4
Awa du-z-inǝfilǝlan daɣ jǝnnawan
Ǝnǝfilal ǝn tǝxawit ta n taɣmar ǝn Mǝššina
1 Dǝffǝr awen ǝnaya tǝsǝhǝrt tǝnnolamat daɣ jǝnnawan. Ǝsleɣ y ǝmǝsli was ǝsleɣ dat awen, olân d anasaɣ n asak. Igann-i ǝmǝsli wen: «Gazzay-du sa da, a kay-assaknaɣ arat was kundaba iga dǝffǝr awa.»
2 Wala ihoggan tobaz-i tarna n Infas wa Zǝddigan, oggeɣ tǝxawit ǝn taɣmar ta tǝhat ijǝnnawan. Tǝxawit ten iqqim fall-as awedan.
3 Wa iqqiman fǝl tǝxawit ten, iga ǝmǝlǝwlǝw a n tǝhunt iyyat tǝlât almaqam, as itawannu jasfa d iyyat as itawannu sardwan. Tǝɣlay-tat tǝzzǝl-adar a du-tǝsaktit tǝhunt iyyat tǝmilawlawat tǝlât almaqam as itawannu emrod.
4 Tǝxawit ta n taɣmar en, ǝɣlaynat-tat sanatat tǝmǝrwen ǝn tǝxawit ǝn taɣmar d ǝkkozat, a fǝl ǝqqiman sanatat tǝmǝrwen n ǝmɣar d ǝkkoz ǝn samlalan, ǝssiwarnen šikǝbba ǝn taɣmar ǝgânen daɣ urǝɣ.
5 Gammadan-tat-du esman ǝd maslan d eggagan. Ǝrɣân dat-ǝs ǝssa belan ǝn tǝmsay, ǝmosnen ǝssa ǝrruxanitan ǝn Mǝššina.
6a Tǝxawit ta n taɣmar en, oray-tat-du arat olân d agaraw imilawlawan wǝllen, igân ǝɣǝtǝs a n tǝlfǝnjart.
6b Ammas-net ǝd ɣǝlǝyɣǝlayan-net ǝhân-tan ǝkkoz mudaran as ilamawan-nasan ǝlsân šittawen sa sǝr dat, ǝlsân-tanat deɣ sa sǝr ǝlǝqqam.
7 Ǝmudar wa azzaran ola d ahar, wa n ǝššin ola d ǝhǝri, wa n karad amaran isakta-du udǝm-net wa n aggadǝm, wa n ǝkkoz ola ǝd tǝnagmart tǝggâdat.
8 Amaran imudaran win ǝkkoz en, ǝkkulluk n iyyan daɣ-san ila sǝdis ǝfrutan ǝlsânat šittawen sas ammas ǝd sas afalla. Wǝr tǝfǝstin ehad ezal gannin:
«Ǝmizdag, Ǝmizdag, Ǝmizdag,
Ǝmǝli Mǝššina s ǝnta a imosan
mǝššis ǝn tarna kul,
imos wa t-illan kala da,
imos deɣ wa t-illan ǝmǝrǝdda,
amaran izay-du!»
9 Ǝssiggadan daɣ tǝmmalen ǝn tanaya ǝd saɣmar ǝd godan i Mǝššina, s ǝnta a iqqiman fǝl tǝxawit ta n taɣmar, ill-ay har faw.
10 Amaran id ǝssǝggadan mudaran win den, ad ǝssǝjǝdan ǝmɣaran ɣur daran ǝn wa iqqiman fǝl tǝxawit ta n taɣmar, assansin šikǝbba-nasan šin taɣmar, annin:
11 Ya Ǝmǝli-nana Mǝššina,
kay a ihoran ǝd tanaya
d ǝtǝwǝsǝɣmar, ǝd tarna,
id kay a d-ixlakan ǝkkulluk n arat.
Aratan kul ǝllan-tu ǝs tarrayt ǝn tara-nak,
amaran kay a tan-d-ixlakan.