29
Maaron aliŋa inimale lalaav avolutu
Mbouŋ to David
1 Yam aŋela ariaŋamim to sambam, apakur Yoova.
Apait iza pa tapiri ve poia toni. Mbo 103:20
2 Apait Yoova! Pasa, ye iza tiina kat.
Ye ipambood tau pa ŋgar toni patabuaŋ.
Tovenen aput aghemim pani ve apaiti. Mbo 96:7+
3 Yoova aliŋa
ila irau te dige to naol ne.
Maaron to iza tiina ne aliŋa, nene inimale lalaav avolutu.
Yoova isaav toman aliŋa tiina izala te pogho. Yo 12:28+; Syg 4:5
4 Yoova aliŋa tapiri tiina.
Aliŋa ipatooŋa ighaze ye iza tiina kat.
5 Yoova aliŋa iŋgalŋgal balagin ai mendepur tintina to Lebanon.
Aliŋa iŋgalŋgal mbirisan di.
6 Yoova aliŋa itok lolooz tintina to Lebanon, le tiyatovtov di tinimale makau ndinatu papaghu to tinidi iza.
Ve itok lolooz Ermon, le iyatovtova inimale bapolo sagsagŋa ndinatudi to tinidi iza.
7 Yoova aliŋa igham ndug milia, ve yab ighan.
8 Ve itok taan to ndug balim le irur.
Igham ndug balim to Kades katkatia ilala inimnim.
9 Yoova aliŋa igham mekmek sagsagŋa to apodi ne, ruŋadi iza le tipoop pataghaaŋ.
Ve igham ai raua tisob kurukia tizi.
Tovenen tamtoghon tisob to tilup di pa suŋuuŋ ila rumai toni lolo, tisaav toman aliŋadi tiina tighaze: “Tapait Yoova iza. Pasa, ye tapiri tiina kat!”
10 Muuŋ, yawaaŋa ivot toman tapiri ve itatab taan. Sawa tonenen, Yoova ineep ila ina to ghamuuŋ pooz ve iŋgini.
Aazne paam, ye kinik to ineep ila ina to ghamuuŋ pooz.
Pooz toni pale inepneep tovene itaghoni taghoni gha ila.
11 Yoova ighamgham tapiri pa tamtoghon toni.
Pale ighur poia toni izaza todi, ve iŋgin di tineep pooi toman lolodi luuma.