12
ⵛⵂⴾⵜⵏ ⵛⵏ ⵜⴶⵓ ⵏ⵿ⴼⵙ ⵓⴰ ⵤⴹⴶⵏ
1 ⵎⵔⵏ ⵎⴹⵔⵢⵏⵏ ⴹⵗ ⵀⵜⵓ ⵏ⵿ⵜⵎⵜⴾⵓⵢⵏ ⵛⵏ ⵂⴾⵓ ⵏ⵿ⴼⵙ ⵓⴰ ⵤⴹⴶⵏ ⵓⵔ ⵔⵗ ⴹⵗⵙⵏⵜ ⵜⵌⵂⵍⵎ⵰
2 ⵜⵙⵏⵎ ⵙ ⴹⵜ ⴶⵤⵏⵓⵏ ⵜⵔⵢⵜ ⵜⵏ ⵎⵛⵏⴰ ⵢⵜⴹⵏ ⵜⵎⵙⵎ ⵈⵔⴾⵏⵏ ⵍⴾⵎⵏⵏ ⵢⵙⵏⵎⵏ ⵓⵔ ⵏⵛⵓⵍ⵰
3 ⵓⵏ ⴹⴰ ⴼⵍ ⵔⵗ ⴹ ⵜⵙⵏⵎ ⵙ ⵓⵔ ⵜⵍⴰ ⵓⴹⵏ ⴹⵗ ⵏⴹⴰ ⵏ⵿ⴼⵙ ⵏⵎⵛⵏⴰ ⴹⵤⵏ⵿ⴾⵔⵏ ⴹ ⴶⵏⵓ «ⵎⵛⵏⴰ ⵜⵍⵗⵏⴰ ⵗⵢⵙⴰ⵰» ⵓⵍⴰ ⴹⵗ ⵍⵢ ⵓⴹⵏ ⴼⵔⴶⵏ ⴹ ⵏⵓ «ⵗⵢⵙⴰ ⵎⵙ ⵎⵍⵢ⵰» ⵔ ⵙⴹⵗⵙ ⵏⴹⴰ ⵏ⵿ⴼⵙ ⵓⴰ ⵤⴹⴶⵏ⵰
4 ⵎⵔⵏ ⵛⵂⴾⵜⵏ ⵤⵏⴼⵏ ⵎⵙⵏⵜ ⵎⵛⵏ ⵏ⵿ⴼⵙ ⵢⵏ⵿ⴹⴰ ⵗⵙ ⵜⵎⵙⵏ ⵏ⵿ⴼⵙ ⵓⴰ ⵤⴹⴶⵏ ⵏⵎⵛⵏⴰ ⵙⵏ⵿ⵜⴰ ⵜⵏⵜⵂⴾⵏ ⴾⵜⵏⵙⵏⵜ⵰
5 ⵜⵔⵢⵏ ⵏⵛⵗⵍ ⵤⵏⴼⵏ ⵎⵙⵏⵜ ⵎⵛⵏ ⵎⵍⵢ ⴹⵢ ⵏⵢⵏ ⵙ ⵏⵛⵗⵍ⵰
6 ⴶⵜⵏ ⵤⵏⴼⵏ ⵎⵙⵏ ⵎⵛⵏ ⵎⵛⵏⴰ ⴹⵢ ⵏⵢⵏ ⵂⴾⵏ ⵢⵜⴹⵏ ⴾⵍ ⵎⵙⵏⵜ ⵏⴶⵜⵏ ⴾⵍ ⵓⵏ ⵜⴶⵏ⵰
7 ⴾ ⵏⵍⴾⵎ ⴶⵔⵓ ⵗⵔ ⵏ⵿ⴼⵙ ⵓⴰ ⵤⴹⴶⵏ ⵜⵂⴾⵜ ⵜⵜⵙⴼⵔⴶⵜ ⵛⵗⵍ ⵎⵙⵏ ⵜⵏ⵿ⴼⵏⵏⴰ ⴾⵜⵏⵏⴰ⵰
8 ⵓⴹⵏ ⵤⴰ ⵢⵏ ⵂⴾⵢ ⵏ⵿ⴼⵙ ⵓⴰ ⵤⴹⴶⵏ ⴶⵢ ⵏⵀⵜⵜⵏ ⵏ⵿ⵜⵍⴰ ⵏⴶⵔⵢ ⵢⵏ ⵎⵔⵏ ⵂⴾⵢ ⵏ⵿ⴼⵙ ⴶⵢ ⵏⵀⵜⵜⵏ ⵏⵎⵙⵏⵜ⵰
9 ⵢⵏ ⵂⴾⵢ ⵏ⵿ⴼⵙ ⵓⴰ ⵤⴹⴶⵏ ⵤⴶⵤⵏ ⵢⵏ ⵂⴾⵢ ⴼⵔⴶⵜ ⵏⵤⵤⵢ ⵏⵎⵔⵏⵏ
10 ⵢⵏ ⵂⴾⵢ ⴼⵔⴶⵜ ⵏⴶⵢ ⵏ⵿ⵜⵍⵎⵗⵌⵌⵜⵏ ⵢⵏ ⴶⵔⵓ ⵎⵍ ⵢⵢⵜⴹⵏ ⵙⵍⵏ ⵓⵏ ⴼⵍⵙ ⴹⵤⵤⵀⵜ ⵎⵛⵏⴰ ⵢⵏ ⵂⴾⵢ ⴼⵔⴶⵜ ⵏ⵿ⵤⵍⵢ ⴶⵔ ⵜⵂⴾⵜ ⵜⵏ ⵏ⵿ⴼⵙ ⵓⴰ ⵤⴹⴶⵏ ⴹⵜⴰ ⵜⵜⵓⵔⵏⵎⵙ⵰ ⵢⵏ ⵂⴾⵢ ⴼⵔⴶⵜ ⵏⵛⵓⵍ ⵏⵓⵍⵏ ⵓⵔ ⵏⵜⵓⵤⴹⵢ ⵢⵏ ⵂⴾⵢ ⴼⵙⵔ ⵏⵓⵍⵏ ⵓⵏ ⴹⵢ⵰
11 ⵎⵛⵏ ⵏ⵿ⴼⵙ ⵓⴰ ⵤⴹⴶⵏ ⵓⴰ ⴹⴰ ⵜⴶⵏ ⵔⵜⵏ ⴹⵢ ⴾⵜⵏⵙⵏ ⴾ ⵓⴹⵏ ⵂⴾⵢ ⵜⵂⴾⵜ ⵜⴰ ⴹⵙⵔⴰ⵰
ⵜⵗⵙⴰ ⴹⵜⵙⵍⴹⵏⵜ ⴶⵜⵏⵏ
12 ⵏⵢⵜ ⵜⵛⵜ ⵜⴰ ⵜⴶⴰ ⵜⵗⵙⴰ ⵏⵓⴹⵏ ⵔⵜ ⵢⵏ⵿ⴹⴰ ⴶⵏ ⴹⵗ ⵜⵙⵍⴹ ⴾⵏⵏⵏ ⴶⵜ ⴶⵙ ⵂⵔⴾⴹ ⴶⵜⵏⵙⵏⵜ ⵜⵗⵙⴰ ⵢⴹⴰ ⵎⵙⵏⵜ⵰ ⵓⵏ ⴹⴰ ⵤⴰ ⴶⵏ ⵢⵜⴹⵏ ⵓⵏ ⵍⴾⵎⵏⵏ ⵢⵍⵎⵙⵈ ⵙⵏ⵿ⵜⵏⵢ ⵎⵙⵏⵏ ⵜⵗⵙⵏⵜ⵰
13 ⴼⵍⵙ ⴶⵔ ⵤⴰ ⵏⵎⵙ ⴾⵍⵍⵢⵂⴹ ⵓⵍⴰ ⵢⵜⴹⵏ ⵓⵏ ⵓⵔ ⵜⵏⵎⵙ ⴶⵔ ⵤⴰ ⵏⵎⵙ ⴾⵍⵏ ⵓⵍⴰ ⵍⵍⵏ ⵏ⵿ⴼⵙ ⵓⴰ ⵤⴹⴶⵏ ⵓⴹⵢ ⴹⴰ ⴹⵗ ⵏⵜⵓⵙⵍⵎⵗ ⴾⵜⵏⵏⴰ ⵏⵆⵍ ⵜⵗⵙⴰ ⵢⴹⴰ⵰ ⴾⵜⵏⵏⴰ ⴹⵗ ⵏ⵿ⴼⵙ ⵓⴰ ⵤⴹⴶⵏ ⵓⴹⵢ ⴹⴰ ⴹⵏⵢⵏ ⵓⵍⵏⵏⴰ⵰
14 ⵎⵔⵏ ⵜⵗⵙⴰ ⵓⵔ ⵜⴶⴰ ⴹⵗ ⵜⵙⵍⵜ ⵢⴹⴰ ⴾⵍⵔ ⵛⵙⵍⴹ ⴶⵜⵏⵏ ⴹⵗ ⵜⴶⴰ⵰
15 ⵙ ⴹⴶⴹ ⴹⵔ ⵏⴰ «ⵏⴾ ⵓⵔ ⴹⵜⵍⴰ ⵜⵗⵙⴰ ⴹ ⵓⵔ ⵎⵙⵗ ⴼⵙ⵰» ⵓⴾ ⴾⵙ⵿ⵜⵓ ⵓⵏ ⴹⵗ ⵜⵛⵜ ⵏⵢⵜ ⴹⵗ ⵜⵙⵍⴹ ⵏ⵿ⵜⵗⵙⴰ⵰
16 ⵙ ⵜⵏⴰ ⵜⵎⵤⴾ «ⵏⴾ ⵓⵔ ⴹⵜⵍⴰ ⵜⵗⵙⴰ ⴹ ⵓⵔ ⵎⵙⵗ ⵛⵜ⵰» ⵓⴾ ⴾⵙ⵿ⵜⵜ ⵓⵏ ⴹⵗ ⵜⵛⵜ ⵏⵢⵜ ⴹⵗ ⵜⵙⵍⴹ ⵏ⵿ⵜⵗⵙⴰ⵰
17 ⵙ ⵜⵆⵍ ⵜⵗⵙⴰ ⴾⵜⵏⵜ ⵛⵜ ⵎⵙ ⵤⵙⵍⵓ ⵓⴹⵏ⵰ ⵙ ⵜⵆⵍ ⵜⵗⵙⴰ ⴾⵜⵏⵜ ⵜⵎⵤⴾ ⵎⵙ ⵤⵓⵜ ⵓⴹⵏ ⴹⵓ⵰
18 ⴾⵍⵔ ⵎⵛⵏⴰ ⴶⵏ ⵛⵙⵍⴹ ⴹⵗ ⵜⵗⵙⴰ ⴾⵢⵜ ⴶⵜ ⴹⵗ ⴹⴶ ⵓⵙ ⵔⴰ⵰
19 ⵙ ⵎⵙ ⵙ ⵜⵗⵙⴰ ⴾⵜⵏⵜ ⵜⵙⵍⵜ ⵢⴹⴰ ⵜⵎⵙ ⵓⴹⵢ ⵎⴰ ⵤⵆⵍⵏ ⵜⵗⵙⴰ⵰
20 ⴾⵍⵔ ⵛⵙⵍⴹ ⴾⵏⵏⵏ ⴶⵜ ⵜⵍⵏⵏ ⵎⵛⵏ ⵜⵗⵙⴰ ⵏ⵿ⵜⴰ ⵢⴹⴰ⵰
21 ⵓⵏ ⴹⵗ ⴼⵍ ⵓⵔ ⵜⴼⵔⴶ ⵛⵜ ⴹ ⵜⵏⵓ ⵢⴼⵙ «ⵏⴾ ⵓⵔ ⵙⵔⴾ ⴹⵔⵔ» ⵓⵍⴰ ⴹⵗ ⵏⵓ ⵗⴼ ⵢ ⴹⵔⵏ «ⵏⴾ ⵓⵔ ⵙⵔⵓⵏ ⴹⵔⵔ⵰»
22 ⴼⴹⴰ ⵛⵙⵍⴹ ⵏ⵿ⵜⵗⵙⵓⵏⵏⴰ ⵛⵏ ⵏⵙ ⵏⴶⴰ ⴹⴼ ⵏⵙ ⵔⴾⵎⵏⵜ ⵏ⵿ⵜⵏⵜⵢ ⴹⵏⵜⵂⴰ ⵜⵏ⵿ⴼⴰ ⵓⵍⵏ⵰
23 ⵎⵔⵏ ⵛⵏ ⴹⵢ ⵙ ⵗⵔⵏⵗ ⴶⴰ ⵙ ⵓⵔ ⴼⵔⵔⵏⵜ ⵏ⵿ⵜⵏⵜⵢ ⵏⵙⵗⵎⵔ ⵓⵍⵏ⵰ ⴹⵗ ⴹⵢ ⵛⵙⵍⴹⵏⵏⴰ ⵛⵏ ⵎⵙⵏⵏ ⵤⴼ ⵏ⵿ⵜⵏⵜⵢ ⵏⴾⵏⵓ ⵙⵜⵔ⵰
24 ⵛⵏ ⵓⵔ ⵏⵎⵙ ⵤⴼ ⵎⵔⵏ ⵏ⵿ⵜⵏⵜⵢ ⵓⵔ ⴹⵔⵔⵏⵜ ⵙⵙⵜⵔ⵰ ⵎⵛⵏⴰ ⵎⵏⵜ ⴹⵈⵍⴾⵏ ⵜⵗⵙⴰ ⵜⵙⵗ ⴶⵙ ⵜⵎⵓⵜ ⴼⵍ ⵜⵓⵙⵗⵎⵔⵏⵜ ⵜⵙⵍⴹⵏⵜ ⵓⵍⵏ ⵛⵏ ⴹⵔⵔⵏⵏ ⵙⴹⵢ
25 ⴼⵍ ⴹ ⵓⵔ ⵜⵤⵏ ⵜⵗⵙⴰ ⴶⵔⵙ ⴾⵍⵔ ⴾⵍⴾ ⵏ⵿ⵜⵙⵍⵜ ⴹ ⵜⵙⵏ ⴹⵗ ⵜⵎⴹⵜⵏⵜ⵰
26 ⵓⵏ ⴹⵗ ⴼⵍⵙ ⵙ ⵜⵍⴶⵢ ⵢⵜ ⴹⵗ ⵜⵙⵍⴹ ⵏ⵿ⵜⵗⵙⴰ ⵛⵙⵍⴹ ⴾⵍ ⵛⵏ ⵂⴹⵜⵏⵏ ⵏ⵿ⵜⵏⵢ ⴹⴰ ⴹ ⵍⴶⵢⵏⵜ⵰ ⵙ ⵜⵜⵓⵤⵤⵓⵔ ⴹⵗ ⵢⵜ ⴹⵗ ⵜⵙⵍⴹ ⵛⵙⵍⴹ ⴾⵍ ⵛⵏ ⵂⴹⵜⵏⵏ ⴹ ⴼⵍⵓⵙⵏⵜ⵰
27 ⴾⵓⵏⵢ ⵜⵗⵙⴰ ⵏⵍⵎⵙⵈ ⵜⵎⵙⵎ ⵎⵔⵏ ⴾⵢⵏ ⴹⵗⵓⵏ ⵜⵙⵍⵜ ⵏ⵿ⵜⵗⵙⵏⵜ ⵎⵙ⵰
28 ⴹⵢ ⴼⵍⵙ ⵍⴾⵏⵙⵜ ⴹⵗ ⵜⵤⵔⵜ ⴶⴰ ⴹⵗⵙ ⵎⵛⵏⴰ ⵏⵎⵤⵍ ⴹⴼⵔⵙⵏ ⵏⵀⵜⵏ⵰ ⴹⴼⵔ ⵏⵀⵜⵏ ⵍⴼⵆⵜⵏ⵰ ⴹⴼⵔ ⴹⵢ ⵢⵜⴹⵏ ⵓⵏ ⵍⵏⵏ ⴼⵔⴶⵜ ⵏⴶⵢ ⵏ⵿ⵜⵍⵎⵗⵌⵌⵜⵏ ⵍⴾⵎⵏⵙⵏ ⵓⵏ ⴾⴼⴰ ⴼⵔⴶⵜ ⵏⵤⵤⵢ ⵏ⵿ⵜⵓⵔⵏⵓⵏ ⴹⵓⵏ ⵜⵍⵍⵏⵏ ⵢⵢⵜⴹⵏ ⴹⵓⵏ ⴾⴼⴰ ⴼⵔⴶⵜ ⵏ⵿ⵜⵤⵔ⵿ⵜ ⵢⵢⵜⴹⵏ ⴹⵓⵏ ⴾⴼⴰ ⴼⵔⴶⵜ ⵏⵛⵓⵍ ⵏⵓⵍⵏ ⵓⵔ ⵏⵜⵓⵤⴹⵢ⵰
29 ⵓⴾ ⴾⵜⵏⵙⵏ ⵙ ⵎⵙⵏ ⵏⵎⵤⵍ⵰ ⵓⴾ ⴾⵜⵏⵙⵏ ⵙ ⵎⵙⵏ ⵏⵀⵜⵏ⵰ ⵓⴾ ⴾⵜⵏⵙⵏ ⵙ ⵎⵙⵏ ⵍⴼⵆⵜⵏ⵰ ⵓⴾ ⴾⵜⵏⵙⵏ ⵙ ⴶⵔⵓⵏ ⴼⵔⴶⵜ ⵏⴶⵢ ⵏ⵿ⵜⵍⵎⵗⵌⵌⵜⵏ⵰
30 ⵎⴹⵗ ⴶⵔⵓⵏ ⴼⵔⴶⵜ ⵏⵤⵤⵢ ⵏ⵿ⵜⵓⵔⵏⵓⵏ ⵎⵗ ⴼⵔⴶⵜ ⵏⵓⵍⵏ ⵓⵔ ⵏⵜⵓⵤⴹⵢ ⵎⵗ ⴼⵔⴶⵜ ⵏⴼⵙⵔⵏⵙⵏ⵰ ⵓⵍⴰ ⵏⵎⵂⵤ⵰
ⵜⵔⴰ ⵜⵔⵢⵜ ⵜⵏ ⵜⴹⵜ
31 ⴹⵗ ⴹⵢ ⵙⴹⵔⵏⵜ ⵙⵍⵗ ⴶⵔⵓ ⵏ⵿ⵜⵂⴾⵜⵏ ⵛⵏ ⴼⵏⵏ⵰ ⵎⵔⵏ ⴾⵓⵏⵙⴾⵏⴰ ⵎⵔⴹⴰ ⵜⵔⵢⵜ ⵜⴰ ⵜⴼⵜ ⵜⵔⵢⵏ ⴾⵍ⵰