Si-nu̱guanꞌ Yanꞌanj Xa̱ngaꞌ San Lucas 24

La resurrección

1 Ni̱ ngaa ruhua guere̱ngaꞌ ni̱ganꞌ acuanꞌ güi gudungu, ngaa ni̱ ganꞌanj ni yunꞌunj xa̱na daj rian yuꞌuj gachinꞌ ni sij níman. Ni̱ nicaj ne gasiti guinꞌ da̱j hua naguiꞌyaj ne ganꞌanj ne. Ni̱ ganꞌanj ango ni yunꞌunj xa̱na nga̱ ne nej. 2 Ni̱ nariꞌ ne sisi̱ nitaj si ngaj yej xa̱chij hua ránj rian huej daj. 3 Ni̱ gatúj ne chruhua huej. Sani̱ nun na̱riꞌ ne níman Señor Jesús mánj. 4 Ni̱ nun nariꞌ ruhua ne u̱n sin gahuin. Ngaa ni̱ niquinꞌ nu̱guanꞌan hui̱j tsínj rian ne. Ni̱ ran atsij nu̱n nu̱ngüej síꞌ. 5 Ni̱ guxuꞌuiꞌ ne. Ni̱ gaꞌ nitu rian ne rian yoꞌój. Xiꞌí daj ni̱ gataj nu̱ngüej tsínj daj gunun ne:

―Ni̱ u̱n sin huin ni̱ nanaꞌuiꞌ a ni é re̱ꞌ tsínj hua ni̱ꞌnaꞌ scanij ni níman únj. 6 Nitaj si ngaj sij yuꞌuj nan ga̱ mánj. Daj si hua ganáꞌnij sij. Na̱nun ruhua á re̱ꞌ si gataj sij rian án re̱ꞌ ngaa gane sij estado Galilea. 7 Ni̱ gataj sij gunun a ni é re̱ꞌ: “Hua nia̱n sisi̱ na̱gaꞌuiꞌ ni sij manꞌānj raꞌa ni tsínj ꞌyaj gaquinꞌ. Ni̱ ga̱ri ni sij gaquíj manꞌānj rian rugutsi̱. Ngaa ni̱ ga̱naꞌnī ngaa gui̱sij hua̱ꞌnij güi huīnj daꞌníj ni ngüi̱.” Hué daj gataj Jesús gunun a ni é re̱ꞌ. ―Daj gataj nu̱ngüej tsínj daj gunun ni yunꞌunj xa̱na.

8 Ngaa ni̱ nanun ruhua ne niꞌyaj ne nuguanꞌ gaꞌmi Jesús. 9 Ngaa ni̱ nanica̱j ne rian huej daj. Ni̱ nataꞌ ne ni nuguanꞌ daj rian ni xa̱n ni tsínj aꞌmi si-nu̱guanꞌ Yanꞌanj nga̱ rian ango ni ngüi̱ nej. 10 Ni̱ ni yunꞌunj xa̱na daj huin María Magdalena nga̱ Juana nej, María nni Jacobo nej, ango ni yunꞌunj xa̱na nej. Ni̱ nataꞌ ne nuguanꞌ daj rian ni tsínj gaꞌmi si-nu̱guanꞌ Jesús rian ni ngüi̱. 11 Sani̱ ngaa gunun ni sij nuguanꞌ daj, ni̱ gani ruhua ni sij sisi̱ aꞌmi sinúnj ni yunꞌunj daj. Ni̱ nun gu̱xuman ruhua ni sij si gataj ne. 12 Sani̱ naxu̱man Pedro gunánj sij ganꞌanj sij rian huej. Ni̱ gaꞌ nitu sij niꞌyaj sij chruhua yuꞌuj daj. Ni̱ ngaj urin atsij chruhua huej daj guiniꞌi sij. Ngaa ni̱ nanica̱j sij na̱nꞌ sij ducuá sij. Sani̱ nun riꞌ ruhua sij u̱n sin gui̱ꞌyaj sij nga̱ si guiniꞌi sij.

En el camino a Emaús

13 Ni̱ hué güi daj ni̱ huaj hui̱j tsínj nicoꞌ Jesús ganꞌanj nu̱ngüej sij ꞌngo̱ xumanꞌ gu̱ꞌnaj Emaús. Ni̱ huin ngaj-áꞌ xumanꞌ Jerusalén ꞌngo̱ si xa̱n kilómetro. 14 Ni̱ nari snanꞌanj nu̱ngüej sij huaj sij xiꞌí si gahuin guiranꞌ Jesús. 15 Ni̱ diaj hua gue̱ aꞌmi nu̱ngüej sij, ni̱ gahuin ni̱chrunꞌ Jesús rian nu̱ngüej sij. Ni̱ chéj Jesús nga̱ nu̱ngüej sij. 16 Sani̱ nu̱nj si niꞌyaj nu̱ngüej sij manꞌan síꞌ, sani̱ nun gaꞌuiꞌ Yanꞌanj sisi̱ na̱niꞌi nu̱ngüej sij sisi̱ Jesús huin huaj nga̱ nu̱ngüej sij. 17 Ngaa ni̱ nachínj snanꞌanj Jesús nu̱ngüej sij. Ni̱ gataj sij:

―Ni̱ u̱n sin huin si aꞌmi nu̱ngüej é re̱ꞌ huaj á re̱ꞌ chrej únj. Ni̱ u̱n sin huin ni̱ nani ruhua á re̱ꞌ únj. ―Daj gataj Jesús.

18 Ngaa ni̱ gataj ꞌngo̱ tsínj daj ꞌngo̱ tsínj gu̱ꞌnaj Cleofas:

―Hua gaꞌi̱ tsínj ꞌna̱ꞌ anéj chrej nne xumanꞌ Jerusalén ni güi nan. Ni̱ u̱n sin huin ni̱ urin manꞌán re̱ꞌ nun niꞌi da̱j gahuin ni güi gachin nan únj. ―Daj gataj Cleofas.

19 Ngaa ni̱:

―Ni̱ u̱n sin gahuin únj. ―Gataj Jesús.

Ngaa ni̱ gataj nu̱ngüej sij:

―Hué Jesús nazareno gahuin ꞌngo̱ tsínj gaꞌmi si-nu̱guanꞌ Yanꞌanj rian ni ngüi̱. Ni̱ guiꞌyaj sa̱ꞌ sij. Ni̱ ducu nucuaj si-nu̱guanꞌ sij rian Yanꞌanj nga̱ rian daranꞌ ni ngüi̱ nej. 20 Ni̱ gaꞌninꞌ sun ni chrej aꞌninꞌ nga̱ ni tsínj nicaj sun sisi̱ ga̱huiꞌ Jesús gui̱nicoꞌ sij rian rugutsi̱. 21 Ni̱ ganaꞌuij ni únj sisi̱ hué sij huin tsínj ꞌna̱ꞌ na̱caj ni ngüi̱ israelita. Sani̱ guiranꞌ sij sayun daj. Ni̱ yya̱j guisíj hua̱ꞌnij güi si gahuiꞌ sij. 22 Ni̱ guixigui̱n ganꞌanj go̱ꞌngo yunꞌunj xa̱na nicaj dugüiꞌ nga̱ ni únj rian gachinꞌ Jesús. Ni̱ gara yanꞌanj ruhua ni únj xiꞌí si gataj ne gunun únj. 23 Ni̱ ri̱an nun nariꞌ ne Jesús, ni̱ nanica̱j ne rian ni únj. Ni̱ nataꞌ ne gunun ni únj sisi̱ gurugüiꞌ hui̱j ángel rian ne. Ni̱ gataj nu̱ngüej ángel daj gunun ne sisi̱ hua ni̱ꞌnaꞌ Jesús. 24 Hué dan ni̱ ganꞌanj go̱ꞌngo ni dugüiꞌ ni únj rian gachinꞌ Jesús. Ni̱ nariꞌ aninꞌ sij da̱j rúnꞌ gataj ni yunꞌunj daj. Sani̱ nun guiniꞌi aninꞌ sij manꞌan Jesús mánj. ―Daj gataj nu̱ngüej sij.

25 Ngaa ni̱ gataj Jesús gunun nu̱ngüej sij:

―Tsínj nun acaj cuenta huin nu̱ngüej é re̱ꞌ. Ni̱ naꞌue gu̱xuman yoo̱ ruhua nu̱ngüej é re̱ꞌ nga̱ si garun ni tsínj gaꞌmi si-nu̱guanꞌ Yanꞌanj asi̱j ná. 26 Sé si xa̱ngaꞌ si hua nia̱n gui̱ranꞌ Cristo sayun ngaa achin na̱tu sij rian hua ꞌueé xataꞌ ga̱ne sij únj. ―Daj gataj Jesús.

27 Ngaa ni̱ gaxi̱ꞌi sij gaꞌmi sij xiꞌí si-nu̱guanꞌ Moisés nga̱ si-nu̱guanꞌ ango ni tsínj gaꞌmi si-nu̱guanꞌ Yanꞌanj asi̱j ná. Ni̱ gataj sij gunun nu̱ngüej síꞌ daranꞌ si ataj si-nu̱guanꞌ Yanꞌanj xiꞌí manꞌan sij.

28 Ni̱ ngaa guisíj nu̱ngüej sij xumanꞌ huaj nu̱ngüej sij, ni̱ guiꞌyaj Jesús sisi̱ ga̱taꞌ dian síꞌ ga̱nꞌanj síꞌ rian nu̱ngüej sij. 29 Sani̱ guereque̱ nu̱ngüej sij sisi̱ gu̱naj síꞌ. Ni̱ gataj nu̱ngüej sij:

―Gu̱ná re̱ꞌ nga̱ únj si hua gahuin diꞌni̱, ni̱ hua guini̱ nej. ―Gataj nu̱ngüej sij gunun Jesús.

Ngaa ni̱ gatúj Jesús guna síꞌ nga̱ nu̱ngüej sij.

30 Ni̱ ngaa nne Jesús rian mesa nga̱ nu̱ngüej sij, ni̱ guidaꞌa síꞌ chrachrúnj. Ni̱ gaꞌuiꞌ síꞌ si guruhua Yanꞌanj. Ni̱ guraꞌ daꞌaj síꞌ gaꞌuiꞌ síꞌ raꞌa nu̱ngüej sij. 31 Ngaa ni̱ hué gue̱ hora daj xacaj cuenta nu̱ngüej sij guiniꞌi nu̱ngüej sij sisi̱ Jesús huin. Sani̱ hué hora daj ni̱ ganꞌanj niꞌya yanꞌanj síꞌ rian nu̱ngüej sij. 32 Ngaa ni̱ nachínj snanꞌanj nu̱ngüej manꞌan sij dugüiꞌ sij. Ni̱ gataj nu̱ngüej sij:

―Xa̱ngaꞌ ni̱ gahuin nia̱ꞌ róꞌ ngaa gaꞌmi sij nga̱ néꞌ ngaa huaj néꞌ chruhua chrej. Ni̱ gahuin nia̱ꞌ ruhua néꞌ ngaa digyán sij si-nu̱guanꞌ Yanꞌanj riúnꞌ nej. ―Daj gataj nu̱ngüej sij.

33 Ngaa ni̱ hué hora daj, ni̱ naxu̱man nu̱ngüej sij ganꞌanj nu̱ngüej sij xumanꞌ Jerusalén. Ni̱ nariꞌ nu̱ngüej sij xa̱n ni tsínj mán nahuin yuꞌ nga̱ ni dugüiꞌ ni síꞌ nej. 34 Ni̱ gataj ni síꞌ:

―Xa̱ngaꞌ ni̱ ganáꞌnij Señor. Ni̱ gurugüiꞌ sij rian Simón. ―Daj gataj ni sij.

35 Ngaa ni̱ nataꞌ nu̱ngüej sij da̱j gahuin guiniꞌi nu̱ngüej sij Jesús chruhua chrej. Ni̱ nataꞌ nu̱ngüej sij da̱j naniꞌi nu̱ngüej sij Jesús ngaa guraꞌ daꞌaj síꞌ chrachrúnj gaꞌuiꞌ síꞌ xa̱ nu̱ngüej sij.

Jesús se aparece a los discípulos

36 Ni̱ ngaa hua gue̱ aꞌmi ni sij nuguanꞌ daj, ni̱ gurugüiꞌ Jesús ganiquinꞌ sij scanij ni sij. Ni̱ gataj síꞌ gunun ni sij:

―Ga̱huin dinꞌinj ruhua á re̱ꞌ aj. ―Daj gataj Jesús.

37 Ngaa ni̱ ducu guxuꞌuiꞌ ni sij. Ni̱ gani ruhua ni sij sisi̱ guiniꞌi ni sij ꞌngo̱ staꞌnaj. 38 Sani̱ gataj Jesús:

―Ni̱ u̱n sin huin ni̱ nani ruhua á re̱ꞌ únj. Ni̱ u̱n sin huin ni̱ nitaj si mán yya ruhua niman án re̱ꞌ únj. 39 Ni̱ꞌyaj á re̱ꞌ raꞌāj nga̱ dacō. Ni̱ xa̱caj á re̱ꞌ cuenta sisi̱ hué manꞌānj huin. Gui̱daꞌa á re̱ꞌ, ni̱ ni̱ꞌyaj á re̱ꞌ. Daj si ꞌngo̱ staꞌnaj nitaj nne̱ cúj da̱j rúnꞌ hua manꞌānj nan mánj. ―Daj gataj Jesús.

40 Ni̱ ngaa guisíj gaꞌmi Jesús nuguanꞌ daj, ni̱ digyán sij raꞌa sij nga̱ dacój sij rian ni síꞌ.

41 Sani̱ nun gu̱xuman ruhua ni sij xiꞌí si ducu huin nia̱ꞌ ruhua ni sij. Ni̱ garáj yanꞌanj ruhua ni sij nej. Ngaa ni̱ nachínj snanꞌanj Jesús ni sij. Ni̱ gataj síꞌ:

―Nicaj á re̱ꞌ si xo̱ꞌ níꞌ. ―Daj gataj Jesús.

42 Ngaa ni̱ gaꞌuiꞌ ni sij do̱j nnee̱ xucuaj nitin nga̱ do̱j gatsiꞌ xutan xa síꞌ. 43 Ni̱ guidaꞌa sij, ni̱ xa sij rian ni síꞌ. 44 Ngaa ni̱ gataj sij:

―Hué nan huin nuguanꞌ gaꞌmī nga̱ ni é re̱ꞌ ngaa ganēj nga̱ á re̱ꞌ. Ni̱ gatā gunun a ni é re̱ꞌ sisi̱ hua nia̱n ga̱huin yya ni nuguanꞌ xiꞌīj da̱j rúnꞌ garun Moisés nga̱ ni tsínj gaꞌmi si-nu̱guanꞌ Yanꞌanj asi̱j ná nga̱ ni tsínj garun libro Salmo nej. ―Daj gataj Jesús.

45 Hué dan ni̱ gara daꞌngaꞌ ruhua ni sij si ataj si-nu̱guanꞌ Yanꞌanj, guiꞌyaj Jesús. 46 Ni̱ gataj Jesús:

―Gataj si-nu̱guanꞌ Yanꞌanj sisi̱ gui̱ranꞌānj sayun, huīnj Cristo. Ni̱ ga̱huīj. Sani̱ ga̱naꞌnī chra̱ hua̱ꞌnij güi. 47 Ngaa ni̱ ga̱ꞌmi ni sij ni nuguanꞌ sa̱ꞌ xiꞌīj rian daranꞌ ni ngüi̱ ma̱n chruhua xungüi̱. Ngaa ni̱ ga̱nani ruhua ni sij xiꞌí si-ga̱quinꞌ ni sij na̱nicoꞌ ni sij Yanꞌanj. Hué dan ni̱ gui̱nicaj Yanꞌanj ꞌngo̱ niman nico xiꞌí si-ga̱quinꞌ ni sij. Ni̱ ga̱xiꞌi ni sij xumanꞌ Jerusalén na̱taꞌ ni sij nuguanꞌ da aj. 48 Ni̱ huin a ni é re̱ꞌ ni tsínj guiniꞌi daranꞌ si guiꞌyā. Ngaa ni̱ ga̱ꞌue gui̱niquinꞌ a ni é re̱ꞌ na̱taꞌ a ni é re̱ꞌ xiꞌí ni nuguanꞌ sa̱ꞌ nan. 49 Ngaa ni̱ ri̱quīj Espíritu Santo rian ni é re̱ꞌ da̱j rúnꞌ gataj yya chrē rian án re̱ꞌ. Sani̱ gu̱na á re̱ꞌ xumanꞌ Jerusalén nan da na̱huin raꞌa na̱riꞌ nucuaj niman án re̱ꞌ, gui̱ꞌyaj Yanꞌanj. ―Daj gataj Jesús gunun ni sij.

La ascensión

50 Ngaa ni̱ nicaj Jesús ni sij ganꞌanj síꞌ xumanꞌ Betania. Ngaa ni̱ nachi nicaj síꞌ raꞌa síꞌ. Ni̱ gachínj jniꞌyaj síꞌ rian Yanꞌanj sisi̱ gui̱ꞌyaj sa̱ꞌ Yanꞌanj nga̱ ni sij. 51 Ni̱ diaj hua gue̱ aꞌmi sa̱ꞌ síꞌ daj, ni̱ gahuin ni̱ni síꞌ rian ni sij. Ni̱ na̱nꞌ síꞌ xataꞌ, guiꞌyaj Yanꞌanj. 52 Ngaa guisíj gaꞌmi sa̱ꞌ ꞌueé ni sij xiꞌí Jesús, ni̱ nanica̱j ni sij ganꞌanj ni sij xumanꞌ Jerusalén. Ni̱ ducu gahuin nia̱ꞌ ruhua ni sij. 53 Ni̱ ni̱ganj mán ni sij nuhui nico gaꞌmi sa̱ꞌ ni sij rian Yanꞌanj. Ni̱ gataj ni sij sisi̱ sa̱ꞌ ꞌyaj Yanꞌanj anj. Amén.