2
Tan tama'xto'kalh la'acha'an Caná
1 Ixlila'at'utucha wilhchan walh, tama'xto'kalh la'acha'an Caná, xalakaat'un Galilea, chi ancha ixt'ajun an ixnati Jesús.
2 Chi an Jesús chi an ixt'alhtanan wachu jamak'atsaanikalhi li kata'alh.
3 Walh ancha min'olhcha an yu ixlaj'otkan xaxkan uva. Pus wa chuncha an ixnati an Jesús, juniy:
―Jantucha tu'u an xaxkan uva.
4 An Jesús alhtaylh juniy:
―¿Chi kit'in tasu li k'i'uniycha? Jantuka' chini kimpanch'e'ex.
5 An ixnati an Jesús, jajuniy an yu ixtamala'pitsiy tanlhun:
―Chux yu tajunan yucha, yuch'ach'a k'a'ilht'ut'it.
6 Ancha ixlakwilh la'achaxan wa tacha a'xaw de chiwx, yu ixpumujukan xkan, cincuenta u setenta litro xkani lay ixputajuy, yucha ixtaxa'a'iy an judiojnin akxni ixta'ilhtuy yu tacha ixtamasunita ixlakpaynink'an para li katastalan'alh.
7 An Jesús jajuniy:
―K'ala'la'ts'amat laka xkani anchunu lakwilh yu pumujukan xkan.
Pus oxicha tala'la'tsamalh.
8 Chi ixli'astan jajuniy:
―Chaway k'amak'ut'utcha lakats'uniy chi k'alhip'inichi'itcha an yu la'ts'ilhi'anta ani wayt.
Pus talhi'anilhcha.
9 Kilhk'atsalhcha an yu ixla'ts'ilhi'anta laka k'atan li junitacha tacha xaxkan uva an xkan, masi yucha jantu ixk'atsayi tanchuncha minchalh. Pero an yu ixtamala'pitsiy tanlhun yu'uncha ixtak'atsay, mu yu'uncha tamakutulh an xkan an laka pozo. An yu ixla'ts'ilhi'anta laka k'atan t'asanilhi an yu tama'xt'o'a lapanak,
10 chi juniy:
―Watichicha lapanak p'ulhnajcha yu an oxi xaxkan uvaja xt'a'a, chi akxni lhuwcha laj'otkanta, yucha an yu palaycha wa aktayi xt'a'a, walh chi uxint'i an yu oxi lhi'ot'at ma'at'aka sta astan.
11 Yucha anicha yu p'ulhnajcha masulh an Jesús, la'acha'an Caná xalakaat'un Galilea, masulhcha li alhp'asi yucha, chi an ixt'alhtanan takiklaka'ilhcha.
12 Ixli'astan akxni chunchacha tapasalh, an Jesús jat'a'alhcha an ixnati chi an ixjat'ala'awnin chi an ixt'alhtanan la'acha'an Capernaúm; anchacha tatamakawlh, jantu la'alhuw wilhchan.
An Jesús mastalan'aniy an tajtan
(Mt. 21:12-13; Mr. 11:15-18; Lc. 19:45-46)
13 Mu waniycha ixminta ixk'atan paxku, ixk'atank'an an judiojnin, an Jesús alh la'acha'an Jerusalén.
14 Walh an laka tajtan jala'cha'alh an yu ixtast'ay torojnin chi borregojnin chi palomajnin chi an yu ixtamapaxay tumin, anchacha ixtalakwilanalh.
15 Mu chunchacha jala'ts'in an Jesús, pus xa'a'ilh ma'atam lazo, ilhtulhcha ixpa'ayna'na. Wanaj jatamakxtu'olhi an laka tajtan chux an ixborregojnink'an chi an ixtorojnink'an an lapanakni. Chi tilhcha jamaj'anilhi an ixtumink'an an yu ixtamapaxay tumin chi jala'ma'pusp'itnilhcha an ixmesajk'an.
16 Jajuniy an yu ixtast'ay paloma:
―¡K'alakt'amakxt'ut'iti an tanlhun ani, jant'u k'a'ilht'ut'iti mimpast'ank'an an ixcha'a kimPay!
17 Pus akxni tapastaklhicha an ixt'alhtanan li ts'o'muk'akanta, tan najunta: “¡Sawalh aklhitalh'amna an mincha'a'!”
18 An judiojnin tajuniy an Jesús:
―Li ch'unch'ach'a lay, ¿tisuncha akilamasuniyaw li t'ach'ip'ini li ch'unch'ach'a k'alat'i?
19 An Jesús jajuniy:
―K'alakt'ilhit'iti ani tajtan, walh chi wa la'at'utu wilhchan akyawcho'oya'.
20 Pus an judiojnin tajuniy:
―¿Wa la'at'utu wilhchani k'ayawch'o'oya'a? Ani tajtan t'up'uxamchaxan (46) k'ata yawkalh.
21 Pero an Jesús yucha an ixlakatunaja ixjuniy.
22 Xliyu akxni la'awcho'olhcha, an ixt'alhtanan tapastaklhi li chuncha ixnajunta, pus takiklaka'ilhi an tan ts'o'muk'akanta chi an ixchiwinti an Jesús.
An Jesús jamispa'ojoyi an lapanakni
23 Akxni la'acha'anka Jerusalén ixt'awnachalh an Jesús, la ixk'atan Paxku, ixluwk'ani takiklaka'ilh, mu ixtala'ts'incha tacha an tu'u ixlak'ilhtuy yu jantu wa tichicha lay ilhtuy.
24 Pero an Jesús jantu ixjalhiwilay, mu yucha ixjamispa'ojoy.
25 Yucha jantu xamati ixma'lhtask'iniy kajunilh tani ixlaycha xamati'. Mu yucha ixjamispani'ojoyi an ixjalhunutk'an an lapanakni.