Si-nu̱guanꞌ Yanꞌanj Xa̱ngaꞌ San Juan 4

Jesús y la mujer samaritana

1 Hué dan ni̱ xacaj Jesús cuenta sisi̱ gunun ni tsínj fariseo sisi̱ hua gahuin nico ni ngüi̱ nicoꞌ Jesús daj nga̱ Juan. Ni̱ nico doj ni ngüi̱ gataꞌ nnee, guiꞌyaj Jesús daj nga̱ Juan nej. 2 (Sani̱ sé Jesús huin si duguataꞌ nnee ni ngüi̱ mánj. Maan ni tsínj nicoꞌ sij duguataꞌ nnee ni ngüi̱ aj.) 3 Ni̱ ngaa xacaj Jesús cuenta sisi̱ gunun ni tsínj fariseo nuguanꞌ daj, ni̱ gahui sij estado Judea. Ni̱ gachin sij ganꞌanj sij estado Galilea. 4 Sani̱ hua nia̱n si ga̱chin sij estado Samaria ga̱nꞌanj sij. 5 Ni̱ guisíj sij ꞌngo̱ xumanꞌ ngaj estado Samaria huin ꞌngo̱ xumanꞌ gu̱ꞌnaj Sicar. Ni̱ ni̱chrunꞌ ngaj xumanꞌ daj duꞌua yoꞌój gaꞌuiꞌ tsínj gu̱ꞌnaj Jacob rian daꞌníj síꞌ José ngaa ná. 6 Yuꞌuj daj nu̱n ꞌngo̱ pozo nnee ganj Jacob ngaa ná. Ni̱ guininaj Jesús huaj sij chrej. Ni̱ ganꞌanj ga̱ne sij naránj ruhua sij duꞌua pozo daj. Ni̱ síj gaxuj.

7 Ngaa ni̱ gaꞌna̱ꞌ ꞌngo̱ yunꞌunj xa̱na samaritana pozo daj gui̱ri únꞌ nnee. Ni̱ gataj Jesús rian únꞌ:

―Ri̱qui re̱ꞌ do̱j nnee go̱ꞌōj. ―Daj gataj Jesús.

8 Ni̱ hua ganꞌanj ni tsínj nicoꞌ Jesús ganꞌanj gui̱ran ni síꞌ si xa̱ ni sij xumanꞌ daj.

9 Ngaa ni̱ gataj yunꞌunj xa̱na samaritana daj gunun Jesús:

―Tsínj israelita huín re̱ꞌ. Ni̱ u̱n sin huin ni̱ achínj re̱ꞌ nnee go̱ꞌo re̱ꞌ riānj huīnj ꞌngo̱ yunꞌunj xa̱na samaritana únj. ―Daj gataj únꞌ si nitaj si nicaj dugüiꞌ ni tsínj israelita nga̱ ni tsínj samaritana.

10 Ngaa ni̱ gataj Jesús:

―Sisi̱ xa̱caj re̱ꞌ cuenta xiꞌí sinduj gui̱ꞌyaj Yanꞌanj xiꞌí re̱ꞌ, ni̱ sisi̱ gui̱niꞌí re̱ꞌ u̱n tsínj achínj nnee rián re̱ꞌ, ngaa ni̱ ga̱chinj re̱ꞌ nnee rian sij, ni̱ ri̱qui sij nnee ꞌyaj si ga̱ ni̱ꞌnaꞌ ni̱ganj re̱ꞌ nga̱ Yanꞌanj anj. ―Gataj Jesús gunun únꞌ.

11 Ngaa ni̱ gataj yunꞌunj xa̱na daj:

―Ni̱ a̱ ꞌngo̱ rasu̱n nitaj nicáj re̱ꞌ gui̱ri re̱ꞌ nnee mánj. Ni̱ ducu gu̱nun pozo nan. Ni̱ ni̱ a̱ gui̱riꞌ re̱ꞌ ri̱qui re̱ꞌ nnee ꞌyaj si ga̱ ni̱ꞌnāj ni̱ganj nej únj. 12 Ni̱ xi néꞌ Jacob duna pozo nan rian ni únj. Ni̱ goꞌo ni da̱ꞌnij manꞌan síꞌ nnee nu̱n chruhua pozo nan nga̱ dán síꞌ xucu nej. Huin achíj re̱ꞌ doj daj nga̱ síꞌ ruhuá re̱ꞌ níꞌ. ―Daj gataj yunꞌunj xa̱na daj gunun Jesús.

13 Ngaa ni̱ gataj Jesús gunun únꞌ:

―Daranꞌ ni ngüi̱ go̱ꞌo nnee nu̱n chruhua pozo nan, sani̱ na̱goꞌo ru̱huaꞌ yún ni sij nnee aj. 14 Sani̱ tsínj go̱ꞌo nnee ga̱ꞌuiꞌ manꞌānj, ni̱ nitaj a̱man na̱goꞌo sij nnee ga̱ mánj. Ni̱ da̱j rúnꞌ huin ꞌngo̱ pozo rian nachi nita ꞌueé nnee, ni̱ daꞌngaꞌ daj ga̱huin chruhua niman ꞌngo̱ tsínj go̱ꞌo nnee ga̱ꞌuiꞌ manꞌānj. Ni̱ ga̱ ni̱ꞌnaꞌ ni̱ganj tsínj daj nga̱ Yanꞌanj, gui̱ꞌyaj nnee daj. ―Daj gataj Jesús.

15 Ngaa ni̱ gataj yunꞌunj xa̱na daj:

―Señor, ri̱qui re̱ꞌ nnee daj go̱ꞌōj. Ngaa ni̱ si̱ nagoꞌo ru̱huaꞌ yūnj ga̱ mánj. Ni̱ si̱ gaꞌna̱ꞌ gui̱ri ru̱huaꞌ yūnj nnee pozo nan ga̱ mánj. ―Gataj únꞌ gunun Jesús.

16 Ngaa ni̱ gataj Jesús:

―Güi̱j ga̱quinj nica̱ re̱ꞌ, ni̱ ga̱ꞌnaꞌ nu̱ngüej é re̱ꞌ nan. ―Gataj Jesús gunun únꞌ.

17 Ngaa ni̱:

―Nitaj nicāj mánj. ―Gataj únꞌ.

Ngaa ni̱ gataj Jesús:

―Duguꞌna̱j gaꞌmí re̱ꞌ gatáj re̱ꞌ sisi̱ nitaj nica̱ re̱ꞌ. 18 Daj si síj u̱nꞌunꞌ nica̱ re̱ꞌ. Ni̱ tsínj nne nga̱ re̱ꞌ acuanꞌ, ni̱ sé nica̱ re̱ꞌ huin mánj. Xa̱ngaꞌ yya aꞌmí re̱ꞌ aj. ―Daj gataj Jesús.

19 Ngaa ni̱ gataj únꞌ:

―Señor, xacaj cuentāj sisi̱ huín re̱ꞌ ꞌngo̱ tsínj aꞌmi si-nu̱guanꞌ Yanꞌanj anj. 20 Ni̱ xi ni únj ni nicoꞌ ni síꞌ Yanꞌanj xiráj quij nan. Sani̱ ataj á re̱ꞌ huin ni é re̱ꞌ ni tsínj israelita sisi̱ urin xumanꞌ Jerusalén huin yuꞌuj ga̱ꞌue gui̱nicoꞌ néꞌ Yanꞌanj, ataj á re̱ꞌ. ―Gataj yunꞌunj xa̱na gunun Jesús.

21 Ngaa ni̱ gataj Jesús:

―Xicaꞌuīj, gu̱xuman ruhuá re̱ꞌ nuguanꞌ atā nan gu̱nun re̱ꞌ. Daj si hua ꞌngo̱ güi, ni̱ si̱ gahui a ni é re̱ꞌ chra̱ quij nan gui̱nicoꞌ a ni é re̱ꞌ chrej néꞌ. Ni̱ si̱ ganꞌanj án re̱ꞌ xumanꞌ Jerusalén gui̱nicoꞌ a ni é re̱ꞌ chrej néꞌ mánj. 22 Nun niꞌi ni é re̱ꞌ da̱j hua Yanꞌanj nicoꞌ a ni é re̱ꞌ mánj. Sani̱ niꞌi ni únj da̱j hua Yanꞌanj nicoꞌ ni únj. Daj si xiꞌí ni tsínj israelita ꞌna̱ꞌ na̱caj Yanꞌanj ni ngüi̱. 23 Sani̱ hua ꞌngo̱ güi sisi̱ ni ngüi̱ nicoꞌ xa̱ngaꞌ Yanꞌanj, ni̱ gui̱nicoꞌ ni sij Yanꞌanj ꞌngo̱ ducuánj na̱ca. Ni̱ yya̱j ni̱ ga̱xiꞌi ni ngüi̱ gui̱nicoꞌ xa̱ngaꞌ ni sij Yanꞌanj nga̱ niman ni sij. Daj si nanaꞌuiꞌ chrej néꞌ Yanꞌanj sisi̱ daꞌngaꞌ daj gui̱ꞌyaj néꞌ gui̱nicoꞌ néꞌ Yanꞌanj. 24 Ni̱ u̱n yuꞌuj huaj néꞌ, ni̱ nne Yanꞌanj xa̱ngaꞌ yuꞌuj daj. Daj si da̱j rúnꞌ huin ꞌngo̱ nane̱ sa̱ꞌ huin Yanꞌanj. Ni̱ ni ngüi̱ nicoꞌ Yanꞌanj, ni̱ hua nia̱n gui̱nicoꞌ xa̱ngaꞌ ni sij Yanꞌanj nga̱ niman ni sij. ―Daj gataj Jesús gunun yunꞌunj xa̱na daj.

25 Ngaa ni̱ gataj yunꞌunj xa̱na daj:

―Niꞌīnj sisi̱ ga̱ꞌnaꞌ tsínj ga̱nacaj ni ngüi̱ huin tsínj gu̱ꞌnaj Cristo. Ni̱ ngaa ga̱ꞌnaꞌ síꞌ, ni̱ na̱taꞌ yya síꞌ daranꞌ nuguanꞌ rian néꞌ. ―Gataj únꞌ.

26 Ngaa ni̱:

―Hué manꞌānj huin Cristo tsínj aꞌmi nga̱ re̱ꞌ nánj. ―Gataj Jesús.

27 Ngaa ni̱ hora daj ni̱ guisíj ni tsínj nicoꞌ Jesús. Ni̱ gara yanꞌanj ruhua ni sij xiꞌí si aꞌmi Jesús nga̱ ꞌngo̱ yunꞌunj xa̱na. Sani̱ ni̱ a̱ ꞌngo̱ ni sij nun na̱chínj snanꞌanj u̱n sin xi̱ꞌi gaꞌmi síꞌ nga̱ únꞌ. 28 Ngaa ni̱ duna yunꞌunj xa̱na daj si-siu̱ unj. Ni̱ ganꞌanj ga̱taj unj rian ni tsínj ma̱n xumanꞌ daj:

29 ―Ga̱nꞌanj néꞌ ni̱ gui̱niꞌi néꞌ ꞌngo̱ tsínj gataj gunūnj daranꞌ si guiꞌyā. Cristo huin sij, ruhua á re̱ꞌ níꞌ. ―Daj gataj yunꞌunj xa̱na daj.

30 Ngaa ni̱ gahui ni tsínj daj ganꞌanj ni̱ꞌyaj ni sij rian nne Jesús.

31 Ni̱ ngaa achin gui̱sij ni sij, ni̱ guiꞌyaj fuerza ni tsínj nicoꞌ Jesús sisi̱ xa̱ síꞌ. Ni̱ gataj ni sij gunun Jesús:

―Rabí, xa̱ re̱ꞌ aj. ―Daj gataj ni sij.

32 Sani̱ gataj Jesús gunun ni sij:

―Hua si xa riānj anj. Sani̱ nun niꞌi ni é re̱ꞌ da̱j hua-áꞌ. ―Gataj Jesús.

33 Ngaa ni̱ gaxi̱ꞌi ni tsínj nicoꞌ Jesús nachínj snanꞌanj ni sij dugüiꞌ ni sij. Ni̱ gataj ni sij:

―Hua ꞌngo̱ ngüi̱ gaꞌna̱ꞌ nicaj xa sij, ruhua á re̱ꞌ níꞌ. ―Daj gataj ni sij.

34 Sani̱ gataj Jesús:

―Da̱j rúnꞌ chra xāj huin si gui̱ꞌyā si huin ruhua si gaꞌníj gaꞌnāj. Ni̱ daꞌngaꞌ daj huin ruhuāj ga̱nahuij si-sūnj, gui̱ꞌyā aj. 35 Ataj ni é re̱ꞌ: “Achin yacuanꞌanj yahui̱, ngaa ni ga̱ꞌninꞌ néꞌ strigo.” Daj ataj ni é re̱ꞌ. Sani̱ atā gu̱nun a ni é re̱ꞌ sisi̱ na̱chi nicaj á re̱ꞌ rian án re̱ꞌ gui̱niꞌyaj á re̱ꞌ ni ngüi̱ sisi̱ da̱j rúnꞌ hua nnaa̱ strigo hua ni ngüi̱. Daj si guisíj gamij nnaa̱ strigo ga̱ꞌninꞌ néꞌ. 36 Tsínj ri nnaa̱ strigo daj, ni̱ na̱huin raꞌa sij duꞌue̱ sij. Ni̱ naguiꞌyaj chreꞌ sij ni ngüi̱ ga̱ne ni̱ganj nga̱ Yanꞌanj. Ngaa ni̱ uyan ga̱huin nia̱ꞌ ruhua tsínj unu̱n nga̱ tsínj aꞌninꞌ nej. 37 Xa̱ngaꞌ si ataj ni ngüi̱: “Ni̱ni tsínj unu̱n, ni̱ ni̱ni tsínj aꞌninꞌ nej.” Daj ataj ni ngüi̱. 38 Ni̱ gaꞌnī ga̱nꞌanj án re̱ꞌ sisi̱ ga̱ꞌmi a ni é re̱ꞌ nuguanꞌ sa̱ꞌ rian ni ngüi̱. Sani̱ ango ni tsínj hua ganꞌanj guiꞌyaj sun. Ni̱ rian guiꞌyaj sun nucuaj ni sij, ni̱ ráj xina̱ ni ngüi̱ ꞌyaj si-nu̱guanꞌ ni é re̱ꞌ. ―Daj gataj Jesús gunun ni tsínj nicoꞌ sij.

39 Ni̱ guxuman ruhua nico ni ngüi̱ ma̱n xumanꞌ Samaria niꞌyaj ni sij Jesús xiꞌí nuguanꞌ nataꞌ yunꞌunj xa̱na daj rian ni sij. Daj si nataꞌ unj rian ni sij: “Gataj Jesús daranꞌ si guiꞌyā.” Daj nataꞌ unj rian ni sij. 40 Hué dan ni̱ guisíj ni tsínj samaritano rian nne Jesús. Ni̱ gachínj jniꞌyaj ni sij rian síꞌ sisi̱ gu̱na síꞌ nga̱ ni sij. Ngaa ni̱ gunáj síꞌ hui̱j güi xumanꞌ daj. 41 Ni̱ gahuin nico ni ngüi̱ guxuman ruhua gunun si-nu̱guanꞌ manꞌan Jesús. 42 Ni̱ gataj ni sij gunun yunꞌunj xa̱na daj:

―Sé urin si nataꞌ manꞌán re̱ꞌ rian ni únj ꞌyaj si guxuman ruhua ni únj niꞌyaj únj manꞌan sij mánj. Sani̱ yya̱j ni̱ gunun ni únj si gaꞌmi sij. Ni̱ niꞌi ni únj sisi̱ hué sij huin Cristo tsínj gui̱ꞌyaj ga̱nani ni ngüi̱ ma̱n chruhua xungüi̱. ―Daj gataj ni sij.

Jesús sana al hijo de un noble

43 Ni̱ ngaa guisíj hui̱j güi, ni̱ gahui Jesús xumanꞌ daj ganꞌanj sij estado Galilea. 44 Daj si hua gataj Jesús sisi̱ nitaj si aꞌmi sa̱ꞌ ni tsínj rian ꞌngo̱ tsínj aꞌmi si-nu̱guanꞌ Yanꞌanj sisi̱ huin ni sij ni tsínj xa̱nj mánj.

45 Ni̱ ngaa gaꞌna̱ꞌ Jesús estado Galilea, ni̱ nahuin raꞌa sa̱ꞌ ni tsínj ma̱n estado daj manꞌan síꞌ xiꞌí si guiniꞌi ni sij si sa̱ꞌ nico guiꞌyaj síꞌ xumanꞌ Jerusalén. Daj si ganꞌanj ni sij guiꞌyanj da nej.

46 Ngaa ni̱ gaꞌna̱ꞌ ru̱huaꞌ yún Jesús xumanꞌ Caná huin xumanꞌ ngaj estado Galilea nej. Ni̱ xumanꞌ daj huin rian ganahuin nnee vino, guiꞌyaj sij aj. Ni̱ yuꞌuj daj nne ꞌngo̱ tsínj nicaj sun rian rey. Ni̱ aꞌnanꞌ daꞌníj snoꞌo sij. 47 Ni̱ ngaa gunun tsínj nicaj sun daj sisi̱ gahui Jesús estado Judea gaꞌna̱ꞌ sij estado Galilea, ni̱ ganꞌanj sij rian nne Jesús. Ni̱ gaꞌmi yaco sij rian síꞌ sisi̱ ga̱nꞌanj síꞌ ducuá sij. Ngaa ni̱ jna̱huin daꞌníj sij, gui̱ꞌyaj síꞌ si do̱j ni̱ ga̱huiꞌ daꞌníj síꞌ, ataj síꞌ. 48 Ngaa ni̱ gataj Jesús:

―Ngaa nun gui̱niꞌi a ni é re̱ꞌ si sa̱ꞌ nico ꞌyā, ni̱ nun gu̱xuman ruhua á re̱ꞌ ni̱ꞌyaj á re̱ꞌ yūnj mánj. ―Daj gataj Jesús.

49 Sani̱ gataj tsínj nicaj sun daj:

―Señor, ga̱nꞌanj néꞌ si ruhua ga̱huiꞌ daꞌnī aj. ―Daj gataj sij.

50 Ngaa ni̱ gataj Jesús:

―Güi̱j na̱nꞌ ducuá re̱ꞌ si nne ni̱ꞌnaꞌ daꞌníj re̱ꞌ nánj. ―Daj gataj Jesús.

Ni̱ guxuman ruhua tsínj daj nuguanꞌ gataj Jesús rian sij. Ni̱ na̱nꞌ sij ducuá sij.

51 Ni̱ ngaa huaj sij nasíj sij ducuá sij, ni̱ gahui ni tsínj ꞌyaj sun rian sij. Ni̱ gataj ni sij:

―Nne ni̱ꞌnaꞌ daꞌníj re̱ꞌ nánj. ―Daj gataj ni sij.

52 Ngaa ni̱ nachínj snanꞌanj tsínj daj u̱n hora gaxi̱ꞌi nahuin daꞌníj sij.

Ngaa ni̱ gataj ni sij:

―Gaꞌ ꞌngo̱ diꞌni̱ guqui ganiquinꞌ gachiꞌ. ―Daj gataj ni sij.

53 Ngaa ni̱ xacaj cuenta tsínj daj sisi̱ hué gue̱ hora daj huin si gataj Jesús gunun sij sisi̱ nne ni̱ꞌnaꞌ daꞌníj sij. Ngaa ni̱ guxuman ruhua ni du̱cua sij niꞌyaj ni sij Jesús. 54 Ni̱ hué nan guisíj hui̱j si sa̱ꞌ nico guiꞌyaj Jesús ngaa gahui sij estado Judea ganꞌanj sij estado Galilea.