4
1 ⴹⵗ ⴹⵢ ⴹⴹ ⵤⵎⵙ ⵍⵎⵙⵈ ⴹⴰ ⵜⵗⵙⵏⵜ ⵜⵏⵢ ⵍⵗⵤⵀ ⴾⵓⵏⵢ ⴹⴰ ⵙⵎⵜⴶⵜ ⵢⵔⵜ ⵤⵏ ⵓⵏ ⴹⴰ⵰ ⴼⵍⵙ ⵓⴹⵏ ⵓⴰ ⵗⵤⵀⵏ ⵙ ⵜⵗⵙⵏⵜ ⴹⵗ ⵏⵎⴹ ⵓⵏ ⵓⴹⵢ ⵎⵤⵢ ⴹⵀⴾⴹⵏ⵰
2 ⵓⵏ ⴹⵗ ⴼⵍⵙ ⵀⵤⵏ ⵗⵔ ⵤⵍⴰ ⴹ ⵓⵔ ⵜⵍⵙⵎ ⵛⵢⵜ ⵏⵎⵏⵓⵏ ⵜⵍⴾⵎⵎ ⵢ ⴹⵔⵏⵏ ⵓⵏ ⴶⴹⵎ ⴾⵍⵔ ⵍⴾⵎⵜ ⵢ ⵜⵔⴰ ⵏⵎⵛⵏⴰ ⴹⵗ ⵓⴰ ⴹⵏⵆⵎⵏ ⴹⵗ ⵜⵗⵔⵙⵏⵓⵏ⵰
3 ⴶⴹⵓⵏ ⵓⵙ ⴾⵍⴰ ⵜⵜⴶⵎ ⵎⵙⵏ ⵓⴰ ⵔⵏ ⵢⵜⴹⵏ ⵓⵔ ⵏⵙⵏ ⵎⵛⵏⴰ⵰ ⵓⵔ ⵜⵤⵍⵢⵎ ⵜⵎⵤⵍⵎ ⵜⵜⴶⵎ ⵔⴾ ⴹⵔⵏⵏ ⵜⵎⵙⵎ ⵎⵛⵓⵏ ⵏⵙⵎⴹ⵰ ⵜⵜⴶⵎ ⵜⵜⵢ ⵜⴶⵜ ⴹⵜⵙⵢ ⵜⴶⵜ ⵜⵗⵀⴹⵎ ⵙⵏⵎⵏ ⵎⵙⵏⵏ ⵔⵜ ⵙⴾⵙⴹⵏ⵰
4 ⵎⵔⵏ ⵔⴾ ⵢⵜⴹⵏ ⵓⵏ ⵙⵎⴾⵍⵍ ⵙⵔⵙⵏ ⵙ ⴹⵙⵏⵓⵔ⵿ⵜⵍⴾⵎⵎ ⴹⵗ ⵔⴾ ⵎⵤⵍⵏ ⵓⵏ ⵜⴶⵏ ⵎⵙⵏⵏ ⵙⵙⴾⵢ ⴶⵏ ⴹⵗ ⵜⵎⵤⵔⵢⵜ ⵆⵎⵏ ⵎⵔⵏ ⵗⵛⴹⵏⵓⵏ ⵙⵎ⵰
5 ⴾⵏ⵿ⴹⵀⴰ ⵀⴹⴹⵏ ⴼⵍ ⵎⵤⵍⵏⵙⵏ ⴹⵜ ⵓⴰ ⵙⵎⵜⴶⵏ ⵢⴹ ⵛⵔⵗ ⵓⵏ ⴹⵔⵏⵏ ⴹⵓⵏ ⵀⴰ⵰
6 ⵓⵏ ⴹⵗ ⴼⵍⵙ ⵓⵏ ⵎⵙⵏⵏ ⵏⵎⵜⵏ ⵎⵔⴹⴰ ⴹⴰ ⵜⵓⵎⵍⵙⵏ ⵍⵏ⵿ⵌⵍ⵰ ⵔⵜ ⵓⵏ ⵜⵓⴶⵙⵏ ⴼⵍ ⴹ ⵓⴹⵀⵏ ⵙ ⵜⵎⵓⵜ ⵜⵙ ⵜⵓⴹⵀⵏ ⵢⵜⴹⵏ ⴹⵗ ⴹⵏⵜ ⴶⵏ ⴹⵗ ⴹⴼⵔ ⵓⵏ ⵜⵎⴹⵔ⵿ⵜ ⴹⵗ ⵏⴹⴰ ⵏ⵿ⴼⵙ ⵓⴰ ⵤⴹⴶⵏ ⵙ ⵜⵎⵓⵜ ⵜⴰ ⵔⴰ ⵎⵛⵏⴰ⵰
7 ⵜⵤⵔⵙ⵿ⵜ ⵏⴹⵏⵜ ⵜⵂⵤ⵰ ⵆⵍⵜ ⵢⵜⴹⵏ ⵍⵏⵏ ⵤⵀⵏ ⵜⵏⴹⵎ ⴹⵗ ⵎⵏⵓⵏ ⴼⵍ ⴹ ⵜⴼⵔⴶⵎ ⴶⵢ ⵏ⵿ⵜⵓⵜⵔⵓⵏ⵰
8 ⵤⵤⵔⵜ ⵢⵔⵜ ⴾⵍ ⵏⵎⵔⴰ ⴶⵏ ⴶⵔⵓⵏ ⴼⵍⵙ ⵜⵔⴰ ⵏ⵿ⵜⴰ ⵜⵂⴾⵜ ⵜⵙⵔⴼ⵿ⵜ ⵏⵀⴾⴹⵏ ⴶⵜⵏⵏ⵰
9 ⵆⵍⵜ ⵢⵜⴹⵏ ⵂⴰ ⵎⴶⵔⵓ ⴶⵔⵓⵏ ⵙ ⵎⵏ ⵔⴹⵏⵏ⵰
10 ⴾⵢⵏ ⴹⵗⵓⵏ ⴶⵓⵜ ⵢ ⵓⵏ ⵂⴹⵜⵏⵏ ⵜⵏ⵿ⴼⴰ ⵙ ⵜⵂⴾⵜ ⵜⴰ ⵜⴶⵔⵓⵎ ⵙⵔⵈⵎⵜ ⵏⵎⵛⵏⴰ⵰ ⵎⴾ ⴹⵢ ⴹⴰ ⵙ ⵤⴰ ⵜⵆⵍⵎ ⵏⵗⵍⴼⵏ ⵍⵗⵏⵏ ⵏⵔⵈⵎⵜⵏ ⴶⵜⵏⵏ ⵛⵏ ⴹⵓⵏⴶⴰ ⵎⵛⵏⴰ⵰
11 ⵢ ⴹⵗⵓⵏ ⵛⵓⵍⵏ ⴶⵜ ⵓⵍ ⵏⵙ ⵎⵛⵏⴰ ⵜⴹⵤⵎⵤⵍⵏ⵰ ⵢ ⴹⵗⵓⵏ ⴹⵂⵍⵏ ⵎⴹⵓⵏⵜ ⴹⵂⵍⵜⵏ ⵙ ⴼⵔⴶⵜ ⵜⴰ ⴹⵏⵗⵂⴾⵓ ⵎⵛⵏⴰ ⴼⵍ ⴹ ⵜⵓⵙⵗⵎⵔ ⵎⵛⵏⴰ ⴹⵗ ⵔⵜ ⴾⵍ ⵙ ⵜⵔⵢⵜ ⵏ⵿ⵗⵢⵙⴰ ⵍⵎⵙⵈ⵰ ⵏ⵿ⵜⴰ ⵍⵏ ⵜⵔⵏⴰ ⴹⵜⵏⵢⴰ ⵂⵔ ⴼⵓ⵰ ⵎⵏ⵰
ⵍⵎ ⴼⵍ ⵎⵏ ⴹⵏⵙⵈⴰ ⵢⵢⵜⴹⵏ ⴹⵗ ⵤⵎⵏ ⵓⵏ ⵍⵗⵤⵀ
ⵍⵗⵤⵀ ⴼⵍ ⵍⵎⵙⵈ
12 ⵎⵔⵏⵏ ⴹ ⵓⵔ ⵆⵏⵏ ⵗⴼⵓⵏⵓⵏ ⵢ ⵜⵎ⵿ⵙⵢ ⵏⵍⵗⵤⵀ ⵜⴰ ⴾⵓⵏ⵿ⵜⵂⵜ ⴹⵢ ⵜⵎⵙ ⵌⵔⵀⵏⵓⵏ ⴹⵙⵓⵔ⵿ⵜⴶⵎ ⴹⴼ ⵏⵙ ⴶⵔⵓⴾⵓⵏ ⵔⵜ ⵎⵜⵢⵏ⵰
13 ⴾⵍⵔ ⵙⴼⵍⵓⵙⵜⴾⵓⵏ ⵙ ⵜⴹⵔⵓⵎ ⴹⵍⵎⵙⵈ ⵍⵗⵤⵀ ⴼⵍ ⴹ ⵜⴾⵏⵎ ⵜⴼⵍⵓⵙ⵿ⵜ ⴹⵜⴹⵓⵜ ⵙⵗⴰ ⵓⴰ ⴹⵤⵜⵏⴼⵍⵍ ⵜⵏⵢⵏⵜ⵰
14 ⵜⵀⵍⵍⵎ ⴾⵓⵏⵢ ⵓⵏ ⵜⵓⵔⵀⴹⵏⵏ ⴼⵍ ⵙ ⴾⵓⵏⵍⴰ ⵍⵎⵙⵈ ⴹ ⵏ⵿ⴼⵙ ⵓⴰ ⵍⵏ ⵜⵏⵢⴰ ⵜⵎⵙⵏ ⵏ⵿ⴼⵙ ⵏⵎⵛⵏⴰ ⴹⵔⵓⵏ ⴹⵓⵏ⵰
15 ⴾⵓⵏⵓⵔⴶⵤ ⵢ ⵗⵤⵀⵏ ⴼⵍ ⴶⵢ ⵏⵎⵏ ⵓⵍⴰ ⵛⴾⵔⴰ ⵓⵍⴰ ⵜⵛⵜ ⵏⵏⵙⴶⴼⴰ ⵎⴹⵗ ⵓⴹⵏ ⵜⴶⵤⵏ ⵛⵗⵓⵛⵓⵏ ⵜⵓⵔⵏⵆⵍ⵰
16 ⵎⵛⵏ ⵙ ⵜⵜⵗⵤⵀⵎ ⴼⵍ ⵜⵛⵜ ⵏⵍⵎⵙⵈⵜⵏ ⴾⵓⵏⵓⵔⵙⴾⵔⴾⴹ ⵓⵏ ⴾⵍⵔ ⵙⵏⵎⵍⵜ ⴼⵍ ⵎⵛⵏⴰ ⴼⵍ ⵓⵔ ⵓⴰ ⴾⵓⵏⴶⴰ ⵙⵎ ⵏⵍⵎⵙⵈ⵰
17 ⴼⵍⵙ ⵍⵓⵆ ⵓⴹⵓ ⵓⴰ ⴹⵗ ⵤⵏ⵿ⵜⵓ ⵛⵔⵗⴰ ⵎⵔⵏ ⵜⵎⵜⵢ ⵜⵏ ⵎⵛⵏⴰ ⵙ ⵏ⵿ⵜⴰ⵰ ⴹⵗ ⴹⵢ ⴹⴹ ⵤⵎⵙ ⵏⴾⵏⵢ ⵙ ⵙⵏ⵿ⵜⴰ ⵛⵔⵗⵏⵜ ⵎⴰ ⴹⵔ ⵤⴰ ⵜⵍⵓ ⵜⵙⵍⴾⵎ⵿ⵜ ⵏⵓⵏ ⵓⵔ ⵏⵤⴶⵤⵏ ⵙⵍⵏ⵿ⵌⵍⵏⵜ⵰
18 ⵏⵏ ⵍⴾⵜⵀⵏ «ⴹⴹ ⵤⵎⵙ ⵢⵜⴹⵏ ⵓⵏ ⵗⴹⵏⵏ ⴹⴰ ⴶⵔⴹ ⵙ ⵤⴼⵙⵏ ⵎⴰ ⴹⵔ ⵤⵍⵏ ⵓⵏ ⵓⵔ ⵏⴾⵙⴹ ⵎⵛⵏⴰ ⵛⴾⵍⵏ ⴹⵗ ⴶⵢ ⵏⵀⴾⴹⵏ⵰»
19 ⴹⵗ ⴹⵢ ⵓⵏ ⵜⵗⵤⵀⵏⵏ ⴹⵗ ⴹⵏⵜ ⴼⵍ ⵙ ⵎⵤⵍⵏ ⵜⵔⴰ ⵏⵎⵛⵏⴰ ⴶⵏⵜ ⵎⵏⵙⵏ ⴹⵗ ⵜⵗⵍⴼ⵿ⵜ ⵏⵎⵈⵍⴾ ⵏⴾⵍⴾ ⵏⵔⵜ ⵙⵏ⵿ⵜⴰ ⵎⵙⵏ ⵍⵗⴹⵍ ⴶⵍⵏ ⴹⵗ ⵎⵤⵍ ⵏⵓⴰ ⵍⵗⵏ⵰