1 Awen da fǝlas imǝdrayan-nana, tǝgmad-ana tǝzaydart n ǝsǝgǝd wen, nǝssof ad naqqam ɣas-nana nak ǝd Silfanus daɣ ǝɣrǝm n Atena. 2 Tǝzzar nǝzammazal-in amadray-nana Timotay, imosan ǝmadhal daɣ ǝššǝɣǝlan win Mǝššina, tan imosan ǝzǝwwǝziwǝz ǝn salan n Ǝlinjil n Ǝlmǝsix, y ad isǝssuhǝt ǝzǝgzan-nawan alǝm-awan fǝl man, 3 fǝl a kawan-wǝr-iggǝz i oyyan iman-net issǝfǝl-du dǝnnǝg-ǝs ǝtǝwǝdgaz wa tǝgam. Tǝssânam iman-nawan as ǝtǝwǝdgaz wǝdi iha aratan win as otas Mǝššina harwa daɣ tizarat as a danaɣ-ǝgrǝwan. 4 Harwa ɣur-wan nǝlla nǝyyǝwan-awan igi daw aɣaf âs itiwatas ad nǝtǝwǝdgǝz, amaran arat wa, tǝssânam as ǝnta iman-net a igan ǝmǝrǝdda. 5 Awen da fǝl di-tǝgmad tǝzaydart n ǝsǝgǝd, tǝzzar zammazalaɣ-in Timotay y a di-d-abǝz isalan n ǝzǝgzan-nawan, fǝl tǝksǝda n ad tǝfǝtǝqqem daɣ taftawen n Ǝnǝjjerrǝb abbannan ǝššǝɣǝl issohen wa nǝga.

6 Mišan ǝmǝrǝdda Timotay sǝket sǝr-anaq qawan-d-ifal, nǝgraw ɣur-ǝs ǝmǝrrǝgǝz-nawan olâɣan. Imal-anaɣ iduf wa tǝgam ǝzǝgzan-nawan, ǝd tara ta kawan-tǝhat, d as tǝkittǝwam-ana s ǝlluɣ. Tǝsidaranam wǝllen a dana-tǝlǝsam anay, arat wa, ǝnta a nǝga nakkanay da. 7 Ǝmmǝk en daɣ as imǝdrayan-nana, širǝmmaɣ, ǝd tarsǝmmawen kul šin nǝga, tǝkfâm-ana tǝsasmit s ǝzǝgzan-nawan. 8 Awalla ǝmǝrǝdda ǝqqalan-ana-du man-nana, fǝlas kawanay tǝglâyam daɣ tǝrtǝyt-nawan d Ǝmǝli. 9 Mas nǝfrag igi-net y ad nǝggudǝy i Mǝššina daɣ talɣa-nawan ǝd tǝdǝwit tagget ta sǝr-naɣ du-tewayam dat-ǝs? 10 Ehad ezal nǝtansay Mǝššina ǝs gǝlleyat a danaɣ-akfu turagat n a kawan-nǝlǝs anay, d a kawan-naknu ǝsǝssǝgri fǝl ad issuhǝt ǝzǝgzan-nawan.

11 Aɣǝdet Mǝššina di n Abba-nana d Ǝmǝli-nana Ɣaysa, tarrayt ta dana-za-tǝsǝmmǝnǝyat dǝr-wan! 12 Kawanay amaran aget Ǝmǝli ǝšitǝy aggen y ǝnǝmǝra wa tǝgam gar-ewwan, ǝd tara ta tǝgam y ǝkkulluk n aggadǝm, zund ǝmmǝk as nakkanay da nǝg-awan tara wǝr nǝla ǝddukad. 13 Isǝssuhǝtet Ǝmǝli iduf-nawan, fǝl ad tǝqqǝlam imizdagan, wǝr nǝla ǝlɣib waliyyan dat Mǝššina di n Abba-nana, ǝzǝl wa du-z-iqqǝl Ǝmǝli Ɣaysa iddew d aytedan kul win-net. Amin.