33
Tambou mbouŋ paghu pa Maaron
1 Yam to ataghon ŋgar deŋia, lolomim poia pa Yoova, ve alool ve apaiti.
Yam to aghamgham ŋgar poia, apait Yoova iza, ghoro deŋia.
2 Apambar ambam, ve arab gita, ve apakur Yoova.
Arab mbeb naol, ve apaiti ila mbouŋ to popoia kat.
3 Ambou mbouŋ paghu pani,
ve arab poian gita. Leso mbouŋ tiam paghuna.
Ambou tiina, ve apaiti toman lolomim poia!
4 Pasa saveeŋ to Yoova, nene onoon ve deŋia moghon.
Uraat naol to ighamgham di, nene ipatooŋa ighaze ye itataghon saveeŋ mbuaaŋ toni. Mbo 19:8, 119:142; Syg 19:11
5 Ye lolo pa ŋgar deŋia ve ŋgar to gharatooŋ pataŋani to tamtoghon le deŋia.
Ve lolo ineep tuŋia ila to tamtoghon toni ve iuluul di. Ŋgar tonene, ye ipatooŋa irau taan isob. Mbo 11:7
6 Muuŋ, saveeŋ to Yoova moghon, tauto mbeb to sambam paroŋania tisob tivot.
Avo isaav, ve ndag, kaiyo, ve pitum tisob tivot ila sambam paroŋania. Mbnp 1:14+; Hib 11:3
7 Ye igham te ila ilupi ila dige ee moghon.
Mazovan to muuŋ kat itatab taan, ye ighur poiani ila ina. Mbnp 1:2,9-10
8 Yam to aneep irau taan, amatughez pa Yoova ve ataghon ŋgar toni.
Yam ndug ndug, aroron pani, ve apakuri.
9 Pasa, ye isaav moghon, ve sambam ve taan tivot titaghon tau aliŋa.
Ye isaav ariaŋa, ve mbeb tisob tivot ve tineep tuŋia ila inadi.
10 Ndug ndug matadi iŋgal ŋgar naol tighaze tigham di.
Eemoghon Yoova iponpoon ataam padi.
Tauto ŋgar todi tonowen inim mbeb sorok, ve le anoŋa maau.
11 Eemoghon Yoova, ighaze mata iŋgal ŋgar eta, nene pale ŋgar tonenen ineep tovene irau sawa isob.
Sa ŋgar to ighaze lolo ighur pani, nene pale inepneep tovene itaghoni taghoni gha ila. Nam 23:19; 1Sam 15:29; Yems 1:17
12 Yes Israela Maaron todi, nene Yoova. Tauto tinidi iza pa poia toni to izaza todi.
Ye tau isia di, ve igham di tinim le kat. Mbo 144:15
13 Yoova ineep izi sambam, ve mata izizi pa ival tiina to taan. Mbo 11:4, 14:2, 53:2
14 Ye ineep ila ina to ghamuuŋ pooz, ve ighita tamtoghon tisob to tineep izi taan.
15 Ye to ighurghur ŋgar ila tamtoghon eŋaeŋa lolodi.
Ve ŋgar naol to tamtoghon tighamgham di, ye iwatag di tisob. Mbo 119:73; Hib 4:13
16 Ighaze kinik eta le ndaaba katindi, irau ndaaba tonenen eŋgendi tilib pa malmal maau.
Ndaaba ariaŋadi paam. Irau taudi tapiridi, ve tilib pa koiadi maau.
17 Ve hos to ndaaba tilaan padi pa malmal, tovene paam. Ighaze tighur matadi padi pa tiuul di ve tilib pa koiadi, nene pale tighur matadi padi sorok.
Onoon, hos tapiridi. Eemoghon irau tiuul di maau. Mbo 20:7
18 Onoon kat, yes to timatughez pa Yoova ve titaghon ŋgar toni, ye mata padi.
Yes to tinumeer Yoova tighaze ye lolo ineep tuŋia ila to tamtoghon toni ve iuluul di, ye iŋgin di tineep pooi. Igham 3:16; 1Pe 3:12
19 Ye iuluul di, ve igham mulin di pa pataŋani todi. Leso tineep pooi.
Ve ighaze pitool tiina ivot, ye pale iuul di, ve igham adi aniiŋ ve tineep pooi. Mbo 56:13; Mbaŋ 12:11
20 Tovenen iit tanumeer Yoova, ve taghur mataad pani.
Pasa, ye Ulaaŋa toit, ve inim sigeu pait.
21 Ye moghon, tauto lolood poia kat, ve tiniid iza.
Ye patabuaŋ ve iza tiina. Tauto taghur ila toni ariaŋa.
22 Yoova, yei nighur matamai payom pa uul ghei.
Ughur poia tiom iza tiei itaghon ŋgar tiom to lolom ineep tuŋia ila to tamtoghon tiom ve uluul di.