3
Tomo Isileli waila Yolidan silopanaisi
1 Malala kikiuna koina, Yosuwa mekanakavao tomo Isileli meuloili sitolo Sitim silogabaen, kabo silau waila Yolidan koina sigogo sisanasana lopanaisi kaiwena.
2 Kaliyate yaiyona koina, kabo tobaguna silotakikili ali kaba gogone koina.
3 Yo siwalo tomo kolili siwaloba, “Saugana tem topwaoli siya Libai ana boda wagitaili Yeoba ala Yaubada ana kelabilabin kamwasana kana dedewaga sikewai, ami kaba miya kwalogabaegili na kwamuliya.
4 Kabo kamwasa siyakena-yagimiu kaiwena nige sauga yabo kwalalaoma bwaite dedeinane koina. Tabu kwalalau kelabilabin kamwasana kana dedewaga salina mena kami mwayaga iyai tupwana besiele kilomita kaigeda.”
5 Kabo Yosuwa iwalo tomo kolili iwaloba, “Kwaeyakayakasisi-yagimiu, kaiwena bwaliga Yeoba ginauli kaba nuwapwanopwano kani ipaisowai luwaluwalila mena.”
6 Yosuwa tabe iwalo topwaoli kolili iwaloba, “Kelabilabin kamwasana kana dedewaga wakalai kwabaguna tomo manli mena.” Kabo sipaisowa besiele Yosuwa ana walo.
7 Yeoba iwalolau Yosuwa koina iwaloba, “Kaliyate kabona esam yapei-seyani boda Isileli manli mena na sikatai yau mekaukava kowa, besiele baguna yau mekaukava Mosese.
8 Kuwalo topwaoli siya kelabilabin kamwasana kana dedewaga kana tokewa kolili kuba, ‘Saugana tem kwayawatagili waila Yolidan dedeina mena kwalau kwatolo waila kalona mena.’ ”
9 Kabo Yosuwa iwalo tomo Isileli kolili iwaloba, “Kwalaoma bwaite koina Yeoba ala Yaubada ana walo yayawasa tabenalan.
10-13 Ginauline bwaite wagitai, yanuwa yaulina kana Guyau ana kelabilabin kamwasana kana dedewaga kani ibaguna-yagimiu ilau waila Yolidan koina. Kabo saugana siya topwaoli dedewaga sikewai sigayolobi Yolidan koina, kabo waila bwaite ididi-lobima kewa mena kani iguma na idogadoga ana kaba miya kaigedamo. Yo wakatai yakato Yaubada yawasina miyamiya yaina iya mekalakava yo kabo Kenani, Iti, Ivi, Pelisi, Gegasi, Amoli yo Yebusi tanuwagaliyao itawoili kaiwemiu.”
14-15 Sepasepa kana sauga kabo yanuwa ilogalewa yo yalubwasi ididi waila Yolidan koina. Saugana Isileli ali kaba gogo silogabaen silau Yolidan yakato silopanaisi, kabo topwaoli dedewaga sikalai sikewai yo sibaguna tomo manli mena. Na saugana topwaoli kaeli sipei waila kalona mena,
16 kabo waila bwaite ana kaba didi-lobima kewa mena iguma. Waila idogadoga dedei yabo kana mwayaga imamalawe kolili, yanuwa esana Adama, yanuwa Saletan salina mena. Wailane ilobi ilau kalita yabo esana sipei Kalita Boiboitana koina. Waila iguma kepakepa kabo tomo sowasowali silopanaisi Yeliko salina mena.
17 Saugana Isileli silolopanaisi yo topwaoli siya Yeoba ana kelabilabin kamwasana kana dedewaga sikewai sitolo-dudulai bwatano labwalabwana koina Yolidan luwaluwalina mena kanasiga tomo meuloili silopanaisi woli.