'an judiojnin”.
22 Pero an Pilato jajuniy:
―Yu ikts'o'tacha, ikts'o'tacha.
23 Akxni an soldadojnin tamakxtukmuk'a'olhcha an Jesús, taxa'a'inilhcha an yu ixma'amo'slay ixla'ch'it, aklht'at'icha ta'ilhtunilh chi pumatamjtamincha taxa'a'ilh. Chi an la'atam ixla'ch'it wachu taxa'a'inipalh, chi mu wanaj wa ixpusani'okanta, talhman sta talaktsin, jantu wa ixla'ts'ap'ankanta,
24 pus an soldadojnin talajuniy:
―Jantu kalaj'exwi, wa ka'amanaw suerte, a ver tichini kalhi'anacha. Pus chunchacha ta'ilhtulh. Chi chunchacha tapasalh sawalh tacha an najunta tan ts'o'muk'akanta:
Talamala'pitsilhi an yu xakma'amo'slay kila'ch'it,
chi an yu xakmatan'anuta kila'ch'it, talhi'amanalhcha suerte.
25 Waniy an la ixcruz an Jesús ancha ixtayanalh an ixnati, chi an ixt'alajamatsancha an ixnati, an María, ixt'iwi Cleofas, chi an María Magdalena.
26 Akxni an Jesús la'ts'ilhi an ixnati, chi la'ts'ilhi an ixt'alhtana yu ixmapayniy li ancha ixyalh, juniy an ixnati:
―Anchunu yalh, mints'alh.
27 Chi an ixt'alhtana yucha juniy:
―Anchunu yalh, minati.
Pus sta akxni an ixt'alhtana an Jesús, tacha ixnaticha la'a'ilh la ixcha'a'.
Akxni niylh Jesús
(Mt. 27:45-56; Mr. 15:33-41; Lc. 23:44-49)
28 Ixli'astan, mu k'atsaycha an Jesús li chuxcha tapasa'olh, chi para li katapasalhi tacha an ts'o'muk'akanta, najun:
―Ijkikxixa.
29 Walh wa ancha ixwilh la'atam xaluj snap'a' ix'a'tsamanta si vinagre, pus yu'uncha tamala'ch'uch'uwanilh la'atam wa tacha panimak, chi takinkach'imuk'anilhcha laka ma'atam xak'iw hisopo, talhi'anilhcha an la ixkilhni.
30 Akxni otlhicha an Jesús, ixli'astan najun:
―Tapasa'olhcha.
Pus lilijcha ma'alhtajulhi an ix'a'tsulh, ma'axta'lhicha an ixtakuwin.
An Jesús tapajalhto'olh
31 Akxni chuncha tapasalh akxni ixmala'asijnikancha ixpaku Paxku, katunkuna Paxkucha, pus para li jantu katatamakawtawk'alhi la ixcruzk'an akxni jantu tapatsakan an yu ixjamakxtukmuk'akanta, an judiojnin tatapayninilhi an Pilato li kajalaj'atut'e'ek'alh chi kajap'uxkalhcha an la ixcruzk'an, mu akxni jantu ixtapatsakan sawalhcha ay wilhchani para yu'uncha.
32 Pus ta'alhcha an soldadojnin chi talaj'atut'e'elhcha an pumatam, chi an pumatam wanajcha chun, an yu wachu ixt'amakxtukmuk'akanta an Jesús.
33 Pero akxni tala'cha'alh an Jesús, mu tala'ts'incha li nitacha, jantucha talaj'atut'e'elhi yucha.
34 Pero xapumatam an soldadojnin lit pajalhto'olhi an Jesús, pus watukan taxtunilhi ixjak'alhni chi xkan.
35 An yu la'ts'ilh tacha an tapasalh, yuchaa najun. Chi tacha an najun, sawalh, yucha k'atsayi li sawalhi an yu najun, para li uxitnan wachu k'ak'iklak'a'it'it.
36 Mu tacha ani laktapasalh wa xliyu li katapasalhi an tacha ts'o'muk'akanta tan najunta: “Jantu katit'e'enikalhi ixjalukut.”
37 Chi lakatam nawpalata: “K'ala'ts'ina'it'iti an yu pajalhto'okalh.”
An Jesús maknukalhcha
(Mt. 27:57-61; Mr. 15:42-47; Lc. 23:50-56)
38 Ixli'astan akxni chunchacha tapasa'olh, an José, jamacha'a Arimatea, yu wa la'asa' ixt'alhtana ixjunita an Jesús, mu ixjatalhamniy an judiojnin, tapaynisk'inilhi an ixlakatunaj an Jesús an Pilato, pus an Pilato makawnilh. Wa chuncha alhcha ma'alhtajunu chi lhi'alhcha an ixlakatunaj an Jesús.
39 Walh wachu cha'alhi an Nicodemo, yu an ixlip'ulhnaj ixla'pixiyalhnanta an Jesús la'atam jatats'isni, ixli'antacha yu ixlalhiyajuta perjume la'stu jach'itin yu junkan mirra chi áloe, ka tacha la'ap'uxamkaw kilo.
40 Pus tsukulhcha tala'apach'iya an ixlakatunaj an Jesús laka la'lhman la'ch'it chi ixtalakamuk'aycha an perjume, tacha ixtalhilaniycha ixtalamaknuy an judiojnin.
41 An tan makxtukmuk'akalh an Jesús ix'alin lakatam palakch'anan, chi ancha ix'ilhtukanta la'atam sast'i puta'aknun, jantuka' k'is xamati ixmaknukan.
42 Pus anchacha tamaknulh an Jesús, mu ancha wa niya ixlitamakajun, chi mu akxni ixla'asijt'awkancha ixlakata ixPaxkuk'an an judiojnin.