5
Japasmilinti libro chi an Jas'at'a Borrego
1 Chi an yu sa'cha ixwilh laka putawlan yu puch'alhkatnankan ikma'la'ts'in an tan lhi'oxi ixmaka ixch'apata la'atam libro, ta'ukxput'uyi ts'o'kanta chi lakatujuni oxi ixch'axpach'ikanta an libro.
2 Chi ikla'ts'ilh pumatam angelh yu k'ut'ilh yu p'as ixnajun:
―¿Tisiyuchacha yu t'acha'an li lay kapux'otlhi an libro chi li kach'axpax'otmaj'alh an la'atujun yu puch'axpach'ikanta?
3 Pero nin an lakt'iyan nin an lakaat'un nin an ixtan'api an lakaat'un, jantu xamati lay ixpux'ot'a an libro chi jantu layi masi wa katala'ts'ilhcha.
4 Chi kit'in sawalhcha xak'alhun, mu jantu xamati ixla'cha'ankan yu t'acha'an kapux'otlhi an libro chi li lay kapunawlh chi li lay kala'ts'ilh.
5 Pero xapumatam an tatanin kijuniy:
―Jant'u k'a'alhu, mu an lión yu minchalh la ixt'alalhila'ts'inin an Judá, yu ixjataxiyak an David, yucha lhajatachalhcha, para li lay kapux'otlhi an libro chi li lay kala'ch'axpax'otmaj'alh an la'atujun yu puch'axpach'ikanta.
6 Wa chuncha ijkalakawanalh chi ikla'ts'in ixtan'ajnichak'an an putawlan yu puch'alhkatnankan, chi an ixt'at'ink'an tuchichun yu tala'ajunta, chi an laktatanin, ixyalh la'atam Jas'at'a Borrego, tacha wa ixma'nikantacha ixtasuy. Chi ma'atujun ix'a'alo'oti ixlit'ajun chi la'atujun ixla'chulh, yucha nawputun an la'atujun takuwin yu ixnawin an Dios yu jamala'achakanta ta ixlijalhi'ay an lakaat'un.
7 An borrego stalh la'alhi an yu sa' ixwilh laka putawlan yu puch'alhkatnankan chi ma'lhtaylhcha an libro an yu sa' ixch'apata tan lhi'oxi ixmaka'.
8 Chi akxni jama'lhtayanalhcha an libro, an ixt'at'ink'an tuchichun yu tala'ajunta chi an ixpumap'uxamt'at'ik'an tatanin tatatso'ottalhcha la ixlakapu an Jas'at'a Borrego. Si ixtalaklhit'ajun ix'arpajk'an chi si ixtalaklhi'anta copa de oro ixlaj'a'tsamanta cencia, yucha jumputun an ixtapaynitk'an an yu takiklaka'iy Dios,
9 chi ixtalakmilhpaycha la'atam sast'i milhpat. Ixtanajun:
Uxint'i t'ach'ip'ini li k'ajama'lht'ayani an libro.
Ch'i li k'ala'x'otnini an yu puch'axpach'ikanta.
Mu uxint'i ma'nik'a chi an la mijak'alhni jama'alht'axt'ut'i an lapanakni
para li ixnawin Diosi katawalh, ta kilhmakchux ta'alin an lapanakni,
ta kilhmakchux chiwinti, ta lakachux la'acha'an chi ta kilhmakchux lhich'alhkat.
10 Ja'ilht'u li ixrejnin an kiDiosk'ani katawalh
chi isacerdotejnin chi li katach'alhkatnalhi ani ix'ukxni lakaat'un.
11 Chi iklaka'ampalh, wanaj lhuw angelhnini ijka'alha'asmatlhi, ixtuntala'acho'ochak'an an putawlan yu puch'alhkatnankan chi an tuchichun yu tala'ajunta chi an laktatanincha ixtayanalh. Lhuw tukani ixtayanalh, wanaj la'alhuw millón.
12 Chi p'asi ixtachiwiniy ixtanajun:
¡An Jas'at'a Borrego an yu ma'nikalh t'acha'ani li kala'a'ilhi an lhich'alhkat,
chi an tanlhun yu laj'oxi, chi an jatapast'ak'at, chi an tachaput,
chi li kalhila'sikalh, chi li ayi kala'ts'inkalh chi kamilhpanikalh!
13 Chi chux yu ilhtukanta yu alinachalh an lakt'iyan, chi ix'ukxni an lakaat'un, chi ixtan'api an lakaat'un, chi an alamalh, chi chux yu ancha lak'alin, ik'asmat'a ixtanajun:
¡An yu wilh laka putawlan yu puch'alhkatnankan,
chi an Jas'at'a Borrego,
kajamilhpanikalh, kajalhila'sikalh, chi ayi kajala'ts'inkalh
chi ixpujun'alhincha katach'alhkatnalh!
14 An ixt'at'ink'an tuchichun yu tala'ajunta ixtanajun:
―¡Chunchacha kawalh!
Chi an ixpumap'uxamt'at'ik'an tatanin tatatso'ottanilhcha chi tatamuntitanilhcha, chi tala'ts'ilhcha li yucha ayi an yu ixpujun'alhincha li t'ajun.