5
Agiwat tǝmǝddurt tǝgât daɣ ǝnnur
1 Dad zamas bararan ǝn Mǝššina ikna tara a tǝmosam, wǝdi ǝlkǝmat y almasal wa-net.
2 Ǝqqǝlat aytedan ǝššokalnen daɣ tara, zund ǝmmǝk was danaɣ-ira Ǝlmǝsix har as ikfa iman-net i Mǝššina, imos tǝhǝkkut ǝd tǝkutay tǝlât ɣur-ǝs aḍu izodan.
3 Nǝmǝggǝgat d ǝzzǝna, ǝd mazalan samadasnen a ǝqqalan, ǝd tara n ǝddǝnet. Aratan win di a du-wǝr-tammadkel batu-nasan fadda ɣur-wan. Awen daɣ as ihor ad t-agin mizdagan ǝn Mǝššina.
4 Ad wǝr tǝtaggim aratan jargonnen wala batuten wǝr nǝla almaɣna âs zun tanat-iga ǝmeskel, wala batuten jargonnen. Adi wǝr itǝwǝggu. Kalar taggiwat igodan i Mǝššina.
5 Fǝlas ǝssǝnat wǝllen as, awedan kul wa itaggin ǝzzǝna, wǝdi immidas, iga attama-net daɣ ǝrrǝzǝɣan n aytedan, almaɣna iɣbâd ǝssǝnǝman, wǝdi wǝr zʼigrǝw adagar waliyyan daɣ taɣmar ta n Ǝlmǝsix ǝd Mǝššina.
Agiwat tǝmǝddurt ta taggin aytedan ǝhânen ǝnnur ǝn Mǝššina
6 A kawan-wǝr-akkarras awedan waliyyan wala issǝxrǝk-kawan ǝs batuten ǝn bannan, fǝlas arat wen ǝnta a d-itawayan alham ǝn Mǝššina s aytedan win nǝffǝllag.
7 Daɣ adi ad wǝr tilem tassaq waliyyat d aytedan win.
8 Fǝlas illikan âs dat awa kala ad tǝham šiyyay, mišan ǝmǝrǝdda tǝhâm ǝnnur daɣ tǝrtǝyt d Ǝmǝli. Agiwat alxal wa taggin aytedan ǝhanen ǝnnur,
9 fǝlas tǝnfa ta d-itaway ǝnnur tǝmos ǝzzǝnǝfan n aratan kul win olaɣnen, ǝd win oɣadnen ǝd win ǝmosnen tidǝt.
10 Dad zamas tǝhâm ǝnnur, wǝdi gammayat wǝllen d ad tǝssǝnam awa igrazan y Ǝmǝli.
11 Amaran ad wǝr tǝdrǝwam wala ǝd mazalan ǝn bannan n aytedan win ǝhanen šiyyay, kalar tugǝyat sǝr-san tǝsafaggim-tan.
12 Fǝlas illikan as awa taggin aytedan win di daɣ ǝssir, isikarakad fadda awal daɣ batu-net.
13 Mišan as ǝffǝggan aratan win, ǝwaran azzahir, ad nǝfilǝlan mazalan-nasan ezal a mallan.
14 Amaran arat kul wa daɣ innǝflay ǝnnur, wǝdi ǝnnur a imos. Awen daɣ a fǝl itawanna:
«Ǝnkǝr-in kay wa insan,
Ǝnkǝr-in daɣ nǝmmǝttan,
Ǝddi a fall-ak
isǝmmǝlǝwlǝw Ǝlmǝsix ǝnnur-net.»
15 Daɣ adi ǝnkǝdat wǝllen y alxal-nawan, ad wǝr tǝqqǝlam zun imeskelan, kalar ǝqqǝlat imalan ǝn tayttay.
16 Ad wǝr tǝsabannanam šimazayyaten šin tǝgarrawam, fǝlas ark azzaman a nǝha.
17 Awen daɣ a fǝlas ad wǝr tǝqqǝlam zun aljahilan, kalar ǝqqǝlat aytedan ǝgranen awa fall-awan ira Ǝmǝli.
18 Amaran ad wǝr tǝsamaswadam iman-nawan s esmad, arat wǝdi ǝjǝmmǝjǝllǝd a zʼagu tǝmǝddurt-nawan. Kalar ǝqqǝlat aytedan idnây Infas ǝn Mǝššina, almaɣna n awen as:
19 tinǝmǝggiwat ǝlmaɣizatan gar-ewwan ǝs tǝsarnaten n Azzabur, ǝd tǝgaytalen, ǝd sakkan a d-ǝgmadnen ɣur Infas wa Zǝddigan. Agiwat isakkan ǝmosnen tǝmmalen ǝn Mǝššina. Agiwat awen y Ǝmǝli s ǝwǝl iyyanda.
20 Tigudǝyat faw arat kul i Mǝššina di n Abba, s esǝm n Ǝmǝli-nana Ɣaysa Ǝlmǝsix.
Inǝmad ǝn tassaq win aynaynen
Tassaq gǝr alǝs ǝd taɣurǝs – Aɣaywan n ǝlmǝsixitan
21 Akkiyyan daɣ-wan abbardaget i win hadatnen, tǝgâm awen daɣ tǝksǝda n Ǝlmǝsix.
22 Šidoden, bardagmat i meddan-nakmat zun ǝmmǝk as tǝbbǝrdagmat y Ǝmǝli;
23 id alǝs ǝnta a imosan ǝmuzar ǝn tǝntut zund ǝmmǝk as Ǝlmǝsix a imosan ǝmuzar n Ǝlkǝnisat tǝmosat taɣǝssa-net, amaran ǝnta iman-net a imosan Ǝnǝssefsi-net.
24 Zund ǝmmǝk as tǝbbǝrdag Ǝlkǝnisat y Ǝlmǝsix, tantut kul tabbardaget y alǝs-net daɣ arat kul.
25 Meddan, iriwat šidoden-nawan, s ǝmmǝk as ira Ǝlmǝsix Ǝlkǝnisat har as iman-net a ikfa fǝl ǝddǝlil-net,
26 fǝl a tat-iskǝt ǝs man-net dǝffǝr as tat-izzizdag s aman, almaɣna Awal ǝn Mǝššina.
27 Awen igmay sǝr-ǝs ad taknu Ǝlkǝnisat šihussay, wǝr tat-tǝwer a imosan tǝtǝnǝqqet, wala ǝnǝkǝmmi, wala arat zun awen, fǝl ad tizdag daɣ a imosan lahan.
28 Ǝmmǝk en daɣ âs meddan da iwâr-tan ad iren šidoden-nasan zun tara ta ǝgan i man-nasan. Awedan wa iran taɣurǝs, wǝdi iman-net a ira.
29 Illikan âs wǝr kala ad itawanay awedan ikyâdan taɣǝssa-net. Kalar awedan ǝšǝtši a itaggu iman-net, innittaf ǝd tǝɣǝssa-net zun awa iga Ǝlmǝsix y Ǝlkǝnisat,
30 id nakkanay šisǝllad ǝn tǝɣǝssa n Ǝlmǝsix a nǝmos.
31 «Awen daɣ a fǝl zʼifǝl alǝs abba-net d anna-net aglu irtǝy ǝd taɣurǝs ǝqqǝlan taɣǝssa iyyadda.»
32 Arat wa ǝnne da daɣ batu n Ǝlmǝsix d Ǝlkǝnisat, imos ǝssir zǝwwǝran ǝn Mǝššina.
33 Xasil ǝkkulluk n iyyan daɣ-wan agiwet i taɣurǝs tara ta iga i man-net, tantut deɣ tǝssǝɣmǝret alǝs-net.